Хэшэгтэ Бодиевай түрын бэлэг гэр бүлэеэ тэжээхэ гол хэрэгсэлынь боложо үгөө: табан жэлэй саана мэдээжэ хүгжэмшэн Виктор Малдаевай залуу дуушанда синтезатор барюулхадань, гэртээ студи байгуулаад, хүгжэм найруулжа эхилһэн юм.
- Мүнөө Павел Карелов, Алагуй гэгшэд хүгжэмэй зохёолнуудые hайнаар найруулан тааруулагшад (аранжировщигууд) гэжэ суурханхай гээшэ ааб даа. Тиихэдэ шинии нэрэ һүүлэй үедэ тэдээнтэй адли соностожо эхилэнхэй…
- Түрүүшээр хүндэшэг байгаа. Нэрэтэй болохын тула нилээд удаан түлбэригүйгөөр хүдэлөөб. Тиигэһээр байтарни, захилнууд орожо эхилээ. Мүнөө манай буряад эстрадын мэдээжэ дуушан Чингис Раднаев, үшөө тиихэдэ Мэдэгма Доржиева, Елена Борохитова, Дулма Сунрапова гэгшэдтэй хүдэлнэб. Тэдэ юундэ намайе шэлэнэб гэхэдэ, би хүгжэмэй тусхай һургуулитайб.
- Хаана мэргэжэлэй талаар hуралсал гараабши?
- П. Чайковскиин нэрэмжэтэ хүгжэмэй колледж түгэсхэһэмби. Минии түрүүшын багша Чингис Раднаевай Монгол ябашахада, Ешин-Хорло Гомбоин заагаал даа. 2006 онһоо Санкт-Петербург хотын театральна академидэ һуралсалаа үргэлжэлүүлээб. Теэд шиигтэй нойтотой хотын уларил намда таараагүй. Тиигэжэ нютагаа бусаха баатай болооб. Нютагаа бусаад, Зоригто Тогочиевай студида, «Байгал» театрта, Буряадай Үндэһэтэнэй 1 дүгээр лицей-һургуулида хүдэлөөб. Тиигэжэ нилээд дүршэлтэй болооб. Удаань Эрхүү хотын оюутадай «Улаалзай» гэжэ ансамблиин хүгжэмэй хүтэлбэрилэгшөөр ажаллааб. Тиихэдээ «Эрын гурбан наадан» гэжэ зүжэг найруулан табиһан байнаб.
- Саашадаа эндэ олоhон дүй дүршэл ехэтэ туһалаа бэзэ. Шинии байгуулhан «Дэлзэн» этно- бүлэгтэ хэд ороноб?
- Морин хуур дээрэ Эрдэм Дымбрылов, иочин дээрэ Арюна Будаева наадана. Клавишнигаар Александр Загузин хүдэлнэ. Тува яһанай Аяс Дамдын хөөмэй хоолойгоор дууладаг. Бултадаа бэрхэ мэргэжэлтэд юм.
- Энэ бүлэгтэеэ хамта зохёохы үдэшэ эмхидхэхэеэ байнат. Танай тоглолтын онсо шэнжэ ямар бэ?
- Апрелиин 24 – минии түрэһэн үдэр. 30-тай болоноб. Энэ баяраа түрүүшынгээ тоглолтоор тэмдэглэхэмни. Концерт-нааданайм эхиндэ арадай дуунууд хөөмэй аялгатай хамта зэдэлхэ. Фонограмма байхагүй. Удаань минии нүхэд – эстрадын одод – дуунуудаа гүйсэдхэхэ.
- Хэшэгтэ, ши Улаан-Үдэдэ үндыһэншье hаа, уһан буряад хэлэтэй байнаш…
- Минии һургуулида орохо сагта, 1994 ондо, гэртэхимни Улаан-Үдэ зөөжэ ерэһэн. Хурамхаанай Уланхаанда түрэһэмби. Улаан-Үдэдэ һурабашье, жэл бүри амаралтынгаа үедэ Уланхаанда хүгшэн эжы, абадаа ошодог байгааб.
- Түрэлхидшни дууладаг гү?
- Минии нагаса аба Василий Эрдынеевич Бальжиев дууладаг байһан. Арадай олон дуунуудые мэдэдэг байгаа. Агууехэ дайнда хабаадаһан. Нютагайнгаа һургуулида хүгжэм зааһан юм. Хуур, баяан, үшөө олон инструментнүүд дээрэ наададаг байгаа.
- Нагаса абадаа адли ши баһал инструментнүүд дээрэ наададаг гүш?
- Морин хуур, лимбэ, гитара, фортепиано, сур-хуур, тобшуур гэхэ мэтэ арбаад инструмент дээрэ наададагби.
- Үшөө тиихэдэ дуунуудые гүйсэдхэнэш…
- Ходол дуулажа ябааб, колледждо һурахадаашье, Санкт-Петербургда байхадаашье… Тэндэ «Дууладаг баг» гэжэ урилдаанда амжалтатай хабаадааб. Дуулажал ябаһаарби…
- Ажалдашни амжалта, гэр бүлэдэшни аза жаргал хүсэнэб.