Ородой Холбоото Уласай Юрэнхылэгшын тогтоолой ёһоор үгтэдэг грантын асуудалнуудаар семинар Буряадай олониитын танхим эмхидхэһэн байна. Буряад Уласай 50 гаран коммерческэ бэшэ эмхинүүдэй 100-гаад түлөөлэгшэд эндэ хабаадаа. Грантын гол зорилгонууд, мүн тэрэниие хубааха талаар хубилалтанууд тухай семинар эмхидхэгшэ, «Ородой Ректорнүүдэй зүблэл» гэһэн Бүхэроссиин олониитын эмхиин грантнуудые хүтэлхэ захиргаанай мэргэжэлтэ Алексей Поляков (Москва хото) хөөрэжэ үгэбэ.
- Алексей Сергеевич, хубилалтанууд тухай хөөрэжэ үгыт.
- Минии түлөөлдэг Бүхэроссиин Ректорнүүдэй зүблэл грантоператорнуудай тоодо грантнуудые хүтэлбэрилдэг гэжэ мэдээжэ. Байгша оной апрель һараһаа гансал оператор юрэнхылэгшын грантнуудые хүтэлбэрилдэг болохо. 2017 ондо грантнуудые хубаалга тухай юрэнхылэгшын тогтоол дотор тэрэ операторай үүргэ болон арга боломжонууд тухай бэшэгдэхэ. Энэ данса эдэ үдэрнүүдтэ бэлэн болохо гэжэ хүлеэжэ байнабди.
- Ямар ушарһаа иимэ хубилалта оруулагдааб?
- Бүхы хубилалтанууд дээрэһээ эхитэй. Мүнөө дээрээ хүдэлжэ байгаа операторнуудай нэгэн лэ юрэнхылэгшын грант хубаалгын үүргэ даажа абаха болоно. Саашанхи ажаябуулга тухай захиралнай зүбшэжэ байна. Энээн тухай тодорхойгоор шэнэ тогтоолһоо мэдэжэ абахабди.
- Энэ хубилалта грантда хүртэгшэдтэ нүлөөлхэ гү?
- Тэдээндэ бүри хүнгэн болоно ааб даа. Һайн тээшээл хубилалтанууд болоно.
- Буряадта үнгэргэгдэһэн семинарай гол зорилго ямар бэ?
- Бидэ энээниие Буряадай олониитын танхимай үүсхэлээр эмхидхээбди. Мэдээсэлэй, һуралсалай шэнжэтэй байгаа. Яажа ниигэмэй байдалда нүлөөлһэн түсэлнүүдые зохёожо бэелүүлхэб гэжэ харуулхые оролдонобди.
- Буряадай коммерческэ бэшэ эмхинүүд мүнөө юугээр һонирхоноб?
- Бүхы семинарнуудта ходол табигдадаг асуудалнууд – бюджедтэ юу оруулха хэрэгтэйб, юу оруулхагүйб? Дахинаа грант абалгын мүрысөөндэ хабаадажа болохо гү? Яагаад тоосохоб г.м.
- Грант абахаяа хүсэгшэдтэ та юу дурадхаха байнабта?
- Нэн түрүүн хабаадахаяа бү айгты. Туршаха хэрэгтэй. Тиигээл һаа, зүб, буруу талануудыень мэдэдэг болохот. Танай түсэл сэгнэгшэд гол түлэб олониитын хэрэгтэ туһатай талыень хараадаа абаха гэжэ ойлгохо хэрэгтэй. Юу хүсэнэбта, яагаад бэелүүлхэбта, ямар дүн байхаб гэһэн гурбан асуудалда түсэл харюусаха ёһотой. Үшөө анхархаар юумэн гэхэдэ, үйлэнүүд тус тустаа яажа, хэзээ, юунэй түлөө бэелүүлэгдэхэб гэжэ дэлгэрэнгыгээр бэшэхэ хэрэгтэй.
Тусхай мэдээн:
Ниигэмдэ туһатай хэрэг эрхилдэг аралжаанай бэшэ эмхинүүдые гүрэнэй дэмжэлтээр хангахын тулада Ородой Холбоото Уласай Юрэнхылэгшын тогтоолой ёһоор жэл бүри грантда хүртэхын түлөө мүрысөөн соносхогдодог. 2О16 ондо 157О4 мэдүүлгэ ороо, хамта дээрээ 4 млрд.59О сая түхэригэй 1581 түсэл шэлэгдэһэн байна.