...Эхин дээрэнь лэ эршэ долги эльгээжэрхидэ, эб нэгэн һайндэр бүрилдэдэг хаяа? “Буряад үнэн” Хэблэлэй байшанда “Байгал” сэтгүүлэй 70 жэлэй ойе угтуулан Сагаалганай дүхэриг салгидан үнгэрөө. Хэблэлэй байшанай захирал-ахамад редактор Баяр Балданов “Байгал” сэтгүүлэй 2016 оной эрхим авторнуудые хүндэлэн ёһололгын үдэшые эгээл иимэ үндэрлиг долгисотойгоор хүтэлхэдөө, буряад хэблэлэй, буряад хэлэнэй хуби заяан тушаа өөрынгөө хараа бодомжонуудые элирхэйлжэ, сэдьхэлэй хөөрэлдөөндэ уриба.
“Байгал” сэтгүүлэй редактор Г.Х.Дашеева лауреат бүхэн илалта яагаад туйлааб гэжэ үндэһэлэн хөөрэбэ. Эгээл түрүүн аха захатан, Буряадай элитэ эрдэмтэн Л.Д.Шагдаров, БНЦ-гэй ахамад мэргэжэлтэн, хэлэ бэшэгэй эрдэмэй доктор Л.Б.Бадмаева хоёр буряад уран зохеолой үндэһэ һуури табигшадай нэгэн Батасэрэнэй Жигжиджабай 1927 ондо бэшэһэн “Саһан шуурган” гэһэн туужые уншагшадта бусаагаа. Ж.Батоцыренов олониитые гэгээрүүлэгшэ, лата бэшэгэй буряад алфавит, буряадай түрүүшын үзэглэл зохёоһон бэлэй. В.И.Лениниие хүдөөлгэндэ засаг түрын зүгһөө эльгээгдэһэн. Һонирхолтойнь гэхэдэ, энэ хүмнай Л.Д.Шагдаровай дээдэ үеынь элинсэг юм. Хуушан монголһоо оршуулагдаһан энэ ном соо буряад зоной ажабайдал ангиин, үзэл сурталай харааһаа бэшэ, байһан соогоо харуулагдаа. Халуун альга ташалган доро Лариса Батоевнада хоёр лауреадай Дипломууд барюулагдаба.
Лариса Бадмаева
Буряадай Дерсу Узала гээд 80 наһанайнгаа ойе угтаһан уран зохёолшо Д-Д.Д.Дугаровые нэрлэмээр юм. “Хангай” гэһэн гурбан боти номһоо бүридэһэн романуудынь энээниие бодотоор элирхэйлнэ. “Юртэмсэ хангайн орон” гэһэн гурбадахи ботинь мүнөө “Байгалай” хуудаһануудта толилогдожо байнхай. “Прозоор эрхим буряад зохёол” номинацида энэ боти шалгараа.
- Мүнөөшье бидэ зун нажартаа хангайгаа бараалхахаяа хэдэн хоногоор зоридогбди. Хангай гээшэ амида бурхан, - гээд, Даша-Дэмбэрэл Дармабазаровичай наһанайнь нүхэр Лариса Намсараевна хөөрэбэ. Миисгэй, нохойгоошье орхихо аргагүй, абаад ошодогбди гэхэдэнь, һонин бэлэй. Залуудаа аймагуудай сонинуудта, “Буряад үнэн” сониной тусхай сурбалжалагшаар, Буряадай Уран зохёолшодой холбооной бюродо ажаллаһан тухайгаа Даша-Дэмбэрэл Дармабазарович дурсан хөөрэбэ.
- Мүнөө Хэблэлэй байшанай зүгһөө үндэр нэрэ зэргэдэ хүртэжэ байхадаа, “Буряад үнэндэ” хүдэлһэмни, “Байгалдаа” бэшэжэ байһамни миин үнгэрөөгүй, үнэн аша үрэнь энэл ха юм. Уг залгаха гээшэмнай Буряадаймнай хэблэлдэ үгы болоогүй, бии юм байна гэжэ досоогоо батажааб, омогорхоноб, баярланаб, - гээд, наһатай зохёолшо, сурбалжалагшын хэлэхэдэ, уярмаар лэ бэлэй даа.
