​“Байгал” театр бэлигээ гэршэлхэнь

Мартын 19-нэй үдэшэ Буряад Уласта ажаһуугшад “Танцуют все!” гэһэн мүрысөө булта шахуу хараһан байха. Юундэб гэхэдэ, Буряад уласай дуу, хатарай “Байгал” театр энэ мүрысөөндэ амжалтатайгаар хабаадаба. Тэдэнэр “Угайм һүлдэ” гэһэн спектакльһаа хэһэг олоной һонорто харуулжа, халуун альга ташалгаар угтуулһан байна.

Шэлэн абалгын шата амжалтатай гаража, “Байгал” театрайхид “Танцуют все” гэһэн урилдаанда хабаадаха болоо. Мэдээжэ хатаршад- Алла Сигалова, Егор Дружинин болон Владимир Деревянко гэгшэд энэ хэмжээ ябуулгын жюриин гэшүүд юм.

Хатарай һүүлээр энэ урилдаанай хүтэлэгшэ Евгений Папунаишвили, юун тухай харуулһанаа хөөрэжэ үгыт гэжэ хэлэбэ. -“Угайм һүлдэ” гэһэн спектакльһаа хэһэг харуулаабди. Манай угсаата арадай һүр һүлдэ болохо Бүртэ-Шоно, Буха ноён, хори буряадуудай Хун шубуун гэгшэдые магтан түүрээнэбди.-гэжэ Байгал театрай артист харюусаба.- Хэр удаан саг соо хатарха костюмуудаа үмдэдэгбтэ?- гэжэ Ольга Шелест һонирхобо. – Хахад час тухай болодогбди ,-гэжэ “Байгал” театрайхид харюусаба. Удаань артистка Валентина Юндунова түрэл театрайнгаа түүхэ тухай тодорхойгоор хөөрэжэ үгэбэ.

Удаань шүүгшэдтэ үгэ үгтэбэ. Ородой Холбоото уласай габьяата соёл урлагай ажаябуулагша Алла Сигалова Улаан-Үдэ хэды дахин ерэһэн тухайгаа хэлэбэ.

- Улаан-Үдэ гоё һайхан хото юм. Хүндэмүүшэ зон тэндэ ажаһуудаг . Иимэ өөрсэ маягтай таанадта саашанхи замдатнай һанаата болоноб. Тиигээшье һаа, таанарта амжалта хүсэнэб! – гэжэ Алла Сигалова хэлэбэ.

Баледэй хатаршан Владимир Деревянко артистнуудта баһал амжалта хүсөөд, хатаршадай дүй дүршэл, шадабариһаа олон юумэн дулдыдаха гэжэ хэлэбэ.

• -Саашадаа энэ түсэлдэ хабаадахадатнай иимэ үндэр хэмжээнэй хатарнуудые харуулхыетнай хүсэнэб,- гэжэ Егор Дружинин хэлэбэ.

Эмхидхэгдэһэн энэ мүрысөөнэй эгээл һонирхолтойнь гэхэдэ, тусхай өөһэдын хатарай маягтай байһан бүлэгүүд, тад ондоо шэглэлээр хатарха юм. Жэшээнь, индиин хатарай бүлэг балет харуулха гү,али ород хатарай “Калинка” бүлэг хип- хоп хатарха болоно. Тиимэһээ хабаадагшад долоон хоногой туршада бэлэдхэл хэжэ, гарагай долоондо шэнэ хатар харуулха болоно.

Буряад Уласай Соёлой яаманай хэблэлэй албанһаа гэрэл зураг абтаба.