ЭЛИТЭ ЕХЭ, гайхамшагта дуушан, ниитын ажaл ябуулагша, М.Глинкын нэрэмжэтэ дуушадай Бүхэсоюзна конкурсын лауреат болон дипломант, Буряад Республикын Гүрэнэй шангай лауреат, Агын Буряадай тойрогой хүндэтэ эрхэтэн, СССР-эй арадай артист Ким Иванович Базарсадаевай түрэhөөр 80 жэлэй ой үргэнөөр тэмдэглэгдэжэ байна.
Оюун бэлигтэ дуушан тухай Россиин искусcтво шэнжэлэгшэд, соёлой элитэ мэдээжэ ажал ябуулагшад тоти мэргэнээр, уран хурсаар иигэжэ хэлэhэн байдаг: «Тэрэнэй юрэ бусын, үзэсхэлэн уянгата hайхан, ой ухаанда орошогүй эршэ дэлисэтэй бажаганама бас бүдүүн хоолойнь бүхы түби дэлхэй дээгүүр hүр жабхалантайгаар зэдэлhэн байха юм. Тэрэ хододоо дуулаха дуратай hэн. Энэ хадаа тэрэнэй наhанай нангин хэрэг байhан гээшэ», - гэжэ суута дуушан, Россиин Гүрэнэй Дүүмын депутат Иосиф Кобзон унаган нүхэр тухайгаа дулааханаар дурсан хэлэhэн юм.
Ким Иванович Базарсадаев «ХХ зуун жэлэй алтан хоолой» гэжэ Россиин хүгжэмэй түүхэдэ оронхой. «Ким Иванович хадаа дэлхэйн бас хоолойтой гайхамшагта дуушадай нэгэн болоно» гэжэ оперын мэдээжэ режиссёр И.М.Туманов нэрлэhэн гээшэ. Манай дуушанай 1960 гаран ондо Финляндяар гаcтрольдо ябахадань, Ким Базарсадаевые «Буряадай Шаляпин» гэжэ ороной Президент Урхо Калева Кекконен нэрлээ hэн ха. «Базарсадаев шэнги тиимэ дуушад үсөөхэн юм гэжэ мүнөө үеын искусcтвын элитэ ехэ ажал ябуулагша Р.М.Тихомиров онсолон тэмдэглээ hэн.
Эхэ-байгаали Ким Базарсадаевта оюун бэлиг түхөөгөө. Тэрэ үзэсхэлэн hайхан аялга сохисотой, хүнды түмэр шэнги хүнхинэhэн хүсэтэ хүдэр шанга, онсо өөрсэ бас хоолойтой байгаа. Аалиханааршье, шангааршье таталуулхадань, тэрэнэй хоолой тунгалаг сэлмэг үдэр уhанай нюруугай миралзажа байhан юумэдэл нэгэ жэгдээр, уянгата hайханаар зэдэлдэг байhан гээшэ.
Хүсэтэ бүргэд шубуунай далияа үргэнөөр дэлеэд, Агын уужам талын оёоргүй сэнхир номин огторгойн уудамаар hалхи хаха эсхэн, омог дорюунаар, hүp жабхалантайгаар ниидэhэн юумэдэл, Ким Базарсадаевай хүнхинэмэ хоолой түрэл нютагайнгаа hүp хүсэ, арад түмэнэй сэсэн мэргэн бодол, нугаршагүй зориг шэнгээжэ абаhан байха юм.
КИМ БАЗАРСАДАЕВ 1937 оной гал улаагшан Үхэр жэлэй апрель һapын 22-то Агын тойрогой Хойто- Ага нютагта хүдөөгэй багша Иванай Базарсада Балданай Цырегма хоёрой үнэр баян бүлэдэ түрэhэн юм. Дайнай эхилхэдэ, Базар-Сада Иванов эсэгэ ороноо хамгаалхаяа мордоо бэлэй. Тиин хатуу шэрүүн байлдаануудай нэгэндэ тэрэ баатарай үхэлөөр yнahaн юм. Гэбэшье эсэгынгээ хэрэгые хүбүүниинь үргэлжэлүүлээ.
