815
2016 ондо 80 мянганһаа дээшэ харагшад Буряадай гүрэнэй оперо болон баледэй театрта ерэһэн байна.
Мартын 14-дэ оперо болон баледэй театрай дэргэдэ суглаан эмхидхэгдэжэ, үнгэрһэн жэлэй дүнгүүд согсологдожо, ерээдүйн түсэбүүд хэлсэгдэбэ.
Жэлэй дүнгүүд тухай театрай захирал Аюна Цыбикдоржиева, харагшадтай хүдэлмэриин талаар захиралай орлогшо Давид Дондупов, ахамад бухгалтер Аюна Доржиева, хуули еһо сахилгын болон кадрова хүдэлмэриин талаар захиргаанай хүтэлбэрилэгшэ Эржена Батомункуева, оркестрые даагша Дарья Станишевская, театрай музейн хүтэлбэрилэгшэ Ольга Шагланова гэгшэд элидхэл хэһэн байна. Буряад Уласай Соёлой яаманай түлөөлэгшэ, соёл болон урлагай хорооной түрүүлэгшын орлогшо, урлагай, арадай зохёохы ажалай болон болбосоролой таһагай дарга Татьяна Дугарова энэ суглаанда хабаадалсаа.
2016 ондо Буряадай оперо болон баледэй театр үндэр амжалтануудые туйлаһан байна гэжэ тэмдэглэгдээ. Һүүлэй табан жэлэй ажалай дүн согсологдоо. Классическа зүжэгүүд –“Лебединое озеро” балет болон “Кармен” оперо табигдаа. Үшөө тиихэдэ “Тоска” гэһэн оперо Москва хотын Ехэ театрай тайзан дээрэ харуулагдаһан юм. Санкт – Петербург хотын Мариинска театрай тоглолтын танхимай тайзан дээрэ оперын дуушадай гала-концерт, Александрийска театрай тайзан дээрэ баледэй үдэшэнүүд үнгэргэгдэһэн байна. Ноябрь һарада Москва болон Санкт-Петербург хотонуудта үнгэрһэн гастрольнуудай үедэ Буряадай оперо болон баледэй театрай ажаябуулга үндэрөөр сэгнэгдэһэн байна. Энээн тухай федеральна хэблэлэй албанууд мэдээсэһэн юм.
Суглаан дээрэ Буряад Уласай габьята артист Ариунбаатар Ганбаатарай амжалтанууд онсолон тэмдэглэгдэбэ, баледэй хатаршадай Италида амжалтатайгаар ябажа ерэһэн тухай хэлэгдээ.
2016 ондо Буряадай оперо болон баледэй театр федеральна грантда хүртэжэ, декабрь һарада “Красавица Ангара” гэһэн балет шэнээр табиһан байна. Мүнөө һарада энэ балет 10-дахияа харуулагдаха юм.
2016 ондо эдэй засагай талаар байдалай хэды орёо байгаашье һаа, Буряадай оперо болон баледэй хүдэлмэрилэгшэд түсэблэгдэһэн ажалаа урагшатайгаар бэелүүлһэн байна. 2016 ондо бүхыдөө 225 хэмжээ ябуулганууд үнгэргэгдөө. 80 мянганһаа дээшэ театрта дуратайшуул эдээндэ ябаа гэжэ бүридхэгдөө.
Оперо болон баледэй театрай түсэбүүд гэбэл, баледэй зунай хаһа эмхидхэхэ, 2017оной намар Москва хотодо үнгэргэгдэхэ “Видеть музыку” фестивальда хабаадаха г.м. болоно. Үшөө тиихэдэ, Эрхүү, Шэтэ можонуудта болон Буряад Улас дотороо гастрольнуудые эмхидхэхэ гэжэ түсэблэгдөө. Энээнһээ гадуур оперын дуушад Монгол гүрэн, баледэй хатаршад Итали гастрольдо ошохоор хараална гэжэ Буряад Уласай Соёлой яаман мэдээсэнэ.
