Буряад Уласые Ородой Холбооной Федеральна суглаанай Гүрэнэй Дүүмэдэ түлөөлжэ байһан һунгамал Алдар Дамдинов Советскэ Союзай Баатар, дэлхэйн түрүүшын эхэнэр космонавт, суута Валентина Терешковае наян наһанайнь ойгоор амаршалба.
Интернет холбооной Фейсбук бүлгэм соохи өөрынгөө хуудаһан дээрэ энээн тухай мэдээсэл һунгамалнай тунхаглаһан байна. “Бүхы Буряад ороной зүгһөө агууехэ Валентина Терешковае 80 наһанайнь ойгоор амаршалбаб!”, - гээд тэрэ бэшээ. Уншагшадайнгаа зүгһөө алдарта космонавтые наһанайнь ойгоор бэшэ, мүн баһа Эхэнэрнүүдэй һайндэрөөр хани халуунаар амаршалаад, хамаг һайн һайханиие хүсэнэбди.
Баатар солотой
Валентина Терешкова 1937 оной мартын 6-да Ярославль можын Тутаевска районой Большое Масленниково тосхондо түрэһэн юм. 1963 ондо эхэнэрнүүд сооһоо эгээл түрүүн замбуулинда ниидэжэ, бүмбэрсэг дэлхэйе бүһэлэн тойроһон алдартай. Тэндэһээ бусахадань, Советскэ Союзай Баатар гэһэн хүндэтэ нэрэ зэргэ гүрэн түрын тэрэ үеын дарганар олгоһон юм. Гадна Валентина Терешкова Чехословак болон Болгар Уласуудай Социалис Ажалай Баатар, Вьетнам, Монгол Уласуудай Ажалай Баатар гэһэн нэрэ зэргэнүүдтэ хүртэһэн байна.
Буряадаймнай ниислэл Улаан-Үдэ хотын эгээл гоё гудамжануудай нэгэндэ алдарта энэ хүнэй нэрэ олгогдонхой.
Түрүүшын эхэнэр генерал
Валентина Терешкова генерал-майор гэһэн сэрэгэй зиндаада манай гүрэнэй эхэнэрнүүд сооһоо анха түрүүшынхиеэ хүртэһэн, техническэ эрдэмэй дид-доктор, профессор юм. СССР-эй зургаадугаар, дэлхэйн арбадугаар ниидэгшэ-космонавт. Бүхы дэлхэйн бүһэгүйшүүл сооһоо замбуулин руу ори гансаараа ниидэһэн гансахан эхэнэр.
Мүнөө хүрэтэр дүрөө дээрээ
Суута космонавт Ородой Холбооной Федеральна суглаанай Гүрэнэй Дүүмын хэдэн зарлалай һунгамал юм. Мүнөөнэйшье долоодохи зарлалай депутадаар “Ниитэ нэгэ Росси” намай зүгһөө һунгагданхай, Гүрэнэй Дүүмын Уласхоорондын хэрэгүүдэй талаар хорооной түрүүлэгшын орлогшо. “Ниитэ нэгэн Росси” намай Дээдын зүблэлэй гэшүүн.