Тэрэ 1954 оной зун 7-дохи класс дүүргээд, шанга шалгалта барижа, Улаан-Үдын хүгжэмэй училищида hурахаяа ороо hэн.
Һаял хада Ленинградай консерватори дүүргэhэн залуу багша Лхасаран Линховоиной заадаг дуунай классай шаби болоо бэлэй. Училищиин 3-дахи курс дүүргэhэнэйнгээ hүүлээр тэрэ Ленинград ошожо, Н.А.Римский-Корсаковой нэрэмжэтэ консерваторидо гайхамшагта дуушан, профессор И.И.Плешаковой класста hурахаяа ороһон байгаа. «Иван Иванович Плешаков хадаа Лхасаран Лодоновичой багша байhан юм. Ушар иимэhээ би багшынгаа багшада заалгажа, оперын дуушанай мэргэжэл шудалhан, онол шадабаряа нарижуулhан, мүлиhэн хүмби», - гэжэ Ким Иванович хөөрэдэг hэн.
К.Базарсадаев hуража байха үедөө оперно театрай тайзан дээрэ зохёохы ажалайнгаа намтар эхилхэ золтой байhан юм. 1959 ондо Буряадай литература болон искусствын хоёрдохи декадада хабаадалсаа hэн. 1962 ондо тэрэ М.Глинкын нэрэмжэтэ дуушадай бүхэсоюзна конкурсдо хабаадахадаа, дипломдо хүртэбэ. Тэрэ оюутан ябахадаа, Финляндиин ниислэл Хельсинки хотодо үнгэргэгдэhэн уласхоорондын конкурсдо мүн лэ дипломоор шагнагдаа бэлэй. 1970 ондо дуушадай бүхэсоюзна конкурсдо хабаадахадаа, лауреадай нэрэ зэргэдэ хүртэhэн юм.
1963 ондо консерватори дүүргэхэдээ, Ким Базарсадаев А. Даргомыжскиин «Лусууд эхэнэртэ» Тээрмэшэнэй орёо хүшэр партиие шадамар бэрхээр гүйсэдхөө hэн. Нютагаймнай хүбүүн ямар хүнүүдтэй хамта hурааб даа! Эдэмнай хэд бэ гэбэл, дуушадай уласхоорондын болон бүхэсоюзна конкурснуудай лауреадууд, СССР-эй Гүрэнэй болон Ленинскэ шангуудай лауреадууд, СССР-эй арадай артистнууд Елена Образцова, Владимир Атлантов, Ирина Богачева, Николай Охотников, Людмила Филатова гэгшэд болоно. Теэд Ким Базарсадаев эдэ ялагар ододой дунда дутуугүй хурсаар гэрэлтэдэг байгаа бшуу!
КОНСЕРВАТОРИ дүүргэhэнэйнгээ hүүлээр тэрэ Бүхэроссиин гастрольно нэгэдэлэй дуушан, Совет Армиин А.В.Александровай нэрэмжэтэ дуу, хатарай Улаан тугта ансамблиин дуушан болоод, амжалтатайгаар хүдэлхэдөө, дэлхэйн олон оронуудаар гастрольдо ябаhан байгаа. 1966 ондо партиин обкомой урилгаар К.И.Базарсадаев түрэл республикадаа ерэжэ, Буряадай гүрэнэй оперо болон баледэй театрай дуушан болоhон юм.
