Хори аймагай Тээгдэ һууринай үхибүүд булта гүрэнэй хэмжээндэ удха шанартай ГТО тушаахаяа бэлдэжэ байнхай. Тэдэ спортын шэнэ танхим соо һорилго хэнэ.
Буряад Уласай Толгойлогшын уялга саг зуура дүүргэгшэ Алексей Цыденов үнгэрһэн долоон хоногто Хори аймагаар ябахадаа, Тээгдын һургуулида орожо гараа.
Һургуулиин захирал Оюна Жимбаевна Гончикдоржиевагай хэлэһээр, 2014 ондо спортын шэнэ танхим үүдэеэ сэлиһэн байна.
- Манай үхибүүд хуушан спортзал соо һорилго хэдэг байгаа. Тиишэнь эльгээхэеэшье айдаг һэмди, - гэжэ Оюна Жимбаевна хөөрэнэ.
Шэнэ аргаар, богони болзорой хугасаада спортын байшан бодхоогдоо гээд хэлэлтэй. Энэ хэрэгтэ мүнгэншье багаар гаргашалагдаа. Танхим соо һаруул томо залһаа гадна хубсаһа хунараа һэлгэхэ, мүн тренажёрно таһалганууд бэлдэгдэнхэй.
Үмхиржэ унахаа байһан хуушан спортын зал оршон тойрониие муухай болгоно. Оюна Гончикдоржиевагай хэлэһээр, тэрээниие задалхада, мүнгэн хэрэгтэй. Тэрээнэй һуурида багахан спортын талмай барибал, таатай байгаа.
Алексей Цыденовэй спортын танхимда ороходонь, долоодохи классай һурагшад хэшээлдээ байгаа. 37 жэлэй туршада багшаар хүдэлжэ байһан Янжима Жигжитовна Индраева үхибүүдые ГТО- до бэлдэжэ байһанаа мэдүүлээ. “Энэ хэмжээ ябуулгада бүхы үхибүүд хабаадаха байна”, - гээд тэрэ хэлээ.
Хүндэтэ айлшан ябахынгаа урда тээ хэдэн бүмбэгэнүүдые үхибүүдтэ бэлэглээ.