988
Оперо болон баледэй театрта СССР-эй арадай артист Ким Базарсадаевай нэрэмжэтэ Дуушадай уласхоорондын мүрысөөн 5- дахияа үнгэргэгдэбэ.
Мүнөө жэлдэ энэ мүрысөөндэ Ородой Холбоото Уласай болон Монгол ороной 15 дуушад хабаадаба. Буряад Уласай Засагай газарай дэмжэлгээр, Соёлой яаман, Буряадай оперо болон баледэй театр, СССР-эй арадай артист К. Базарсадаевай нэрэмжэтэ соёлой жаса энэ хэмжээ ябуулга эмхидхэбэ. Энэ мүрысөөндэ оперо болон баледэй тетрай дуушан Михаил Пирогов гран-при шанда, лауреадай нэрэ зэргэдэ хүртэбэ. 1-дэхи шатын дипломуудаар лауреадууд болоhон Мэргэн Санданов, Дашноров Эрдэнэ-Очир гэгшэд шагнагдаба. 2-дохи шатын дипломдо, лауреадай нэрэ зэргэдэ Дорж Цэдэн Бат-Эрдэнэ хүртэбэ. 3-дахи шатын дипломоор баhал лауреат боложо тодорhон Анатолий Бадаев шагнагдаба. Удаань дипломантын нэрэдэ хүртэһэн 1-дэхи шатын дипломуудта Очирсайхан Эрдэнэ, Сергей Хмелевский гэгшэд, 2-дохи шатын дипломдо Ценд-Аюш Амарболд хүртэбэ. Дипломантын нэрэ зэргэдэ хүртэһэн Далай Жаргалов “Надежда” гэһэн шанда хүртөө. «Эрхим концертмейстер» гэһэн нэрэ зэргэдэ Саян Манжигеев, Тулгабат Энхгуул гэгшэд хүртэбэ. СССР-эй арадай артист Г. Ц. Цыдынжаповай нэрэмжэтэ оперо болон баледэй театрай захиралай болон уран һайханай хүтэлбэриин тусхай шанда Мэргэн Санданов хүртэһэн байна. Ким Базарсадаевай тусхай шанда болон лауреадай нэрэ зэргэ Буяндалай Жавхалантугс гэгшэдэ олгогдобо. Баталан хамгаалгын болон аюулгүйе сахилгын федерациин зүблөөнэй хорооной түрүүлэгшын орлогшын Б.Б. Жамсуевай тусхай шанда Михаил Пирогов хүртэбэ.
Ородой Холбоото Уласай арадай артист, Буряадай оперо болон баледэй театрай уран һайханай хүтэлбэрилэгшэ Юрий Лаптев, Ородой Холбоото Уласай габьяата артист, Красноярск хотын оперо болон баледэй театрай ахамад дирижер, хүгжэмэй талаар хүтэлбэрилэгшэ Анатолий Чепурной, Монголой соёлой эрхим хүдэлмэрилэгшэ, “Алтан гадаһан” орденой кавалер Балганцурэнгийн Эрдэнтуя, Ородой Холбоото Уласай габьяата артист, Буряадай оперо болон баледэй театрай дуушан Дамба Занданов, харагшадтай ажал ябуулгын талаар театрай захиралай орлогшо, хүгжэм шэнжэлэгшэ Давид Дондупов, Буряад Уласай арадай артистка, оперо болон баледэй театрай дуушан Эржена Базарсадаева, Буряад Уласай габьяата артист, Сэрэгэй баруун тойрогой дуу, хатарай ансамблиин дуушан Саян Базарсадаев гэгшэд энэ мүрысөөнэй жюриин гэшүүд байгаа. Мүрысөөнэй һүүлээр, гала-тоглолто эмхидхэгдээ. Тоглолтын эхиндэ Буряад Уласай Соёлой сайдай уялга дүүргэгшэ Тимур Цыбиков амаршалгын үгэ хэлэһэн байна.
- Ким Базарсадаев – гайхалтай хуби заяатай, хүсэ шадалтай хүн байгаа. Тэрэ Ород гүрэндэ, Буряад Уласта мэргэжэлтэ хүгжэмэй хүгжэлтэдэ хубитаяа оруулһан хүн. Энэ мүрысөөндэ илагшад өөhэдынгөө түрэл нютагуудые холо ойгуур суурхуулжа ябана ха юм. Мүнөө эндэ хабаадаһан эрэшүүл Ким Иванович Базарсадаев мэтэ нэрэеэ дээрэ нэрлүүлжэ ябаха байха гэжэ этигэнэб,- гэжэ сайд хэлэбэ.
Үнгэргэгдэһэн тоглолтодо хабаадагшадһаа гадна тус конкурсын түрүүшын илагша Бадма Гомбожапов, Дамба Занданов, Монголой гүрэнэй оперо болон баледэй театрай дуушан Балгансурэн Эрдэнтуя, Монголой айлшан Жаргалсайханай Чингис, Монголой “Нюанс” гэһэн поп-оперын бүлгэм гэгшэд хабаадаа. Үшөө тиихэдэ, Уласхоорондын мүрысөөнэй лауреат, К. Базарсадаевай аша басаган Арюна Базарсадаева болон үхибүүдынь Саян, Эржена Базарсадаевтан хабаадалсаа.
Оперо болон баледэй театрай сайтһаа гэрэл зураг абтаба.
