«Байгал далай: Агууехэ гүрэнэй ехэ нуур» гэһэн түсэлэй хэмжээн соо Эрхүү можоһоо болон Буряад Уласһаа дурадхалнуудые суглуулгын эхин хэмжээн эсэстээ хүрөө. Байгалай оршон тойронхиие хүгжөөлгын хараа шэглэлнүүд болон үндэһэн түсэл бэелүүлгын талаар түрүүшын дүнгүүд тухай Ородой Холбоото Уласай Засагай газарай дэргэдэхи Шэнжэлэгшэдэй түбэй мэргэжэлтэн Денис Ершовтой хөөрэлдэбэбди.
- Денис Сергеевич, түсэлэй хэмжээн соо «Аяншалга: байгаалияа хамгаалангаа эдэй засаг хүгжөөнэбди» гэһэн шэглэлые даажа ябанат гэжэ мэдэнэбди. Түрүүшын дүнгүүд тухайнь танай һанамжа.
– Олзын хэрэг эрхилэгшэд, олониитын хүдэлөөнүүд болон гүрэнэй алба хаагшад тон ехэ хүдэлмэри хээд байна. Буряад Уласай болон Эрхүү можын зүгһөө олон тоото түсэбүүдые, үүсхэл болон дурадхалнуудые абаад байнабди. Байгаали хамгаалгын, олзын хэрэг эршэдүүлгын болон түсэл бэелүүлгэдэ нютагай зоной хабаадалгын талаар ехэ зохистойгоор түсэлнүүд зохёогдонхой гэжэ һананаб. Мүнөө тэдэнээ федеральна зургаануудтай зүбшэжэ байнабди. Апрель һарада түсэлэймнай паспорт бэлэн боложо, гүрэнэй хүтэлбэрилэгшэдэй урда табигдаха.
– Дурадхаһан үүсхэлнүүдые яагаад шэлэнэбта?
– Энэ мүрысөөн бэшэ. Тиимэһээ паспорт бүридхэхэдөө, бултанай һанамжа хараадаа абанабди. Энэ түсэлые саашадаа бэелүүлхээр бэлэн байгуулга болон хүнүүд дурадхалнуудаа эльгээнэ ха юм. Олоной зүбшэлгэ дабаһан түсэл болохо. Ганса гүрэнэй засаг зургаанууд хоорондо харилсана бэшэ, мүн хабаадаха таланууд, тэрэнэй тоодо олзын хэрэг эрхилэгшэд болон олониитын хүдэлөөнүүд, эб хамта хүдэлнэ гүб даа.
– Гүрэн түрын ба олзын хэрэг эрхилэгшэд яагаад үүргэнүүдээ хубаанаб?
– Олзын хэрэг эрхилэлгэ хадаа гол ябаса дааһан хүсэн гэхэдэ болоно. Харин гүрэнэй үүргэ болбол тааруу эрхэ нүхэсэл, хуули хубилгаха, олзын хэрэг эрхилэлгэ дэмжэхэ оршон байгуулха мүн. Тиимэһээ саашадаа нютагай зоной эдэбхи үүсхэл хараадаа абан, олзын хэрэг эрхилэгшэдые хабаадуулха хүсэлтэйбди.
– Тиихэдэтнай Буряадай ажаһуугшад юу абахаб?
– Гол түлэб ажалтай болохо. Мэргэжэлтэд лэ хүдэлхэ аргатай байха. Тиимэһээ мэргэжэл олгохоор нэмэлтэ оршон байгуулхабди. Байгалай эрье дээрэ үни сагһаа олзын хэрэг эрхилжэ байһан зон ажалаа үргэлжэлүүлхэ аргагүй болошоод байна гээд ойлгонобди. Түсэлэймнай нэгэ зорилго хадаа хуулиин һаад ушаруулгые усадхан, оршон байгаалидаа гамтайгаар эдэй засаг хүгжөөхэ хэрэгтэй болоно. Мүнөө байгаа олзын хэрэгүүдые бүри үндэр шатада гаргаха гү, али шэнэ шэглэлнүүдые нэбтэрүүлгын арга боломжонууд үгтэхэ юм.
– Энэ түсэлэй хэмжээн соо олзын хэрэг эрхилэлгэ гүрэнэй талаһаа ямар дэмжэлтэдэ хүртэхэ болоноб?
– Байгуулга бүхэн хубиингаа тала хангажа шадаха гэжэ хүлеэһэнэй хэрэггүй. Гүрэн түрэ хадаа бүхы байгаа олзын хэрэг эрхилэлгэдэ тааруу нүхэсэл байгуулхаяа оролдохо. Аяншалгын хэрэгтэ хуулинууд һаад хэбэлнь, шанараа үргөөд, уласхоорондын хэбээр хүдэлэел. Гүрэн түрэ имагтал саашанхи үе зон тухай һанаата болоно. Олониитын хүдэлөөнүүд байгаали хамгаалгын бэрхэшээлнүүдтэ хубитаяа оруулхал хүсэлтэй. Харин олзын хэрэг ябуулагшад өөрын хараа бодолтой. Бидэ бүхы үүсхэлнүүдые шагнанабди.
– Регион хоорондын түсэл һэн тула яагаад бүхы нютаг можонуудай тала хараадаа абахабта?
