(Түгэсхэл. Эхиниинь 13-14 дугаарнуудай сониндо).
Мүнхэ алдарта хүртэхэ хуби заяан
Испан эгээн мэдээжэ поэдүүдэй нэгэн, драматург, уран зурааша, республикын хэблэлэй ажал хүтэлэгшэ Рафаэль Альберти СССР-эй уран гуурһатантай үнинэй холбоотой һэн. Совет уран зохёолшодой түрүүшын хуралдаанда айлшаар уригдаһан түүхэтэй. Мадрид хамгаалагшадай нэгэн, фронтын хэблэл байгуулһан юм. Фашистнуудай илахада, тэрэ Аргентинэдэ хорохо баатай болоо бэлэй. 1950 ондо Эб найрамдалай бүхэдэлхэйн конгрессэй ажалда хабаадаа һэн. “Арадуудай хоорондо эб найрамдал бэхижүүлгын түлөө” Уласхоорондын Ленинскэ шангай лауреат (1964). Генерал Франкогой 1975 ондо наһа бараһанай һүүлээр фашис журамайнь һалахада, Эхэ орондоо бусаһан юм. Дайнай үедэ зохёоһон шүлэгүүдэйнь нэгэн танай анхаралда.
Табадахи полкын сэрэгшэб
“Үглөөдэр түрэһэн гэрээ орхихомни,
таряалангаа, дүнэн сараа орхихом”.
“Ухайш даа! Хэн болохобши, хэлыш?”
“Табадахи полкын сэрэгшэ.
Үндэр уула, үргэн дайдые
уһагүй тэсэжэ гарахаб,
урма баяр, алдар соло хүлеэнэ
Табадахи полкын сэрэгшые!”
(Т.Самбялова буряадшалба).
Испан арадай олон хүбүүд, басагад СССР- тэ ерэжэ, шэнэ Эхэ оронтойгоо хуби заяагаа холбоһон байна. Эндэшье удангүй соробхилһон агууехэ дайнай гал дүлэндэ орожо, эрэлхэг сэрэгшэ абари зангаа, үндэр һүр һүлдэеэ харуулаа бэлэй.
Долорес Ибарруриин хүбүүн, Рубен Руис Ибаррури, СССР-эй Зэбсэгтэ Хүсэнүүдэй зэргэдэ фашистнуудтай тэмсэлээ үргэлжэлүүлээ. Ротын командир лейтенант Р.Ибаррури 1942 ондо Сталинградай фронт дээрэ баатарай үхэлөөр унаһан юм. Наһа бараһанайнгаа һүүлдэ Советскэ Союзай Геройн нэрэ зэргэдэ хүртэһэн байна.
Испан дайнда корпусой штабай начальник байһан Франсиско Гуйон (1920-1944) баһа СССР-тэ хүрэжэ ерээд, Эсэгэ ороноо хамгаалгын Агууехэ дайнай үедэ Ленинградай можодо тэмсэжэ байһан партизан отрядуудай нэгэндэ дайлалдаа бэлэй. Шэн зоригто испан сэрэгшэ наһа бараһанай һүүлээр Ленинэй орденоор шагнагдаа һэн.
Испан яруу найрагша, совет поэдүүдэй зохёолнуудые оршуу- лагша Хулио Мартинес Матеу (1908-1985) Эсэгэ ороноо хамгаалгын дайнай үедэ сэрэгэй заводто токарёор хүдэлөө. Москвагай хэблэлнүүдтэ тэрэнэй шүлэгүүдэй табан ном ород хэлэн дээрэ, хоёрынь испан хэлэн дээрэ нара хараһан. Арадайнгаа баатар хүбүүн Ф.Гуйондо зорюулһан шүлэгһөөнь хэһэг дурадханабди.
Франсиско Гуйон
...Улаан онгосодол хуурсаг
холоһоо харагдаад,
ошондол ялас гээд,
хараанһаа холодоно...
Москвагай үйлсөөр,
уһа голоор мэтэ,
Мадридта Гуйон ошоно ха
урдаад...
Испанида Гуйон сэрэгшэ байгаа.
Совет орондо партизан болоо.
Хоёр Эсэгэ ороной түлөө байлдаа,
Хоёр орондоо наһаяа үршөөгөө.
Волгын һэбшээнэй шам тухай
шэбэнэхэдэ,
Тахо мүрэнэй аялга намда
дуулдана...
Баяртай, Гуйон,
Үхэлһөө айгаагүй сэрэгшэ!
(Т.Самбялова буряадшалба).
Арбатайхан хүбүүн Мансо Аргуэльс Агустин эжытэеэ хамта фашистнуудһаа тэрьелжэ Овьедо хотоһоон гараад, Францида концлагериин тама тэсээд, дам саашаа СССР-тэ хүрэжэ ерэһэн юм. Дайнай үедэ авиазаводто хүдэлдэг һэн. А.М.Горькиин нэрэмжэтэ Литинститут дүүргээ. Ород поэдүүдэй (Лермонтов, Есенин болон бусад) зохёолнуудые испан хэлэндэ оршуулһан байна.
