Сэлэнгэ аймагай Харганын дунда һургуулиин 11-дэхи классай һурагша Булат Султумов “Эрхим һурагша-2017” гэһэн нэрэ зэргэдэ хүртэбэ.
“Эрхим һурагша -2017” гэһэн 12-дохи мүрысөөнэй дүнгүүд согсологдобо. Энэ хэмжээ ябуулгада уласай 28 эдэбхитэй, бэлиг талаантай һурагшад хабаадаһан байна. Тэдэнэр байгаали хамгаалгада зорюулһан түсэлнүүдые бэлдэжэ,олондо харуулаа. Гран-при шанда болон үнэтэ бэлэгтэ хүртэһэн Сэлэнгэ аймагай Харганын дунда һургуулиин Булат Султумов өөр тухайгаа иигэжэ хөөрэбэ:
- -Би номо һуршаар буудадагби,спортын мастерай кандидат болонхойб. Дуу, хатарташье дуратайб.
Энэ мүрысөөнэй дүнгүүдээр бүхэроссиин хүүгэдэй “Океан” түбтэ “Молодые лидеры России” гэһэн ээлжээндэ Буряад Уласаа дүрбэн һурагшад түлөөлхэ юм.
Буряад Уласай Болбосоролой болон эрдэм ухаанай яаманай нэмэлтэ һуралсалай, тусхай һуралсалай болон интернадай түхэлтэй эмхи зургаануудай таһагай ахамад мэргэжэлтэн Татьяна Батомункуева иигэжэ хэлэбэ:
- -Аймагайнгаа, һургуулинуудайнгаа нэрэ хүндыень дээрэ үргэжэ ябаһан үхибүүд саашада эрдэмэй хүдэлмэринүүдээ үргэлжэлүүлжэ, дээдэ һургуулиин оюутад болохо бэзэ. Ерээдүйдэ бидэ эдэ нэрэнүүдые дахин дуулаха байхабди.