Түрэл театрайнгаа тайзан дээрэ К.И.Базарсадаев ород болон гадаадын классикын, совет оперонуудай, буряад композиторнуудай зохёолнуудай 30 гаран парти гүйсэдхэжэ, толотомо образуудые үнэншэмэ тодоор байгуулhан, тобойсо харуулhан алдартай: А.Бородинай «Игорь тайжада» - Галицкиин, Ш.Гуногой «Фаустда» - Мефистофелиин, Дж. Вердиин «Аидада» - Рамфисай, “Риголеттэдэ» Монтеронегэй, «Аттилада» - Аттилын, М.Мусоргскиин «Хованщинада» - Досифейн, «Борис Годуновто» - Годуновой, Дж. Пуччиниин «Турандодто» - Тимурай, С. Рахманиновай «Алекэдэ» - Алекын, М.Глинкын «Хаанай түлөө ами наhаяа үгэлгэдэ» - Иван Сусанинай, П.Чайковскиин «Евгений Онегиндэ» - Греминэй болон бусад образуудые шадамар бэрхээр, уран хурсаар нaaдahaн байгаа. Тэрэ үндэhэн оперонуудай гол партинуу- дые амжалтатайгаар гүйсэдхэhэн юм. М.Фроловой «Энхэ-Булад баатарта» Буумал хаанай, Солбон баатарай, Б.Ямпиловай «Нюдөө харалгада» Намжилай, «Цыремпил Ранжуровта» Василиин, «hүрөөтэ шэрүүн жэлнүүдтэ» Бадмын образуудые тобоймо хурсаар гаргажа шадаhан байха юм. Ким Базарсадаевай алтан тайзан хэмжээгээрээ үргэншье, аза талаантайшье, ашаг үрэтэйшье байгаа. 30 гаран жэл соо хэдэн арбаад гол рольнуудые наадаа ха юм. Энээниие агуу дуушанай алтан тайзан гэбэл, зүйтэйшье ха даа. Тэрэ Буряад оронойнгоо, монгол угcaaтa арадайнгаа, Совет гүрэнэй, Орос ороной hүp hүлдые, нэрэ хүндые улам дээшэнь үргэлсөө. Тэрэнэй үргэн ехэ репертуарта камерна зохёолнууд: романснууд, совет болон буряад композиторнуудай дуунууд, арадай дуунууд ородог hэн. Ким Иванович оронойнгоо олон хотонуудаар гастрольдо ябаhан, дэлхэйн 30 гаран ороной, тэрэ тоодо Монголой, Чехословакиин, Англиин, Норвегиин, Франциин, Финляндиин, Хитадай, Японой ба бусад оронуудай арад зондо оюун бэлигээ бэлэглэhэн байгаа.
СССР-эй арадай артист Ким Базарсадаевай гүйсэдхэhэн хүгжэмтэ зохёолнуудай хэдэн диск (пластинка) «Мелодия» фирмэ гаргаһан байгаа. Элитэ ехэ буряад артистын зохёо- хы ажал ябуулгада зорюулагдаhан «Байгалай толон» гэжэ телевизионно фильм 1986 ондо СССР-эй Түбэй телевиденеэр харуулагдаа бэлэй.
Ким Иванович Базарсадаев ниитын ажал эдэбхитэйгээр ябуулдаг байhан юм. Тэрэ Буряадай хүгжэмэй бүлгэмэй түрүүлэгшэ, Бүхэроссиин соёлой жасын президиүмэй гэшүүн байhан гээшэ. 1989 ондо Ази-Сибириин можо нютагуудай оперо ба баледэй театрнуудай уласхоорондын эблэлэй президентээр hунгагдаа hэн. 1995 oнhoo Буряадай оперо болон баледэй академическэ театрай директорээр хүдэлхэдөө, залуушуу- лые hypгaн хүмүүжүүлхэ хэрэгтэ ехэ анхаралаа хандуулдаг байгаа. Һүүлээрнь тэрэ республикын соёлой министрэй зүбшэлэгшөөр ажаллаба.
Искусство хүгжөөлгэдэ гайхамшагта амжалта туйлаhанайнгаа, ниитын эдэбхитэй ажал ябуулhа- найнгаа түлөө К.И.Базарсадаев Арадуудай Хани барисаанай, Хүн- дэлэлэй орденуудаар, Монголой «Хүндэлэлэй тэмдэг» медаляар шагнагданхай. 1973-1974 онуудта концертнэ-гүйсэдхэлгын ехэ ажал ябуулhанайнгаа түлөө Ким Иванович 1975 ондо Буряадай АССР-эй Гүрэнэй шанда хүртөө hэн.
Гэнэ тодхор газар дороhоо гэжэ хэлсэдэг гээшэ. 2002 оной түгэсэжэ байха үедэ Ким Иванович Базарсадаев 65 наhатайдаа - шиираг сарюун хаhадаа гэнтэ алтан дэлхэйhээ халижа ошоходоо, үндэhэн буряад искусствада туйлай ехэ, хүсэлдүүлэшэгүй гээлтэ хохидол ушаруулаа hэн.