– Байгалай дэбисхэртэ аяншалга хүгжөөлгын талаар нэгэ гол бодолго байгуулха хүсэлтэйбди. Нэгэ гурим зохёогоогүй һаа, юуншье хэгдэхэгүй. Бүхы 3 субъект зүбшөөлөө үгэхэ ёһотой. Аяншалагшадые олошоруулха тээшэ бүхы арга боломжонууднай шэглүүлэгдэнхэй. Ерэһэн зонтой эмхитэйгээр хүдэлхэ хэрэгтэй. Аяншалгаһаа орохо олзо оршоёо дээшэлүүлхээр бүхы юумэн бии. Тиигээл һаамнай, гүрэн түрэ бидэн руу анхаралаа табихал даа.
– Мүнөө дээрээ экологиин талаар хүршэ Монголтой болон Хитадтай хоорондохи харилсаан үргэдхэгдэнэ. Имагта Сэлэнгэ мүрэндэ Монголой ГЭС бариха тухай хөөрэлдөөн болоно. Та энээн тухай юун гэжэ хэлэхэ байнат.
– Тогтууритай хүгжэлтын зорилго гэбэл, уласхоорондын бүлэгүүдые энэ ажалда хабаадуулга юм. Манай ба тэдэнэй экологидо нүлөөлхэ талаар Монголтой ба Хитадтай хоорондохи харилсаанай механизмуудые бүрилдүүлхэ ба хамтын шиидхэбэринүүдые абаха хэрэгтэй байна. Байгалай экологи болбол тэдэнэй экологиһоо ехэ дулдыдана. Тэдэнэй уһа голоо бузарлахадань, манай талада бүри ехэ хойшолонтой.
– Ород гүрэндэ иимэрхүү зүрилдөөтэй уласхоорондын асуудалые шиидхэхэ ямар жэшээ байнаб?
– Хилэ залгаа хамтын харилсаанай ямар һайн таланууд байнаб гэбэл, хоёр гүрэнэй хоорондохи программа хүтэлхэ нэгэ зургаан байгуулха түхэлөөр хүдэлжэ һураха нэгэ жэшээ байна. Жэшээнь, Ород гүрэн – ЕС, Финляндитай, Прибалтикатай, Балтиин далайн талаар харилсаха ажал ябуулагдана. Тэрэ үльгэр жэшээ абажа, иишэнь нэбтэрүүлхэ хэрэгтэй. Тиигэжэ 3 гүрэнэй нэгэ жаса бүрилдүүлжэ, хоорондоо зүбшэн хэлсэһэн түрүү ээлжээнэй түсэлнүүд һомологдоно. Хилэ залгаа харилсаан болбол Эдэй засагай хүгжөөхэ яаманай эрхэ мэдэлэй, тэдэнэр энэ ажал эрхилдэг, мүнөө дээрээ тиимэ программа дээрэ ажаллана.
– Хитадай аяншалга эмхидхэдэг эмхинүүдтэй ажал яажа зохёогдохоб? Байгалда аяншалга хүгжөөлгэ ажаглахада, эхи гуримтай гэжэ хэлэхээр бэшэ.
– Гадаад ороной аяншалагшадай гаргашын ехэнхи хубинь тэндэхи нютаг ороной дэбисхэртэ үлэхэ эрхэ нүхэсэл байгуулха шухала. Гадаадын аяншалгын эмхинүүдэй болон гадаадын хүрэнгэтэй аяншалгын компанинуудай ажаябуулга тодорхой гуримтай байха ёһотой. Энэ хадаа экологиин асуудалай нэгэ хэсэгынь болоно. Аяншалгаһаа ороһон ямар нэгэ нэмэлтэ олзо оршо экологиин асуудалда шэглүүлэгдэжэ болоно.
– “Байгал: агууехэ гүрэнэй ехэ нуур” түсэл танай хубида хэр һонирхолтой бэ?
– Ехэ һонирхожо байнаб. Ехэ шухала байһые мэдэржэ байнаб. 2016 оной октябрь-ноябрь соо намайе аяншалгын шэглэлэй ударидагша болгожо томилогдоһон байгааб. Тиихэдэ энэ ажалые һайн ойлгонгүй, боломжыень сэгнээгүй байгааб. Мүнөө дээрээ энэ түсэлдэ оролсогшодто аюултай талыень бэшэ, харин ашаг талыень һанаандаа абахыень уряалжа байнаб. Аяншалга болбол асари ехэ олзо оруулха ори ганса һалбари гээшэ. Нэгэ сая ороһон түхэриг хадаа хажуугай һалбаринуудта үшөө сая хахад түхэригэй олзо бшуу.
– Буряад орон ба Байгал танай һанаанда ямаршуу мэдэрэл түрүүлнэ бэ?
– Буряадта би анха удаа ерээб. Һайхан мэдэрэл түрэжэ байна. Толгойдо юун ороодхиноб гэхэдэ, заха хизааргүй орон зай, тэрэнэй саана ехэ хүсэ шадал ба хүгжэхэ боломжо. Байгал хаража, Байгалай агаараар амилжа байхада, шадал орохо газар байна гэжэ мэдэрнэш. Эндэ эди шэди байна. Тиимэһээ энэ газар һалбараг лэ!
“Байгал: агууехэ гүрэнэй ехэ нуур” гэһэн программа 2О17- 2О25 онуудта бэелүүлэгдэхын тула Байгалай тусхай зорилгото федеральна программануудые нэгэдүүлхэ юм. Тус түсэл болбол Эрхүү можо, Буряад Улас б а Үбэр Байгалай хизаар гурбаниие багтаажа, экологиин ба эдэй засагай аятай зохид бүһэлүүр зохёохо нэгэ байгуулга бии болгохо зорилготой юм.