Хэжэнгэ аймагай тамиршадай, һоригшодой үни удаан хүлеэһэн физкультурно-спортын танхим одоошье баригдахань. Тус аймагта ажалай хэрэгээр ябахадаа, Буряад Уласай Толгойлогшын уялга саг зуура дүүргэгшэ Алексей Цыденов түрүүшын шулуу табижа, барилгын эхи табиба.
Аяар холын 2010 ондо Сингапур гүрэндэ анха түрүүшынхиеэ эдиршүүлэй дунда болоhон Олимпиин наадануудта Алдар Бальжинимаевай алтан медальда хүртэhэн ушараар баяр ёhололдо спортын томо комплекс Хэжэнгэдэ бариха тухай Буряад Уласай засаг баригшад үгэ алдаа һэн.
Зургаан жэлэй туршада энэ асуудал хэжэнгээрхинэй һанаа зобоожо байгаа. Одоошье гүрэнэй тэдхэмжэдэ хүртэжэ, барилга эхилхэнь. Энэ хэрэгтэ гурбан бюджедhээ 100 сая түхэриг мүнгэн һомологдохо.
Танхим тамиршадта хэрэгтэй хэдэн таһалгануудһаа бүридэхэ юм. Томо зал соо хэдэн зуун хүн наадануудые хараха аргатай болохо. Бэеэ һорихо тренажёрно зал олониие суглуулха гээд һанагдана. Тамиршадай хэлэһээр, комплексын газаа стадион түхеэрээ hаа, бүри һайн байгаа.