Буряад арадай алдарта хүбүүн, агууехэ дуушан Ким Иванович Базарсадаевай түрэһөөр 80 жэлэй ойдо зорюулагдаһан Залуу дуушадай V уласхоорондын урилдаан апрелиин 15-да Буряадай гүрэнэй академическэ дуури (оперо), баледэй театрта боложо үнгэрбэ.
Энэ урилдаа бэлигтэй залуу дуушадые дэмжэхын тула байгуулагдаһан Ким Базарсадаевай нэрэмжэтэ соёлой жаса уласай Соёлой яамантай болон Буряадай гүрэнэй академическэ дуури, баледэй театртай хамта эмхидхээ. Тус жасые Ким Ивановичай наһанай нүхэр Серафима Даниловна Базарсадаева толгойлдог гээшэ.
Тайзанай саада талада Ким Иванович Базарсадаевай дуулажа байһан видеобуулгабариин табигдахада, тэрэнэй суута аринуудай зэдэлхэдэнь, ямаршье залуугаар энээхэн дэлхэйһээ халижа ошоо гээшэб гэжэ дурсан уярнабди.
Табадахи урилдаанда Ородой Холбоото Уласай, Монголой 15 дуушад хабаадаа. Энэ урилдаан анхан эхилхэдээ, нютаг можо хоорондын байгаа. Мүнөө уласхоорондын хэмжээндэ гараад, дээдэ зиндаатай болоод байна гээшэ. Алдарта дуушанай гэрэлтэ дурасхаалда зорюулагдаһан уласхоорондын урилдаанай илагшад тодоржо, тэдээндэ шагнал барюулгын ёһолол үнгэргэгдэбэ.
Буряад Уласай соёлой сайдай уялга дүүргэгшэ Тимур Цыбиков Гран-при шан урилдаанай лауреат болоhон Буряадай гүрэнэй дуури, баледэй академическэ театрай дуушан Михаил Пироговто барюулба. Буряадай театрай дуушан Мэргэн Санданов, Монгол Уласай гүрэнэй дуури, бүжэгэй академическэ театрай дуушан Дашноров Эрдэнэ-Очир гэгшэдтэ лауреадай нэрэ зэргэнүүд олгогдожо, тэдэ I шатын дипломуудта хүртэбэ. Монгол Уласай дууриин дуушан Дорж Цэдэн Бат-Эрдэнэ II шатын дипломдо, лауреадай нэрэ зэргэдэ, Буряадай хүгжэмэй колледжын оюутан Анатолий Бадаев III шатын дипломдо, баhал лауреадай нэрэ зэргэдэ хүртөө. Монголой дууриин дуушад Очирсайхан Эрдэнэ, Ценд-Аюш Амарболд, Санкт- Петербургын Мариинскэ театрай дуушан Сергей Хмелевский гэгшэдтэ дипломантнуудай нэрэ зэргэнүүд олгогдобо. Агын тойрогой түлөөлэгшэ, залуу дуушан Далай Жаргалов «Найдал” гэһэн шанда хүртэбэ.
Залуу дуушадай уласхоорондын V урилдаанай лауреадууд болон дипломантнууд, абынгаа нэрэ нэрлүүлжэ ябаһан Эржена басаганиинь, Буряадай дуури, бүжэгэй театрай дуушан, Буряад Уласай арадай артистка, мүн Саяан хүбүүниинь, Санкт-Петербургын сэрэгэй тойрогой Дуу болон хатарай ансамблиин дуушан, Буряад Уласай габьяата артист, Ким Базарсадаевай аша басаган, консерваториин оюутан Арюна Базарсадаева болон бусад гала-концертдэ дуулажа, харагшадые баясуулба.
Энэ урилдаанай жюриин гэшүүд дуушан Бадма Гомбожапов, Ородой Холбоото Уласай габьяата артист Дамба Занданов, Монголой гүрэнэй дуури, бүжэгэй театрай гол дуушан Балгансүрэн Эрдэнтуя, Монгол гүрэнэй арадай артист Дэмбэрэлын Жаргалсайханай хүбүүн Чингис, Монголой «Нюанс» гэжэ поп-оперын бүлэгэй дуушад гала-концертдэ мүн лэ хабаадажа, эндэ сугларагшадые хужарлуулаа.
Намжилма
БАЛЬЖИНИМАЕВА