​Эстрадын дуушан Вера Шобосоева: «АРАДАЙНГАА ХУБСАҺА АЛДААГҮЙБДИ»

Буряадай эстрадын одон Вера Шобосоева һаяхан Интернет соохи олон ниигэмэй холбоо­ной “Россия” гэһэн бүлгэмэй хэмжээндэ арадай хубсаһанай мүрысөөндэ хабаадажа, шангай һуури эзэлһэн байна.

Мэдээжэ дуушанай хэлэһээр, тус хэмжээ ябуулга мар­тын эхиндэ соносхогдожо, оройдоол хэдэн үдэрэй тур­шада үнгэргэгдөө.

- Эндэ хабаадахын тула арадай хубсаһа үмдөөд байһан һайхан гоё зураг эльгээхэ хэрэгтэй байгаа. Мүрысөөнэй һүүлшын үдэр болотор хүлеэгээд, хүн зоной буряад хубсаһа эльгээхэгүйдэнь, өөрынгөө зурагуудые ябуул­жархёоб. Тэндэ шүүхэеэшье һанаагүйб. Нэн түрүүн бу­ряад угсаатан өөрынгөө ёһо заншал, хубсаһа хунараа алдаагүй юм гэжэ харуулхаа һанааб, - гэжэ Вера Шобо­соева хөөрэнэ.

Вера хадаа мүрысөөндэ гурбан зурагуудые эльгээһэн байна. Хоёр зураг дээрэ тэрэ буряад арадай хубсаһа үмдөөд байна. Үшөө тиихэдэ хүхэ үнгэтэй буряад маяг­тай (стилизованно) хубсаһа харуулаа. “Эгээл тэрэ хүхэ хубсаһыемни эмхидхэгшэд шэлэн абажа, намда шангай һуури олгогдоо”, - гээд дуушан баярлана.

Вера Шобосоева бага балшар наһанһаа уран гоёор зу­радаг юм. Түрэл һургуулидаа Гомбо Сыренович багшын ударидалга доро элдэб хүүхэлдэйнүүдые болон тэрээн­дээ һайхан платинуудые зурадаг байгаа.

- Энэ бэлиг шадабарияа эстрада дээрэ гаража, дуу­шан болоод ябахадаа, бүримүһэн хэрэглээб. Тайзан дээ­рэ гараха бүхы хубсаһаяа түрүүн өөрөө зуранаб. Удаань тэдэниие оёдолшод бүтээнэ. Сүлөө сагай байгаа һаа, өөрөөшье оёхо байнаб, - гэжэ Вера Шобосоева хөөрөөгөө үргэлжэлүүлнэ.

Дууша басаганай хэлэһээр, ганса гоёор зурадагаа бэшэ, мүн шүлэг бэшэдэгээ, хүгжэм зохёодогоо ехээр хүнүүдтэ хэлэдэггүй байгаа. Эгээл мүнөө дуулажа эхил­хэдээ, бүхы талаан бэлигээ элсүүлжэ, Буряадай эстра­дын түрүүшүүлэй тоодо ороо гэхэдэ, алдуу болохогүй.

Вера Шобосоева түрэл Түнхэн нютагайнгаа буряа­дуудай хубсаһа мүнөө сагай эрилтэдэ тааруулжа, гоё дизайнтай хэдэн зурагуудые бэлдээд байна. Тэдэниие бүтээхэ гэхэдэ, мүнгэ зөөри дуталдана. Тиигэбэшье Вера Шобосоевагай хүсэл заабол бүтэхэ бэзэ гээд найдагдана.