​Муу арад байдаггүй, муу хүн дайралдаа

Буряад орондо олон үндэһэ яһатан эбтэй ажаһуудаг гээд мэдээжэ. Харин һаяхан болоһон юрэ бусын ушар энэ һанамжые гансата эбдэбэ бшуу. 

Табяад наһанай эхэнэр киргиз хүбүүнһээ хубсаһа худалдажа абаһан байгаа. Теэд гэртээ ерээд, тэрэнээ үмдэжэ үзэхэдэнь, таарахагүй байшоо. Һэлгэжэ үгыт, али тааруу хубсаһанай үгы һаа, мүнгыем бусаагыт гэжэ тэрэ эхэнэрэй наймаашан хүбүүндэ хандахадань, урдаһаань хараал шэрээл хэлэгдээ. Бэлин шэбшэгэй замхажа үгэхэгүйдэнь, киргиз яһатаниие бузарлажа байнаш гэжэ тэрэ хэлээдшье туршаа. Хажуудань зогсогшодой дэмжэлтэ мэдэрһэн наймаашан бүри ехээр үлүү гаража, буряадуудые элдэб эсээр хэлээ ха. Тиихэдэнь тэрэ эхэнэр сагдаада хонходохомни гэбэ. Һүүлэй һүүлдэ киргиз хүбүүн мүнгыень шэдэжэ үгэжэ, эхэнэрые доромжолһон байха юм. 

Дайн байлдаануудта хабаадаһан ветеранууд иимэ доромжолго тухай дууламсаараа, киргиз хүбүүндэ хүлисэл гуйхыень дурадхахаяа наймаанайнь газарта ошоһон байна. Наймаашан хүбүүн байрадаа үгы байшоо. Тиихэдэнь «Эб найрамдалай байшан» ошожо, тэндэ оршодог киргиз яһатанай эмхиин түлөөлэгшэдтэй уулзахаяа хүсэбэ. Болобогүй. Зүгөөр тэдэнтэй утаһаар хөөрэлдэһэн байна. Мартын 20-до үдэрэй 15 сагта «Эб найрамдалай байшанай» үмэнэ киргиз хүн бүгэдэнэй урда хүлисэл гуйха гэжэ хэлсэһэн юм. 

Хэлсэһэн сагтаа «Эб найрамдалай байшанай» дэргэдэ 200-гаад хүн киргиз хүбүүнэй хулисэл гуйхыень шагнахаяа сугларба. Тэдэнэй 30-ниинь киргиз яһанай түлөөлэгшэд байгаа. 

- Буряадта киргиз яһатан ехэ һайн ажаһууна. Энэ болоһон ушар ойлгоногүйбди. Муу арад гэжэ байдаггүй, муу хүн дайралдаа ааб даа. Ганса тэрэ хүбүүгээр киргиз үндэһэ яһатан тухай муугаар бү бодыт даа. Эблэрэел даа, - гэжэ тэндэ байһан киргиз хүбүүд уряалба. 

Хэлсэһэн болзортоо наймаашан хүбүүн ерэбэгүй. Киргиз үндэһэ яһатанай эмхиин гэшүүд Буряад Уласай засаг түрын түлөөлэгшэдтэй хамта хүлисэл хүлеэгшэдэй урда зогсожо, хөөрэлдөө хэбэ. Тэрэ хүбүүнэй орондо киргизүүдэй эмхиин түрүүлэгшэ хүлисэл гуйха хүсэлөө мэдүүлбэ. Тиихэдэнь зон буруушааба. Тэрэ киргиз хүбүүн үбдэг дээрээ байжа, хүлисэл гуйха ёһотой гэһэн һанамжашье хэлэгдээ. 

«Найрамдалай байшанай» урда сугларhан зон бүри шанга эрилтэ табижа, шууяатай болобо. Һаяын сагта тэрэ хүбүү олохобди гэжэ киргиз яhатанай эмхиин болон засаг түрын түлөөлэгшэд найдуулба. Тиихэдэньшье сугларагшад сэдьхэлээ ханабагүй. Эндэ ерэhэн сагдаанарай туhаар лэ зон тараба. Энэ зүрилдөөнэй юугээр дүүрэһэн тухай удаадахи дугаарнуудтаа мэдээсэхэбди.