622
Заха холын Захааминһаа гарбалтай Соли Александровна Содномова Саха Яхад уласта олон жэлэй туршада хатарай багшаар ажаллажа байна.Тэрэ һургажа байһан шабинартаяа хамта Ород гүрэн дотор болон хари гүрэнүүдтэ хатарай урилдаануудта, харалгануудта хабаадажа, үндэр амжалтануудые туйлаһан намтартай. Түрэл Захааминдаа дунда һургуули дүүргэһэнэй удаа, Соли Александровна Улаан-Үдын Соёл болон урлагай тусхай дунда мэргэжэлэй һургуулида һуража, хатарай багша гэһэн мэргэжэлтэй болоһон юм.
1995 ондо тэрэ Саха (Яхад) Уласта хатарай багшаар хүдэлхэеэ ошоо. Тиигэжэ тэрэ Айхал һууринай соёлой болон спортын түбтэ “Алтан гадаһан” (“Полярная звезда”) гэһэн хатарай бүлэгтэ ажаллажа эхилээ. 2002 ондо Зүүн Сибириин гүрэнэй соёл болон урлагай дээдэ һургуулида һуража гараһан юм. Залуу мэргэжэлтэн ажалайнгаа намтар эхилхэдээ, Саха (Яхад) Уласай соёлой болон урлагай эрхим хүдэлмэрилэгшэ Александр Данилович Кушнарёвой хүтэлбэри доро хүдэлөө. Эдэбхи, үүсхэл ехэтэй, харюусалгатай Соли Александровна түрүүшын үдэрнүүдһээ бэеэ харуулжа шадаа. Тэрэ арадай, эстрадна, бальна хатарнуудые табижа, хүүгэдэй ансамблиин репертуар баяжуулаа. Баян репертуартай болоһон ансамбль аймагай, уласай, бүхэроссиин болон уласхоорондын олон тоото хатарай мүрысөөнүүдтэ эдэбхитэйгээр хабаадажа эхилбэ. Сочи, Анапа, Москва, Якутск хотонуудаар нэгэнтэ бэшэ хатарша үхибүүдтэеэ ябаһан юм. Тэдэ Турци, Тунис, Итали, Испани, Болгари, Америкэ айлшалжа, үндэр сэгнэлтэдэ хүртэжэ бусаһан юм. 1998 ондо Сочи хотодо үнгэргэгдэһэн Уласхоорондын “Надежды Европы” фестивальда хабаадажа, Соли Александровнагай ударидадаг бүлгэм дипломантын нэрэ зэргэдэ хүртэһэн байна. 2004 ондо тус анмсамбль тэрэл фестивальда эстрадна хатар гэһэн номинацида хоёрдохи һуури эзэлһэн юм.
2007 ондо Соли Содномова “Звездопад” гэһэн эстрадна хатарай Арадай ансамблиин уран һайханай хүтэлбэрилэгшээр томилгодоһон байна. Богонихон хугасаа соо тэрэ олоной һайшаалда хүртэһэн юм. Шаби бүхэндөө анхаралтайгаар, үнэн сэхээр, дуратайгаар хандажа, тэдэнэртээ, гансашье хатарай шэнэ аргануудта һургадаг бэшэ, харин ажабайдалай элдэб ушарнуудтань туһа хүргэжэ ябахаяа оролдодог багша юм. Суг хүдэлжэ ябаһан нүхэдтөө, һурагшадайнгаа түрэлхидтэ илдам налархайгаар хандажа, эбтэй эетэйгээр ажалаа ябуулжа байдаг.2008 ондо “Дети Азии” гэһэн 4-дэхи Уласхоорондын спортын наадануудта Соли Александровнагай хүтэлбэрилдэг бүлгэм “Эстрадын хатар” гэһэн номинацида 1-дэхи шатын дипломоор, “Арадай хатар” номинацида 2-дохи шатын дипломоор шагнагдаһан. 2011 ондо тус ансамбль “Надежды Европы” гэһэн Уласхоорондын фестивальда хабаадажа, түрүүшын һуури эзэлһэн байна. Ансамблиин солист Эрдэни Канаткалиев Америкын Лос-Анджелес хотодо “Dans” фестивальда хабаадахаяа уригдаһан. 2011 ондо “Звездопад” бүлгэм яхад арадай “Ысыах” һайндэртэ эдэбхитэйгээр хабаадаһан байна. 2004 ондо Москва хотодо үнгэрһэн “Таланты нового века” гэһэн Уласхоорондын мүрысөөндэ хабаадажа, эстрадна хатар номинацида түрүүшын һуури, сольно хатар номинацида хоёрдохи һуури эзэлһэн юм. Тиигэжэ Соли Александровна “Хатарай эрхим багша” гэһэн нэрэ зэргэдэ хүртэһэн юм. Энэ мүрысөөнэй жюриин түрүүлэгшэ Ородой Холбоото Уласай габьяата артист Бедрос Киркоров байгаа. 2015 ондо Сочи хотодо үнгэрһэн “Бегущая по волнам” Уласхоорондын мүрысөөндэ дахинаа түрүү һууринуудые эзэлһэн юм. Хэжэ байһан ажалдаа харюусалга ехэтэй багша, шэнэ, һонин юумэ бэдэржэ, өөрөөшье хүгжэн, шабинараашье шэнэ юумэндэ дадхаажа, хүмүүжүүлжэ байдаг
Соли Александровна багшын ажалай хажуугаар, ниитэ ажабайдалда эдэбхитэй хабаададаг юм. Тэрэ 1996 онһоо хойшо Айхал һууринда Буряадһаа гарбалтай хүнүүдэй “Эрдэни” бүлгэмэй түрүүлэгшэ юм. Хорёод жэлэй туршада С. Содномовагай ударидалга доро “Сагаалган”, “Сурхарбаан” гэһэн уулзалганууд үнгэргэгдэдэг. Алибаа һайндэрнүүдтэ зорюулагдаһан хэмжээ ябуулгануудые Хатарай багша эмхидхэжэ, тэрэннинь үндэр хэмжээндэ үнгэрдэг. Илангаяа үхибүүдые олоор хабаадуулхаяа тэрэ оролдодог юм. Тиимэһээ һайндэр бүхэндэ үхибүүдэй зурагуудай, гараараа хэһэн бүтээлнүүдэй мүрысөөнүүд үнгэргэгдэжэл байдаг.
Айхалда ажаһуудаг олон яһатанай дунда спортын фестиваль олоной һонирхол татадаг. Энэ хэмжээ ябуулгадашье Соли Александровна хам оролсодог. 2011 ондо Соли Александровна “Саха (Яхад) Уласай соёлой отличник” гэһэн үндэр нэрэ зэргэдэ хүртэһэн юм. Тэрэ сүлөө сагтаа миин һуужа байдаггүй. Эдеэ хоол бэлдэхэдээ, оёхо нэхэхэдээшье бэрхэ юм. Тэрэ наһанайнгаа хани нүхэртэеэ хамта гурбан баатар хүбүүдые хүмүүжүүлжэ, ороһониие ундалуулжа, хойнотоһониие хонуулжа, халуун эдеэтэй угтажа байдаг. Соли Александровна угсаата арадайнгаа жэнхэни буряад хубсаһашье оёхо шадабаритай юм.
Тиихэдэ Соли Александровна Содномова Эхэнэрнүүдэй һайндэрөөр түрэл Буряадтаа ажаһуудаг эжынэрые, басагадые хани халуунаар амаршалаад, үбшэ зоболонгүй, элүүр энхэ, үнэр баян ябахые хүсэнэ.
