843
Апрелиин 21-22-ой үдэрнүүдтэ санаар Байгалай марафон 16-дахияа Максимиха һууринай дэргэдэ үнгэргэгдэхэнь.
Байгал далайн мүльһэн дээрэ хабаадагшад 5 модо утатай зай арба тойродог. Санашадай ябадалда мүльһэнэй бутархай туһатай байдаг, тэдэ улам хурдан боложо гүйлдэдэг. Мүнөө жэлэй урилдаанда Улаан-Үдэһөө гарбалтай, мүнөө Хакаси улас түлөөлдэг, Ород гүрэнэй мүрысөөндэ шанда хүртэһэн Дина Головань, Ородой Холбоото Уласай санаар үнгэргэгдэдэг мүрысөөнүүдтэ нэгэнтэ бэшэ шанда хүртэһэн Иван Гуляев, дэлхэйн чемпионадта хабаадаһан Андрей Мельниченко гэгшэд хабаадаха юм. Сочи хотодо үнгэргэгдэһэн Олимпиадын мүнгэн медальда хүртэһэн Александр Бессмертных хабаадаха хүсэлтэй байһанаа мэдүүлэнхэй. Буряад Уласай мэдээжэ санашан Алиса Жамбалова энэ марафондо хабаадалсаха юм. Ородой Холбоото Уласай Паралимпийска суглуулагдамал команда Байгалай марафондо хаба шадалаа туршалсаха. Энэ урилдаанда 300-аад спортсменүүд хабаадаха болоно.
Байгалай марафон “Russialoppet” гэһэн Бүхэроссиин санаар урилдаанай литэдэ ородог юм. 2016 ондо үнгэргэгдэһэн энэ хэмжээ ябуулгада хоёр дахин Олимпиин наадануудай чемпион болоһон Юстина Ковальчик хабаадаһан байна гэжэ һануулнабди. Олимпиин наадануудай түрүү һуури эзэлэгшэд Светлана Нагейкина болон Наталья Баранова гэгшэд хүндэтэ айлшад болоһон байна.
Максимиха һууринда энэ мүрысөөн эмхидхэгдэхэ юм. Апрелиин 21-дэ марафон нээлгын баяр болохо, удаань санашад спринт гүйлдэхэ. Апрелиин 22-то марафон үнгэргэгдэхэ гэжэ Буряад Уласай Спортын болон залуушуулай бодолгын талаар яаман мэдээсэнэ.
