Мартын 11-12-то Улаан-Үдэ хотодо Буряад Уласай Толгойлогшын шанда хүртэхын түлөө сүлөөтэ барилдаагаар тэмсээн үнгэргэгдэбэ. Буряадай барилдаашад 11 медаль абажа, нютагаархинаа баясуулба.
Тус мүрысөөндэ хабаадахаяа юһэн гүрэнэй 111 барилдаашад Улаан-Үдэ ерээ. Тэдээнэй 58-ниинь Монгол уласай түлөөлэгшэд байгаа. Жэлһээ жэлдэ Монголой барилдаашад энэ хэмжээ ябуулгада олоороо хабаададаг.
Буряад Уласай Толгойлогшын уялга саг зуура дүүргэгшэ Алексей Цыденов, Арадай Хуралай Түрүүлэгшэ Цырен-Даша Доржиев, Барилдаанай нэгэдэлэй түлөөлэгшэ Джан Цонг-Ронг (Тайвань) болон Ородой Холбооной Уласай барилдаанай эблэлэй толгойлогшын орлогшо, Олимпиин хоёр дахин абарга Арсен Фадзаев гэгшэд сугларагшадые баяр ёһололой үедэ амаршалаа.
Барилдаанда дуратайшуул түрүү тамиршадайнгаа барилдахые анхаралтай адаглаа. Тиимэһээ энэ шанга тэмсээнүүдтэ буряад хүбүүд харагшадаа баясуулжа, ямар арга шадабаритай болоод ябаһанаа бүри мүhэн харуулжа шадаба.
Хоёр үдэрэй туршада табан алтан медаль Буряад ороной тамиршад абаба. 57 килограмм хүрэтэр шэгнүүрэй финалда хоёр буряадууд барилдажа, Тамир Гармаев Солбон Түмэнбаяровые шүүбэ. 65 килограммда баһа манай хоёр тамиршад уулзажа, Алексей Боровицкий нэгэдэхи һуурида гараа, Булат Батоев мүнгэн медальда хүртөө.
97 килограммай шэгнүүртэ Юрий Власко түрүүлһэн байна. Тэрэ мүрысөөнэй дүнгүүдээр «Эрхим барилдаашан» нэрэ зэргэдэ хүртэжэ, 100 мянган түхэриг тусхай шан абаба.
70 килограммай шэгнүүртэ Евгений Жербаев хоёрдохи жэлээ чемпион боложо шадаа. Мүн 125 килограмм хүрэтэр шэгнүүртэ Балдан Цыжипов анха түрүүшынхиеэ нэгэдэхи һуурида гараба. Балдан хадаа 2010 онһоо хойшо шангай һууринуудые эзэлнэ, теэд түрүүлжэ шадаагүй ябаа.
61 килограмм хүрэтэр шэгнүүртэ Даша Шарастепанов хоёрдохи һуури эзэлһэн байна. Тэрэ хахад финалай уулзалгада хүлөө гэмтэжэ, алтан медаль абахын түлөө барилдажа шадаагүйнь харамтай.
Жаргал Дамдинов, Арсалан Будожапов болон Цыбик Максаров гэгшэд шангай гурбадахи һууринуудта гараа.
Барилдаагаар Буряад Уласай гүрэнэй һоригшо Юрий Сандаковай мэдээсэһээр, 2017 ондо барилдаанай дүримдэ шэнэ дүрим оруулагдаһан байна. Жэлэй хугасаа соо уласхоорондын мүрысөөнүүдтэ түрүүлһэн барилдаашад шэлэн абалгын шатада хабаадангүй, Иван Ярыгинай дурасхаалда зорюулагдаһан мүрысөөндэ барилдаха эрхэтэй болонхой. Тиимэһээ 2018 ондо Буряадай табан тамиршад Красноярскда мүрысэхэ юм.