Даша-Дэмбэрэл.Дугаров
“Буряад үнэн” Хэблэлэй байшанай захиралай орлогшоор, “Буряад үнэн” сониной редактораар олон жэлдэ аша үрэтэйгөөр ажаллаһан, хэлэ бэшэгэй эрдэмэй кандидат Т.В.Самбялова “Шэнжэлэл, шүүмжэлэл” номинацида эрхимлэжэ, лауреат болон тодороо. Дэлхэйн философуудай, эрдэмтэдэй номуудые эдир залууһаа уншаһан үргэн эрдэм мэдэсэтэй хадаа Даши-Дондоб Очировай поэзи тухай шэнжэлэл бэшэхэдээ, физикэ философи хоёрой ойлгосонуудые уран зохёолдоо нэбтэрүүлһэн авторые бүри мүһэн ойлгоо, дэмжээ бшуу. Гуурһа нэгэтэ нүхэрэймнай литература шэнжэлгын саашанхи ажал ябуулгадань иимэ илалтанууд тохеолдожол байһай гэжэ хүсэнэбди.
“Үлэгшэнэй буряадуудай үреэлнүүд болон таабаринууд” гэһэн толилолгоёо “Байгал” сэтгүүлдэ дурадхаһан Ц.Ц.Очирова «Арадай аман зохёол» гэһэн номинацида шалгараа. Цындема Цыдыповнагай наһанайнь нүхэр П.Т.Очиров хатагин угай, монголшо хүн, республика соогоо һургуулиин эрхим музей байгуулжа, Үлэгшэнэй буряадуудай бэлигтэн, угууд тухай, һургуули тухай номуудые бэшэжэ, хэмжээлэшэгүй ехэ ажал хэһэн юм. Цындыма Цыдыповна нүхэрһөө дутуугүйб гээд, хамсыгаа шуужа, хүгшэд, үбгэдһөө саг соогоо аман зохёол суглуулжа үрдеэ, бэрхэ, шударгыл хүн гээшэ. Уянгатай һайханаар дуулахынь соносоходо хэды аятайб даа.
"Буряад үнэн" Хэблэлэй байшанай захирал-ахамад редактор Баяр Балданов Цындема Очировае шагнажа байна
- Юрэдөөл, лауреадууд соо юрын хүн үгы. Эрдэнитэ зон гээд хүн бүхэнииень нэрлэхэ үндэһэн бии. “Мүнөөдэрэй шухала асуудал” гэһэн ниитэ гаршагтамнай Буряад соогоо мэдээжэ сурбалжалагша, блогер Намжилма Нанзатовна Бальжинимаева сэтгүүлэймнай гуйлтаар хамба-лама Дамба Аюшеевтэй хөөрэлдөө үүсхэһэн юм. Эгэшэ нүхэрэйнгөө үүсхэлыень, урагшаа һанааень, ульгам гуурһыень дэмжэжэ, Дипломоо барюулая даа, - гэхэдээ, үнэн хүсэлөө элирхэйлһэмнай ойлгосотой.
Намжилма Бальжинимаева
“Оршуулга” гэһэн ниитэ гаршаг доро Ким Сон Жунай “Бисалгалын хуряангы” толилоо һэмди. Шажан мүргэлэй санаартан, анагааха ухаанай, урлал зурагай эзэн, уран зохёолдо ульһатай – олон һалбарита бэлигээ задалан, угсаата зондомнай туһа хүргэн Буряадтамнай ажаһуужа байһан солонгос яһанай энэ хүн бурхан багшын амалалтые соносон, бэлигүүн нюдөөр бисалгал соо хараһан, үзэһэнөө бэшээ юм. Урда наһанайнгаа түрэлнүүдые мэдэдэг, монгол удамай хүн байһамби, абамни Галдан, үбгэн абамни Гомбын Завьяа юм һэн гээд гайхуулаал. Шэди эдиие арсажа болохо аал?
Б.Ц.Бальбурова һайндэртэ шэнэ амисхаал оруулба. “Зүжэг найруулга” номинацида «Ангуушан» гэжэ зүжэгөө толилуулһан байгаа. Эрхүүдэ хүдэлжэ байхадаа, түрүүшынгээ зохёолнуудые эльгээжэ гайхуулһан бэлэй. Агаһаа гарбалтай, баян хэлэтэй, дэлгэр, һонин образуудые байгуулха шадабаритай. “Зүнтэй зүүдэн” гэһэн конкурсдомнай угаа һонирхолтой зураглал эльгээгээ һэн. Теэд мүнөө үедэ зүжэгүүдэй хуби заяан ямар гээшэб, табигдахашье бэшэ даа гээд шаналалтайгаар хэлэхэдэнь, сугларагшадшье миин шагнаад һуубагүй, һанамжаяа хэлэбэ. Харин бидэнэрэй зүгһөө номоо гаргуулхаар сагшни болоо гээд Баирадаа хүсэһэмнай хиидэ һалахагүй бэзэ гээд найдая.
