​Гүрэнэй сонинуудта - онсо анхарал

Үнгэрһэн долоондо, гарагай табанда “Буряад үнэн” Хэблэлэй байшанда гүрэнэй хоёр сониной редколлегиин зүблөөн боложо үнгэрбэ. 

«Үнэндэмнай» үндэр айлшад буугаа 

Манай сонинуудай эмхидхэн байгуулагшад – Буряад Уласай Арадай Хуралай Түрүүлэгшэ Цырен-Даша Доржиев, Засагай газарай Түрүүлэгшын нэгэдэхи орлогшын уялгануудые дүүргэгшэ Иннокентий Егоров, Арадай Хуралай Түрүүлэгшын орлогшо Вячеслав Ирильдеев, уласай парламентын Нютаг можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной дарга Цыденжаб Батуев, Буряад Уласай Толгойлогшын болон Засагай газарай захиргаанай хүтэлбэрилэгшын орлогшо Ирина Смоляк, мэдээсэлэй-аналитическэ хорооной түрүүлэгшын орлогшо Тамара Нагуслаева, Арадай Хуралай Аппарадай Олондо мэдээсэл тараадаг хэрэгсэлнүүдтэй ажаллаха талаар таһагые даагша дарга Саяна Хайдапова гэгшэд “Үнэнэй” сэргэдэ буужа, хэжэ байһан ажал тухай хөөрэлдөөндэмнай хабаадалсабад. Хэблэлэй байшанай зүгһөө эдэ мүрнүүдые бэшэгшэһээ гадна, орлогшо дарганар Татьяна Баженова, Александр Махачкеев, “Буряад үнэнэй” эрхилэгшэ Бадмажаб Гындынцыренов, “Байгал” сэтгүүлэй редактор, Буряадай арадай ирагуу найрагша Галина Базаржапова-Дашеева, “Байкал” сэтгүүлэй редактор Булад Аюшеев, манай эмхи зургаанай ахамад нягталан тоологшо Светлана Жамьянова гэгшэд хабаадалсаһан байха юм. Дээдын засагай дарганарай хабаадалгатайгаар үнгэрһэн суглаанай гол сэдэбүүдынь – гүрэнэй сонинуудай, Хэблэлэй байшанай гаргажа байдаг сэтгүүлнүүдэй ерээдүй, мүнгэн хангалта, шиидхэгдээгүй асуудалнууд, саашанхи хүгжэлтын хараа бодолнууд. 

Дүрбэн редакциин ажал даажа 

Анхандаа “Буряад үнэн”, “Бурятия” сонинууд, “Байгал”, “Байкал” сэтгүүлнүүд ами аминдаа өөһэдын редакцинуудтай, өөһэдын мүнгэн тэдхэмжэ гүрэнэй һан жасаһаа абаад, ажалаа эрхилжэ, арад зоной, олониитын ажабайдалда шухала үүргэ дүүргэжэ байһан гээд мэдээжэ. Һүүлэй арба гаран жэлэй туршада тэдэниие Хэблэлэй нэгэ байшанай дали доро хамтаруулжа, мүнгэнэй талаар алмалта хэхэ шиидхэбэри абтажа бэелүүлэгдэһэн юм. Энэ шиидхэбэриин хойшолонгууд бодото дээрээ ямар байгааб гээд түүхэ гэршэ боложо, хожом сэгнэлтэ үгтэхэ юм бэзэ. Харин уласаймнай мүнөө байһан дарганар “Үнэндөө” ерэхэдээ, үрэ дүнтэйгөөр морилоо. Нёдондонойхитой сасуулхада, Хэблэлэй байшанда үгтэдэг мүнгэн нэмэгдээ, гүрэнэй хуулита шиидхэбэринүүдые оршуулгада, тэдэниие согсолбори болгон гаргаха ажалда нэмэлтэ туһаламжа үгтэхэ болонхой. 

Дэмжэлгэ байха 

Засагай дээдын зургаануудай дарганар манда ерэхэдээ, бултыемнай тэсэбэри ехэтэйгээр шагнаад, заатагүй дэмжэжэ байһанаа мэдүүлээ. Илангаяа Буряад Уласаймнай һүлдэ болоһон, буряад хэлэн дээрэ гаража байһан ори гансахан сониноо, ори гансахан сэтгүүлээ арадаймнай эрдэни зэндэмэни гээд тэдэ онсолон тэмдэглэһэн байха юм. Харин манай, зохёохы хүдэлмэрилэгшэдэй, үүргэ – хэжэ байһан ажалаа заатагүй эршэдүүлхэ, сонин, сэтгүүлнүүдээ бүри һонирхолтой болгохо, уншагшадайнгаа тоо олошоруулха. Тиимэһээ “Үнэнэйнгөө” үнэн нүхэдтэ хандажа, туһа эрихэ дуран хүрэнэ. Аймаг нютагуудаар, хото хүдөөгөөр түрэл хэлэн дээрээ гаража байдаг сонин, сэтгүүлээ тараахадамнай, танай дэмжэлгэ заабол хэрэгтэй байна. Арадай заншалнууд, болбосорол, соёл урлалһаа эхилээд, түрэлхи хэлэндэмнай мүнөө үедэ боложо байгаа хубилалтанууд, юрын ажалша малша зоной ажабайдал, эрдэм ухаан, уласхоорондын ушарнууд тухай дары түргэн гансашье сониндоо бэшэ, мүн сайт дээрээ бэшэжэ, дуулгажа байхабди.