«Аюулгүй, һайн шанартай харгынууд» гэһэн гүрэнэй программын хэмжээндэ Буряад Уласай харгынууд заһабарилагдахань.
Буряад Уласай Толгойлогшын уялга саг зуура дүүргэгшэ Алексей Цыденовэй оролдолгоор тус программада манай Буряад орон түрүүшынхиеэ хабаадуулагдаба гээшэ. Тэрэнэй хэмжээндэ гүрэнэй һангай жасаһаа 625 сая түхэриг һомологдохо, мүн нютаг можын өөһэдын жасаһаа бусад мүнгэниинь гаргашалагдаха. Мүнөө жэлдэ энэ хэрэгтэ хамта дээрээ 1 миллиард 250 сая түхэриг гаргашалагдаха түсэбтэй.
- Заһабарилагдаха гол харгынууд гэхэдэ, ниитын унаагай ябадаг магистральна удха шанартай харгынууд. Улаан-Үдэ хотоһоо хэдэн тээшээ 60 модо харгынуудта түхэреэн сүүдхын хугасаада хүн зон үргэлжэ унаагаар ябажал байдаг болонхой. Тиимэһээ тус программын бэелүүлэгдэхэдэ, муу харгынууд үсөөн болохо, - гэжэ харгын ажахын сайдай уялга дүүргэгшэ Сергей Козлов мэдээсэбэ.
Тус программын ёһоор, 500 мянгаад ажаһуугшадтай хото, һууринуудай харгынууд заһабарилагдаха. Тиимэһээ Улаан–Үдэ хотын болон эндэ дүтэ оршодог Ивалга, Загарай, Тарбагатай болон Байгал шадарай аймагууд энэ программада хабаадалсаха болоно.
Программа байгша онһоо 2025 он хүрэтэр бэелүүлэгдэхэ, бүхыдөө энэ хугасаада 11 миллиард 250 сая түхэриг гаргашалагдаха юм. Гүрэнэй эрилтэнүүдтэ харюусадаггүй муу шанартай харгынуудай хахадынь 2018 он хүрэтэр заһабарилагдаха, харин 85 хубинь 2025 он хүрэтэр һайжаруулагдаха.
- Мүнөөдэрэй байдалаар, харгынуудай нэрэнүүдые һэлгэхэ, гэрэлтүүлхэ, ябаган харгынуудые заһабарилха болон бусад ажалнуудые бүтээхэ тухай мянга гаран мэдүүлгэнүүд оронхой. Тэдэ һанамжануудые бултыень шэнжэлээбди, тон түрүүн бүтээгдэхэ шухала ажалнууд гэхэдэ, 100-дахи кварталнууд болон Вахмистрово тээшэ ошохо харгы, Пищевая үйлсын, Восточный микрорайондохи харгынууд заһабарилагдаха, - гэжэ сайдай уялга дүүргэгшэ тобшолбо. Харгын аюулай ушардаг газарнуудые заһаха ажал ябуулагдаха. Иимэ 17 газарнууд элирүүлэгдэнхэй.
Заһабарилгын ажал дүүргэхэ эмхинүүдые шэлэлгын аукционууд май һара хүрэтэр үнгэргэгдэхэ ёһотой, юуб гэхэдэ, сагай уларилай дулаархалаар, ажал эхилхэ болоно. Тус ажал сентябрь – октябрь һарада түгэсэхэ ёһотой. Апрель һарын тэн болотор энэ асуудалаар ниитын уншалганууд үнгэргэгдэхэ, харин майн 1 болотор мэдүүлгэнүүдые оруулжа болохо. Гэхэ зуура, дүүргэгдэһэн ажал, тэрэнэй шанар саг үргэлжэ шалгагдажа, хинагдажа байха юм.