Баира Бальбурова
Хэжэнгэ нютагһаа гарбалтай Я.З.Дашидоржин “Уянгын долгин дээрэ” номинацида эрхимлээ. «Гоо хатан», «Дадал сомон», «Худанай үртөө” шүлэгүүд соонь толгой холболгын заршам сахигдаашьегүй һаа, сэдьхэлэй ульһа дайрама уянгын һэбшээн угаа элил. Зэдын талада урданай Гоо хатанай дүрын үзэгдэһэниинь ямар һайхам! Улаахан плати үмдөөд ерэһэн сагаахан сарюун шарайтай Янжима энэ үдэшэ өөрөө Гоо хатандал һэн. Монголой талын уудамда Агуу Сахюусан Ошорваани шэртэн хараа юм ха, Дадал сомон ошоходоо, автобус соо нойрсон һагад һуухадань...
Янжима Дашидоржин
Удаадахи лауреаднай эдир залуу хүн – Эрдэм Ламожапов. Эрдэм бүри һаяхана, февраль һарын һүүл багаар Сеулай дээдэ һургуулиие “Уласхоорондын харилсаан” мэргэжэлээр дүүргэһэн тухайгаа Диплом абаад ерээ юм. Энэ ушараарнь альгаа ташан амаршалбабди. “Буряад үнэндэ” наһаараа алдуу заһагшаар хүдэлһэн Екатерина Максимовнагай, философиин эрдэмэй доктор Михаил Дармаевич Зомоновтоной зээ хүбүүн гээшэл даа. 59-дэхи гимназиин 9-дэхи класста һуража байхадаа, “Юһэн тугай һүлдэ” гэһэн конкурсдомнай хабаадажа, лауреат болоо бэлэй. Эрдэм хари газарташье байхадаа, бидэнээ мартаагүй, солонгос патриот, уран зохёолшо Сим Хунай “Тэрэ үдэрэй ерэбэл...” гэһэн мэдээжэ шүлэгые солонгосһоо ородто, ородһоо буряад хэлэн дээрэ өөрөө оршуулаад эльгээһэн юм. Монгол хүбүүдтэй суг хамтын байрада байхадаа, буряад, монгол хэлэндээ хам шэлжэн ороо бшуу. “Солонгос хэлэн дээрэнь энэ шүлэгөө уншаад үгыш”, - гээд, Баяр Дашеевич Интернет холбоо Эрдэмдэ дурадхажа, тэрэнь саг дары телефон дээрээ буулган абаад, гурбан ондоо хэлэн дээрэ уншажа үгэбэ. Япон эзэрхэг түримхэйшүүлдэ эсэргүүсэн бэшэгдэһэн энэ шүлэг үндэһэтэнэй нангин мэдэрэл хэнэйшье досоо һэргээхэ хүсэтэй. Саашаа һуралсалаа үргэлжэлүүлхэ тухайгаа, илангаяа буряад хэлэеэ уласхоорондын хэмжээндэ, “Википедеэр” дамжуулан дэлгэрүүлхэ тухайгаа Эрдэмэй мэдүүлхэдэнь, одоол баясамаар бэлэйл!
Эрдэм Ламожапов
“Урлал бэлигэй угалзанууд” номинацида Ивалгын аймагай Тапхарай һургуулиин эхин классуудай багша Н.А.Айсуева эрхимлээ. Һубһаар гайхалтай урлал - байгаалиин үзэгдэлнүүдые бүтээхэдээ, энэ шадабаридаа хүүгэдые һургадагынь илангаяа сэнтэй. Урданай үнэтэ шүрын түхэлтэй зүүдхэлнүүдые мүн лэ үнэншэмэ гоёор урладаг.
Надежда Алексеевна Сагаалганай хэшэг болгон, эхэнэрнүүдэй һайндэрөөр бэлэг болгон, хабар тухай дуу гүйсэдхэжэ, олониие баясуулба. Хөөрхэн хүүгэд шабинартаа эгээл иимэ дуунуудаа һургажа, хамтадаа ямар гоёор дуулалдадаг гээшэб. Ханамжатай даа.
Надежда Айсуева
“Иигэжэ та бүгэдэнтэйгөө харилсахадаа, хэлэмнай, хэблэлнай заяатай, залгамжалагшадтай гээд, үшөө дахин үнэншэбэбди”, - гээд, үдэшын түгэсхэлдэ Баяр Дашеевичэй тобшолһониинь зүйтэйл юм.
"Буряад үнэн" Хэблэлэй байшанай захирал-ахамад редактор Баяр Балданов, Даша-Дэмбэрэл Дармабазарович наһанайнгаа нүхэр Лариса Намсараевнатайгаа, "Байгал" сэтгүүлэй редактор Галина Дашеева, Хэблэлэй байшанай захиралай орлогшо Александр Махачкеев
Аркадий Батомункуевай гэрэл зурагууд