952
Зүблэлтэ засагай үедэ манай эндэхи газар дэбисхэр дээрэ хони үсхэбэрилгэ гол шухала ажахы байгаа. 1,7 сая хүрэтэр толгой хонин тоологдодог, хүдөө ажахын эгээл олзо ехэтэй һалбари һэн. Харин мүнөө Буряадта бүхыдөө 292 мянган толгой хонин бии, тэдэнэй 29 мянган толгойнь нарин нооһото үүлтэрэй хонид гэжэ тоологдоно.
Буряад Уласай Толгойлогшын уялга саг зуура дүүргэгшэ Алексей Цыденов болон Буряад Уласай Засагай газарай түлөөлэгшэд “Ажур Текс” үйлэдбэриин хүтэлбэрилэгшэдтэй уулзаһан байна.
“Ажур Текс” гэһэн хубиин үйлэдбэри 2008 онһоо эхилжэ, инвестпрограммын түрүүшын шата бэелүүлээ – дотор хубсаһанай болон гадар хубсаһанай трикотаж, оймһо, һургуулиин хубсаһа оёдог болон бусад шэглэлэй цехүүдые нээһэн юм. Мүнөө энэ үйлэдбэри нооһо арилгажа, угаажа, элдэб үнгэтэй нооһон бүд үйлэдбэрилжэ эхилхэнь. Энэнь тус программын 2-дохи шата болоно.
Түсэбэй ёhоор, “Ажур Текс” жэлдээ 617 сая түхэриг оршо оруулха аргатай, 1 мянган тонно текстиль үйлэдбэрилхэ болоно. Эндэ 387 сая түхэриг инвестициин, 134 сая түхэриг өөһэдын мүнгэ зөөреэр үйлэдбэриин хэрэгсэлнүүд худалдажа абтагданхай.
- Программын дүүрэнээр бэелүүлэгдэхэдэ, 72 ажалай һууриһаа 300 хүрэтэр олон болохо, налог 6 сая түхэригһөө 91 сая түхэриг хүрэтэр дээшэлхэ, - гэжэ “Ажур Текс” үйлэдбэриин захирал Цыпилма Барасова мэдээсэбэ.
2019 ондо программа бэелүүлгын гурбадахи шата – хибэс үйлэдбэрилгэ эхилхэ, эндэ шэрүүн нооһон хэрэгтэй бшуу. Хүнгэн промышленностиин кластер байгуулагдаха (текстиль, фурнитура үйлэдбэрилхэ), мүн эмнэлгын болон косметикын һалбарида хэрэглэгдэдэг ланолин гэһэн зүйл үйлэдбэрилгэ түсэблэгдэнхэй. Үйлэдбэрилэгшэд засагай түлөөлэгшэдтэ хэдэн асуудалаар дэмжэлтэ үзүүлхыень гуйба. Үйлэдбэриин байра тухай, промышленна парк соо хэрэгсэлнүүдые тодхолгодо, шэнэ түхеэрэлгэнүүдые худалдажа абалгада гүрэнэй тэдхэмжэ үзүүлхэ тухай асуудалнууд табигдаа. Түүхэй эдээр хангалгын талаар хари гүрэнүүдһээ дулдыданги байдал тухай хэлэгдээ. Юуб гэхэдэ, нютагай түүхэй эд – хониной нооһон дуталдана, тиимэһээ үйлэдбэрилэгшэд Монголһоо нооһо худалдажа абаха хараатай байһанаа мэдүүлбэ.
- Шиидхэгдэхэ гол асуудалнууд – һайн мэргэжэлтэдые бэлдэхэһээ эхилээд, элдэб хэрэгсэлнүүдые, нооһо шэрдэхэдэ хэрэгтэй түхеэрэлгэнүүдые тодхолго (20 сая түхэриг сэнтэй). Мүн лэ нооһо угаадаг түхеэрэлгэ ( 3,5 сая түхэригтэ) абаха хэрэгтэй. Мүнөө бүхы олзын түсэб тоологдонхой, үйлэдбэрилэгдэhэн зүйлнүүдые наймаалалга хараалагданхай, - гэжэ Цыпилма Барасова найдуулба.
Алексей Цыденов үйлэдбэридэ хүнгэлэлтэтэй урьһаламжа банкһаа абаха тухай хэлсээнэй ажал өөр дээрээ даажа абаба. Гүрэнэй программын ёhоор, “Россельхозбанк” акционернэ бүлгэмэй Буряадай нютаг можын филиалhаа бага болон дунда олзын хэрэг эрхилэлгэдэ 244 сая түхэриг урьһаламжын мүнгэ зөөри элсүүлэгдэхэ түсэбтэй. Банкын хүтэлбэрилэгшэдтэй түрүүшын уулзалга болоо. Урьһаламжа үгэхэ эмхи зургаан “Ажур Текс” үйлэдбэриин түсэб болон мүнгэ түлэхэ арга боломжо шалгаха гэhэн шиидхэбэри абтаа.
Алексей Цыденов “Ажур Текс” ажахые дэмжэхэ талаар ажал ябуулхын хажуугаар, Буряад Уласта хони үсхэбэрилхэ ажахы хүгжөөхэ талаар тусхай зорилготой ехэ программа зохёожо, хонин hүрэг 500 мянган толгой болотор олошоруулха хэрэгтэй гэжэ тэмдэглээ. Энэ программа комплексно байха ёhотой: мяха үйлэдбэрилгэ, хонишодой буусануудые, фермернүүдэй ажахынуудые байгуулга, дэмжэлгэ гэхэ мэтэ гэжэ Толгойлогшо тэмдэглээ. Тус программа бэлдэлгэдэ эрхим мэргэжэлтэдые хабаадуулха, эндэ саг болзорто бэшэ, харин шанарайнь талада гол анхарал хандуулагдаха ёһотой гэжэ Буряад Уласай Толгойлогшын уялга саг зуура дүүргэгшэ онсолоо. Энээн тухай Буряад Уласай Засагай газарай мэдээсэлэй албан мэдээсэнэ.
Автор: Цырегма САМПИЛОВА
