681
Буряад Уласай Толгойлогшын Уялга саг зуура дүүргэгшэ Алексей Цыденов Засагай газарай Түрүүлэгшын эдэй засагай хүгжэлтын талаар орлогшын тушаалда Игорь Зураевые томилһон тухайгаа сүлжээндэ мэдээсэбэ.
Буряад Уласай Толгойлогшын уялга саг зуура дүүргэгшэ Алексей Цыденов Засагай газарта хүдэлхэ хүниие шэлэхэдээ, хүнэй мэргэжэлэй талаар шадабари хаража, ондоо хүнүүдэй зууршалһанииие хараадаа абангүй тушаалда томилдог тухайгаа тэмдэглээ гэжэ «Буряад Үнэн» хэблэлэй байшан мэдээсэнэ.
- Уласай прокуророй зууршалгаар Игорь Зураев энэ тушаал эзэлбэ гэжэ олондо мэдээсэл тараадаг хэрэгсэлнүүдэй дунда үгэ гаранхай. Энээниие эли болгохоо һананаб. Али нэгэ тушаалда томилхо хүнүүдые намда мүнөө олоор дурадхана. Эндэ ганса уласһаа бэшэ, харин Москваһаа, федеральна засаг зургаануудһаа дурадхалнууд ороно. Би хүнэй ажалдаа мэргэжэлэй талаар шадабари, хэжэ байһан ажалдаа хандасыень болон Буряад Уласһаа гарбалтай байгаа һаань - тэдэ хүнүүд түрүүлэн байха юм. Түрэл гаралай, нэгэ нютагай, “өөрын хүнүүд” гэхэ мэтэ намда огто таарадаггүй. Хүнэй аша үрэтэйгөөр, хэжэ байһан ажалдаа мэргэжэнги байгаа һаань, тэрэнэй түрэл гаралай харилсаан намайе hонирхуулнагүй. Уласай хүгжэлтэдэ үрэ дүнтэй хүдэлхэ талань эгээл шухала,- гэжэ Алексей Цыденов интернедтэ өөрынгөө хуудаһан дээрэ бэшэбэ.
Буряад Уласай Толгойлогшын уялга саг зуура дүүргэгшэ Алексей Цыденов Игорь Зураевые Засагай газарта хүдэлхыень уриһан тухайгаа дуулгаба. Үшөө тиихэдэ, олондо мэдээжэ Алексей Зарубинай баһал Засагай газарта хүдэлхөөр уригдаһан тухай, интернедтэ тэрэнэй хуудаһан дээрэ Игорь Зураевые Буряад уласай прокурор Валерий Петров зууршалаа гэһэн мэдээсэл гараһан тухай тэмдэглэбэ.
- Хүнүүдэй дурадхалнуудые хараада абангүй, Игорь Зураевые Засагай газарта хүдэлхыень уриһан байнаб. Буряад Уласта эдэй засагай хүгжэлтэ олзын хэрэг эрхилэлгэһээ дулдыдадаг. Игорь Зураевай ерэһээр худалдаа наймаанай- үйлэдбэриин палатын ажал эршэдээ, энээн тухай олзын хэрэг эрхилэгшэд тэмдэглэнэ. Мүнөө Игорь Зураевай кандидатура тусхай зүбшэл гаража байна. Алексей Зарубиниие баһа уриһан байнаб . Тиихэдээ, тэрэ хүн хэнһээ ерээ гээшэб? – гэжэ Алексей Самбуевич асууна.
Нэгэ үдэр урид Игорь Зураев Facebook хуудаһандаа бэшэһэн байна:
- Буряад Уласай Толгойлогшын уялга саг зуураа дүүргэшэ Алексей Цыденовэй дурадхалһаа арсахань буруу гэжэ һананаб. Энэ тушаалда намай хэншье зууршалаагүй. Буряад Уласта Засагай газартай болон олзын хэрэг эрхилэгшэдтэй хүдэлхэдөө ядалданагүйб. Хоб -жэб гаргангүй, хамтын хүсөөр, хүн бүхэн өөрынгөө һуурида ажалаа ябуулжа, олон зүрилдөөтэ асуудалнуудые шиидхэхэ шухала. Намайе дэмжэһэн нүхэдтэ бултандань баярай үгэнүүдые хэлэнэб,- гэжэ Игорь Зураев өөрынгөө хуудаһан дээрэ бэшэбэ.
Алексей Цыденовэй Facebook хуудаһанһаа гэрэл зураг абтаба.
