Саяан хадын хормойдо эмхидхэгдэһэн һур харбалгаар уласай хэмжээнэй мүрысөөн үнгэрһэн долоон хоногой эсэстэ Түнхэн аймагай Аршаан һууринда 10-дахияа үнгэргэгдэбэ.
Арба гаран жэлэй саана Түнхэндэ һоригшоор хүдэлхэеэ Сэсэг Петровна Доржиева наһанайнгаа нүхэр Игорь Николаевичтай нүүжэ ошоһон байна. Тиигэжэ Аршаан һууринда һур харбалгаар һорилгонууд эхилээ. Доржиевтанай гэр бүлэ энэ хугасаа соо олон тоото бэрхэ тамиршадые бэлдээ. Янжина Доржиева, Соёлма Сыренова болон бусад харбагшад нютагаа холо ойгуур суурхуулжа, бүхэроссиин болон уласхоорондын мүрысөөнүүдтэ шалгарһан байна. Март һарын эхиндэ Сэсэг Петровнагай үшөө нэгэ шаби Виктория Харитонова Европын чемпионадта амжалтатайгаар хабаадажа ерээ. 1997-2002 онуудай залуу тамиршадай мүрысөөндэ Виктория мүнгэн болон хүрэл медальнуудта хүртөө. Уридшалан хэлэбэл, энэшье мүрысөөндэ Виктория гэжэ нэрэеэ даажа, илалта туйлаба.
Аршаанда болоһон энэ мүрысөөндэ Буряад Уласай болон Эрхүү можын 269 эдир тамиршан хабаадаба. Тэдэ гурбан наһанай бүлэгтэ хубааран мүрысөө гээд хэлэлтэй.
1999-2002 оной тамиршадай дунда Улаан-Үдэ хотын Батор Маланов түрүүлжэ гараа. 2003 оной харбагшадай дунда Эрхүү можын Никита Коковин болон Арина Добрынина гэгшэд чемпионууд боложо тодороо. 13-һаа доошо наһатай үхибүүдэй дунда Улаан- Үдын Кира Багаева болон Эрхүү можын Егор Копачев нэгэдэхи һуури эзэлээ.
Командна тоосоондо СДЮСШОР №10, РСШОР, СДЮСШОР №9, Сэлэнгэ аймагай болон Эрхүүгэй “В яблочко” гэһэн команданууд түрүүшын һууринуудые эзэлһэн байна.
Энэ мүрысөөгөөр һур харбагшадай үбэлэй халаан дүүрээгүй. Апрелиин 6-да Улаан-Үдэ хотодо “Динамо” - Ородой үхибүүдтэ” гэһэн уряа доро ээлжээтэ мүрысөөн үнгэргэгдэхэ. Тиигээд лэ бүхы һур харбагшад зунайнгаа һорилгонуудые эхилхэ.