​Уйдхартай зүрилдөөн

Энэ зүрилдөөнэй яагаад түгэсэһэн тухай дуулгахабди гэжэ урдахи дугаартаа бэшээ һэмди.

Байлдаануудта хабаадаһан хүбүүд Владимир Анганов (дал­да нэрэнь Ваха) түрүүтэй Араду­удай найрамдалай байшанай дэр­гэдэ киргиз хүбүүнэй зоной урда хүлисэл гуйха тухай асуудал табижа, хүлгөө гаргаһанайнь удаа олондо мэдээсэл тараадаг хэрэгсэлнүүдтэ янза бүриин һанамжанууд ябаа һааб даа. Тэрэ шанга хөөрэлдөөндэ хабаадаһан Буряад Уласай Толгой­логшын болон Засагай газарай за­хиргаанай хүтэлбэрилэгшын орлог­шо Михаил Харитоновой хэлэһээр, киргиз хүбүүн бэеэ нюуһан зандаа. Харин доромжолуулһан эхэнэрые худалдаа наймаанай түбэй захирал Максим Лучин бэдэржэ олоходонь, юушье хэлэхэгүйб гэһэн байна. Кир­гиз хүбүүнтэй урда урдаһаань харал­суулжа хөөрэлдүүлхэ түсэбтэй бай­гаа ха.

Худалдаа наймаанай түбтэ хүдэлдэг зоной тэмдэглэһээр, кир­гиз хүбүүн хоёр жэлэй туршада эндэ наймаа хэнэ. Олон үгэгүй, ажалша хүн юм. Урда тээнь хүнүүдтэй хэрэл­дэжэ байгаагүй.

Буряадта ажаһуудаг киргиз яһатанай «Ала-Тоо» гэһэн ниитын эмхиин түрүүлэгшэ Шакир Омонов энэ хүбүүнэй түлөө иигэжэ хүлисэл гуйба:

- Нютагайнгаа хүбүүнэй аягүй ааша гаргаһанайнь түлөө хүлисэл гуйнабди. Харюусалгаһаа айжа, бэеэ нюуһаниинь эрэ хүнэй түхэлгүй байһыень гэршэл­нэ гэжэ шүүмжэлнэбди. Гайха­жа баранагүйбди. Нэрыемнай хухалһан нэгэ хүнэй ябадалаар бүхы киргизүүд тухай муугаар бү бодыт даа.

Энэ ушарһаа боложо, хани бари­саамнай эбдэрхэ ёhогүй гэжэ найда­набди.

АВТОРАЙ ЗҮГҺӨӨ:

Мүнгэнэй түлөө мүрөө алдаһан киргиз хүбүүн үнэхөөрөөшье шүүмжэлэгдэхээр лэ байна. Теэд хоёр хүнэй хэрэлдэһэн ушар зар тунхаг боложо, уласхоорондын хэмжээндэ хүрэбэ бшуу. Энэ ушарһаа хэшээл абажа, саашадаа бэе бэеэ хүндэлэн ябая!

Сарюуна ЭРДЫНЕЕВА