ХҮДӨӨГЭЙ СПОРТЫН НААДАН
Мартын 1-дэ Мухар-Шэбэр аймагта хүдөөгэй спортын үбэлэй наадан эхилхэнь.
Мүнөөдэр мүльһэн дээрэ бүмбэгэтэй хоккей наадагшад мүрысэхэ байна. Үглөөдэрһөө бусад спортын зүйлнүүдээр уулзалганууд болохоор хараалагдана. Санаар урилдаагаар, ГТО-гой үбэлэй наадануудаар (санаар урилдаан, бэеэ үргэлгэ, пневматическа винтовкоор буудалга), зүг шэг тодорхойлолгоор, конькигаар урилдаагаар мүрысөөнүүд Мухар-Шэбэр болон Сагаан-Нуур һууринуудта үнгэргэгдэхэ юм. Тус наадануудта Буряадай хүдөө аймагууд булта хабаадахаар түсэблэнэ.
Түрүү һуури эзэлһэн команда автомашина шанда хүртэхэ.
ҺУР ХАРБААН
Мартын 5-да Ивалга һууринда Сагаан һарын һайндэртэ зорюулагдажа, буряад номо һуршаар уласай хэмжээнэй нээмэл мүрысөөн үнгэргэгдэхэнь.
Эмхидхэгшэдэй мэдээсээһээр, эрэшүүл наһанай гурбан бүлэгтэ мүрысэхэ, эхэнэрнүүд наһанай хоёр бүлэгтэ хубааранхай. Мүн баhа 12-15 болон 16-21 наһанай бүлэгүүдтэ шалгарагшад элирүүлэгдэхэ юм. Нэгэ команда 10 хүнhөө бүридэхэ ёһотой.
БАРИЛДААН
Мартын 11-12-то Буряад Уласай Толгойлогшын шанда хүртэхын түлөө сүлөөтэ барилдаагаар заншалта уласхоорондын мүрысөөн эмхидхэгдэхэнь. Энэ мүрысөөн 1996 онһоо үнгэргэгдэнэ гээд һануулая.
Түрүүшын жэлнүүдтэ эндэ ганса эдиршүүл болон залуушуул хабаададаг байгаа. Тиигэhээр мүрысөөн уласхоорондын хэмжээнэй болоо.
2017 ондо бүхэдэлхэйн барилдаанай нэгэдэлэй эмхидхэдэг мүрысөөнүүдэй саг урда жэлнүүдһээ нэгэ бага ондоо болгогдоо. Тиимэhээ бүри олон гүрэнүүдэй түлөөлэгшэд Улаан-Үдэ ерэхэ бэзэ гээд найдагдана.
ШАТАР
«Сагаалган» гэһэн гаршаг доро шатар наадан заншалта ёһоороо Ивалгын дасанда үнгэргэгдэхэ юм. Мартын 23-27- ной үдэрнүүдтэ дэлхэйн түрүү шатаршад Буряадта айлшаар буухань.
Энэ хэмжээ ябуулга түргэн шатараар Ород гүрэнэй Кубогта хүртэхын түлөө мүрысөөнэй эхин шата болохо юм. Гэбэшье, эндэ хари гүрэнэй түлөөлэгшэд хабаадалсадаг гээшэ.
Ород гүрэнэй Кубогта хүртэхын түлөө мүрысөөн эгээл олон хабаадагшадтай хэмжээ ябуулга гэжэ алдаршанхай. Бүхы дээрээ 700 гаран хүн сагаан-хара хюлгын саана тэмсэхэ юм.