ТЕЭД он жэлнүүдэй үнгэрхэ тудам арадай дуушанай мартагдашагүй дурасхаал олониитын ухаан бодолые хүлгүүлнэ. Гайхамшагта дуушан, оюун бэлигтэй хүн, Эхэ оронойнгоо патриот байhан Ким Базарсадаевай гэрэлтэ hайхан дурасхаал арад түмэнэй ухаан бодолдо, оюун бэлигыень сэгнэдэг бүхы хүнүүдэй зүрхэ сэдьхэлдэ хэтэдээ үлэнхэй. Тэрэнэй хэтэдээ мүнхэ хүнхинэмэ hайхан хоо- лой мүнөөнэй ба ерээдүйн үетэнэй гүн сэдьхэлдэ хододоо шэнхинэн соностожо байхань дамжаггүй.
Арадай дуушанай дурасхаалые ёhолон хүндэлжэ, СССР-эй арадай артист К.И.Базарсадаевай нэрэмжэтэ Соёлой жаса 2006 ондо байгуулагдажа, тэрэнэй наhанай нүхэр - Буряад Республикын габьяата врач Серафима Даниловна Базарсадаева тус Жасын президентээр табигдаа hэн. «Бэлигтэй залуу дуушадые дэмжэхын тула Жаса байгуулагдаа. Энээнэй тула манай Жаса соёлой элдэб хэмжээ ябуулгануудые эмхидхэхэ, конкурснуудые, уулзалгануудые үнгэргэхэ байна”, - гэжэ Серафима Даниловна хэлэнэ. Россиин Федерациин Гүрэнэй Дүүмын Соёлой хорооной түрүүлэгшэ И.Д.Кобзон Амаршалгын бэшэг эльгээхэдээ, 100 мянган түхэригэй хандиб унаган нүхэр Ким Базарсадаевай нэрэмжэтэ Соёлой жасада үргэhэн байгаа.
Алдарта дуушанай 70 жэлэй ойдо зорюулагдаhан элдэб хэмжээ ябуулганууд үнгэргэгдөө hэн. Солото дуушанай нэрэмжэтэ хүүгэдэй искусствын hургуули Агада байгуулагдажа, мүнөөнэй түгэс hайн түхеэрэлгэнүүдтэй, компьютерна классуудтай, 250 хүнэй hууритай харалгын танхимтай гурбан дабхар шэнэ байшан баригдаа. Тэрэнэй ажал ябуулга тухай үзэсхэлэн Буряадай Соёлой болон искусствын музей соо нээгдэhэн, «Ким Базарсадаев ажабайдалдаа ба тайзан дээрэ» гэжэ журналист Баясхалан Дабаинай альбом-ном гаргагдаhан, тэрэнэй ажаhууhан гэрэй ханада Дурасхаалай самбар бэхилэгдэhэн, Ким Ивановичай дурасхаалда зорюулагдаhан ехэ концерт Улаан-Баатар хотодо үнгэргэгдэhэн, дуушадай уласхоорондын конкурс эмхидхэгдэhэн байгаа. Эдэ бүхы үйлэ хэрэгүүдые бэелүүлгэдэ наhанайнь нүхэр Серафима Даниловна, эсэгынгээ замаар дабшажа, дуушад болоhон үхибүүдынь - Саяан Эржена хоёрынь ехэ үүсхэл эдэбхи гаргаһан байха юм.
СССР-эй арадай артист Ким Иванович Базарсадаевай 80 жэлэй ойдо зорюулагдаhан дурасхаалай гала- концерт 2017 оной апрелиин 15-да Буряадай оперо болон баледэй академическэ театр соо боложо, олон тоото харагшад, түрэһэн тоонто Ага нютагһаань айлшад сугларба.
Гэрэл зураг дээрэ арадай дуушад: Монголой - Д.Жаргалсайхан, Советскэ Союзай - И.Кобзон, К.Базарсадаев «Алтарганын» нааданай үедэ. Ага. 2002 он