Испан дайнай гал дүлэнһөө абархын тула заахан хүүгэдые пароходоор СССР-тэ эльгээдэг байгаа. Жэшээнь, 1937 оной июниин һүүл багаар Астуриин хүүгэдые тээһэн пароходууд Ленинград болон Одессэ хотонуудта ерэһэн юм. Оркестрэй хүгжэм доро, улаан тугуудые намилзуулан, тон хүндэтэйгөөр испан багашуулые угтаа һэн. Хүреэлэгдэһэн Ленинградые хамгаалагша эрэлхэг хүнүүдэй нэгэн, ирагуу найрагша Ольга Берггольцын энэ ушар тухай бэшэһэн шүлэгые буряадшалбабди.
Угтамжа
Жаргалһаа, гашуудалһааш эшэнгүй,
халима баяраа нэгэшье нюунгүй,-
испан хүүгэдые угтаа һэмди,
түрэл бэшэ аад, хайратай хүүгэдые.
Хүрихэн шарайтай,
хонгёо хоолойтой,
ондоо дайдада түрэһэн гэхээр,
хара нюдэтэй, харахан үһэтэй,-
онгосодо һууһан
хараасгайнууд мэтэ...
Тэнгэриин одон ошотон яларжа,
онгосонуудта дахуулан асараал,
айл бүхэндэ хүүгэн түрөө гэжэ
энэ үдэшэ бүхы хүнүүд этигээл.
Шэнэ Эхэ оронтой болоһон испан хүүгэд тухай поэдүүд Иннокентий Оксенов (дайнһаа бусаагүй), Яков Хелемский, Сергей Михалков бэшэһэн байха юм. Совет суута хоккеист Валерий Харламовай эжынь эдэ испан хүүгэдэй нэгэн байһан гээд мэдэнэбди. Манай Буряад орондо испан дайнай һүүлээр мүндэлһэн олохон үхин үринэртэ Долорес гэһэн нэрэ үгтэһэн байха.
Дэлхэйн хоёрдохи дайнһаа бусаа- гүй кабардин арадай уран зохёолой эхи табигша Али Шогенцуков; Болгарида фашистнуудта эсэргүү тэмсэлые хүтэлһэнэй түлөө буудуулһан поэт Никола Вапцаров; фронтдо ами наһаяа үгэһэн поэдүүд Михаил Троицкий, Алексей Лебедев, Леонид Шернер; Словакида 1944 ондо фашистнуудта эсэргүү арадай буһалгаа эмхидхэһэн поэт Лацо Новомеский; бүхы номуудыень фашистнууд галдаһан түүхэтэй хубисхалша-поэт, серб Чедомир Миндерович; грузин поэт Галактион Табидзе; түүрэг поэт Назым Хикмет болон олон ондоо яһанай, хэдэн үеын поэдүүд баатарлиг, дууша ирагуу сэдьхэлтэй испан арадта халуун дуранай, үнэн зүрхэнэй хүндэлэлэй, баяр талархалай, энхэрэлэй мэдэрэлээр халиһан бүтээлнүүдээ зорюулһан байгаа. Суута француз поэт Поль Элюарай шүлэгые буряадшалбабди. Сюрреализмын уран арга баримталан бэшэгдэһэн энэ шүлэг соо сэглэлтын тэмдэгүүд үгы юм.
Испанида
Хэрбээ Испанида шуһан үнгэтэй
модон бии юм һаа
Эрхэ сүлөөгэй модон гээшэ
Хэрбээ Испанида дуу таһаршагүй
хэлэн бии юм һаа
Тэрэ эрхэ сүлөө тухай хэлэнэ
Хэрбээ Испанида гайхамшаг
шэмэтэй архи бии юм һаа
Тэрээнһээ арад лэ хүртэхэ
Энэ дайнай гэршэнэр болоһон суута зохёолшод, сэтгүүлшэд Э. Хемингуэй, М.Кольцов, И.Эренбург айхабтар хурса бүтээлнүүд соогоо испан арадай эрхэ сүлөөгэй түлөө эрэлхэгээр тэмсэһэн тухай, демократиие хамгаалхын тула дэлхэйн эрхим түрүү хүнүүд эб нэгэдэн, буу барижа, фашистнуудтай байлдаһан тухай романтикын үндэр удхатай хэлээр дамжуулһан юм.
