780
Буряад Уласай һур харбагшад Грецидэ үнгэргэгдэһэн Европын кубогто алтан болон хоёр хүрэл медальнуудта хүртэбэ.
Грециин Марафон хотодо һур харбалгаар Европын кубогой 1-дэхи шата 2017 оной апрелиин 16- 23-най үдэрнүүдтэ үнгэргэгдэбэ. Ородой Холбоото Уласай түлөөлэгшэд Алексей Криволап, Татьяна Плотникова, Станислав Черемискин, Туяна Будажапова, Виктория Харитонова, Елизавета Королева гэгшэд мүрысөөнэй түрүүшын үдэр үндэр амжалтануудые туйлаһан байна.
Түгэсхэлэй шатада манай тамиршад илагшадай тоодо ороһон байна. Апрелиин 19-дэ Алексей Криволап, Татьяна Плотникова гэгшэд командын мүрысөөндэ мүнгэн медальда хүртэбэ. Удаадахи үдэртэнь, Ородой Холбоото Уласай һур харбагшад 2 алтан, 2 хүрэл медальнуудта хүртэһэн байна. Татьяна Плотникова, Виктория Харитонова, Владислава Щеголькова,Станислав Черемискин, Соёл Саганов, Найдан Сушкеев гэгшэд командын мүрысөөндэ түрүүшын һууринуудые эзэлбэ. Алексей Криволап, Эрдэм Цыдыпов, Буянто Цырендоржиев, Екатерина Балашова, Туяна Будажапова, Элина Шарипова гэгшэд хүрэл медальда хүртэбэ.
Хубиин мүрысөөндэ Ородой Холбоото Уласай тамиршад 4 медальнуудта хүртэбэ. Алтан медаль – Станислав Черемискин, мүнгэн медаль – Алексей Криволап, Екатерина Балашова, хүрэл медаль -Эрдэм Цыдыпов гэгшэд абаба.
Буряад Уласаа түлөөлһэн Виктория Харитонова эдир һур харбагшадай дунда түрүү һуури эзэлээ. Эрдэм Цыдыпов хубиин болон командын мүрысөөнүүдтэ 3-дахи һуурида хүртөө. Аюна Манханова кадедүүдэй дунда 17-дохи һуури эзэлһэн байна.