Харин испан зохёолшод, эрхэтэнэй дайнай дүлэн соо шуһаа адхаһан түрэл арад тухайгаа, үсөөн бэшэ ушарта дайсад болоһон аха дүүнэр тухай, олон түмэнэй хуби заяанда эдэгэшэгүй шарха болоһон эдэ жэлнүүд тухай зүрхэ хахарма гашуудалтай мүрнүүдые зорюулаа бэлэй. Франкис сэрэгүүдэй Мадридые эзэлһэнэй һүүлээр олон сая испан хүнүүдэй ажабайдалда дайн дүүрээгүй. Гуша гаран жэлэй туршада испан арад али болохо аргаар фашизмда эсэргүүсээ, хамалган хашалганай, айн һүрдэлгын, үлэн хооһон үе сагые тэсэжэ гараа. Далда удхатай хэлээр үнэн зүбые арад зондоо дамжуулха гэжэ Испанида үлэһэн зохёолшод оролдоо. Франсиско Аялын «Тахо», Пере Калдерсын “Үгы болоһон батальон” гэжэ каталон хэлэн дээрэ бэшэгдэһэн зохёолнууд соо “бүхы испан арад энэ дайнда шархатанхай” гэһэн бодол элеэр мэдэрэгдэнэ.
Франкогой тала баригшад республикые дэмжэһэн суута уран бэлигтэниие—Антонио Мачадо, Федерико Гарсиа Лоркые, Пабло Пикассо болон бусад олон сэхээтэниие али болохо аргаар муушалаа, алдарта нэрыень мартуулха гэжэ оролдоо. Фашис журамтай таарахагүй хадаа хилын саана ажабайха болоһон зарим уран бэлигтэн сагай ошохо тума мартагдаагүй, харин нэрэ солонь улам суурхажа, зон олоной зүрхэ сэдьхэл батаар эзэлһэн байна. Хариин дайдада тэдэнэр түрэл оронойнгоо алдар солые, уйдхар гашуудалые хубаалдажа, арадайнгаа үндэр һүлдые дээрэ үргэжэ, жаргалтай сагай ерэхые түүрээн үреэжэ ябаа бшуу. Эхэ дайдаһаань таһарһан эдэ уран гуурһатан түрэл оронойнгоо түүхэдэ, үндэһэн удха зохёолдо өөрынгөө мүр сараа үлөөһэн зандаа бэлэй.
1936-1939 онуудай испан дайн XX зуун жэлэй шухала үйлэ хэрэгүүдэй нэгэн гэжэ тоологдодог. Тэрэнэй бүхэдэлхэйн-түүхэтэ удха шанар гэбэл, энэ хадаа фашизмтай түрүүшын зэбсэгтэ тулалдаан, Эсэгэ ороноо хамгаалгын Агууехэ дайнай тээ урда болоһон ехэ байлдаан гээшэ, тиимэһээ хүн түрэлтэнэй түүхэдэ һүрөөтэй һургаал жэшээ болон үлэнхэй. Энэ тулалдаан дэлхэйн хоёрдохи дайнай эхилхэ болзорые саашалуулжа, СССР-эй хүтэлбэриие маша түргөөр дайнда бэлэдхэл ябуулхые баадхаһан юм. Испан арадай баатарлиг тэмсэлэй сууряан ерээдүй агууехэ дайнай асари тулалдаануудта туйлагдаһан илалтануудаар самаряатан ерэһэн түүхэтэй.
Холын түүхэ боложо байһан эдэ жэлнүүд бүхы дэлхэйн прозо, поэзи, драматургида айхабтар үргэн дэлисэтэйгээр зураглагдаа һэн. Гүн удхата социально—политическэ шэнжэлэлгэнүүдшье хэгдээ. Буржуазна үзэл бодолой эльбэ хүсэндэ абтаһан Европын нэгэ хуби болохо Испанида энэ дайнай үедэ дэлгэрһэн харагдаа үзэгдөөгүй юрын арадай баатаршалга, нугаршагүй зориг, сэбэр сагаан сэдьхэлэй уряалаар республикые хамгаалхаяа хаа-хаанаһаа ерэһэн идеалистнуудай гайхамшаг жэшээ бүхы дэлхэйн зониие бахархан гайхуулаа, ухаан бодолдонь гүнзэгы мүр сараа үлөөгөө ха юм. 1968 ондо К.Симонов иигэжэ бэшээ һэн: “Фашизмтай нюурдалдан тэмсэһэн, испан арадай гай гасалан харуулһан уран зохёол хадаа мүнхэ алдартай байшоо. Энэ ушарые бүхы түбинүүдэй олон сая уншагшад гэршэлнэ”. Үнэхөөрөөшье, эдэ зохёолнуудта дахин, дахин бусажа, дабтан уншаха хүсэл түрэдэг.
Гэрэл зураг дээрэ: (зүүн гарһаа) Л.Хьюз, М. Кольцов, Э.Хемингуэй, Н.Гильен - Соёлые хамгаалгын уран зохёолшодой хоёрдохи конгресстэ хабаадагшад. Мадрид, 1937 он.