​Нютагаа болбосон түхэлтэй болгоно

Хори аймагай һуурин, тосхонуудай ажаһуугшад эдэбхитэй ажал ябуулна. Тии­гэжэ тэндэ олон зон ТОС-уудай ажалда хам оролсожо, оршон тойронхи байда­лаа һайжаруулна.

Түймэрһөө һэргылнэ

Һүүлэй үедэ манай уласай газар дэбисхэр дээрэ ойн түймэр олоор һүжэрнэ. Тиимэһээ ажаһуугшад нютаг нугаяа хамгаалхын тула түймэр саралгын албан байгуулна. Дээдэ Тайлса, Хасуурта болон бусад нютагуудайхид өөрын түймэр саралгын автомашинатай болонхой. Иимэ һайхан жэшээ Удинск һууринайхид харуулһан байна.

“Хозяин” гэһэн ТОСой эмхиин эдэбхитэн Лю­бовь Скворцовагай хэлэһээр, эдэ түймэр сарал­гын машина үшөө 2010 ондо худалдажа абаа һэн. Удаань мүнгэ суглуулжа, депо байгуулаа. Энэ хэ­рэгтэ 745 мянган түхэриг гаргашалагдаа.

- Манай түймэр сарагшад хаа-хаанагүй түймэрэй галтай тэмсэнэ. Тэдэ ойн түймэртэ ябалсана, мүн талада болоһон аюулда ошодог юм, - гэжэ Любовь Скворцова хөөрэнэ. – Мүнөөдэр ма­най деподо 9 хүн хүдэлнэ, гурбаад хүн боложо хубаараад, тэдэ ажалаа ябуулна. Хүдөөгэй захиргаан түймэр сарагшадтаа социальна хүнгэлэлтэнүүдые үзүүлнэ. Һайнаар ажал хэжэ байһанай түлөө тэдэ бараанай налог түлэнэгүй.

Түймэр сарагшад галай соробхилхые хүлеэгээд һуунагүй. Хүн зоной, илангаяа ургажа ябаа залуу һүрэгэй дунда ойлгууламжын болон идхалгын ажал ябуулна.

Нютагай шарай һайхан

Удинск һууринай ТОСууд нэгэдэжэ, соёлойн­гоо байшаниие, спортын танхим заһабарилаа. Мүн тиихэдэ амаралтын парк түхеэрээ. Илалтын хүшөөнүүд һэльбэн шэнэлэгдээ. Эсэгэ ороноо хамгаалгын Агууехэ дайнда баатарлигаар унаһан сэрэгшэдэйнгээ мүнхэ дурасхаалда зорюул- жа, аймагай бүхы нютаг нугануудта хүшөөнүүд заһабарилагдаа гэжэ тэмдэглэхэ шухала.

Удинскын ажаһуугшадые энэ талаар аймагай захиргаан дэмжэнэ. Бусадшье нютагуудайхидай эдэбхитэйгээр хабаададагыень тэмдэглэмээр.

Хори аймагай ород һууринуудта һүмэнүүд олоор бодхоогдоно. Дээдэ Тайлса, Георгиевко, Ашанга болон бусад нютагуудта энэ дэмбэрэлтэ ажал хэгдэнэ.

Худаг малтана

Хори аймагай харьяата газарта һүүлэй хэдэн жэлдэ ган гасуур ушарна. Үдэ голой уһан бага бо­лоно. Мүн бусадшье голнууд хатанхай. Энээнһээ боложо, хүн зоной хэрэглэхэ сэбэр уһан хомор болоо гээшэ. ТОС-уудай эдэбхитэд өөр өөрынгөө нютагта энэ асуудал шиидхэнэ. Хасуурта, Дээдэ Тайлса болон бусад һууринуудта хүнүүдэй хэрэг- лэхэ уһатай худагуудые малтаа.

Булам нютагта

ТОС-уудай ашаар һууринуудта соёлой болон социальна удха шанартай томо байшанууд бодхоогдоно. Тиигэжэ Булам һууринда 2017 ондо шэнэ соёлой болон бэеын тамирай байшан ашаглалгада тушаагдахань.

- Манай Булам нютагай гурбан ТОС нэгэдэ­жэ, соёлойнгой байшаниие заһабарилха гэжэ түсэблөөбди. Тиигэжэ хушалта, үһээ, шала гэхэ мэтыень шэнэлээбди, хана хаяаень дулаалаабди. Бүхы дээрээ 800 мянган түхэриг гаргашалагдаа. Мүнөө жэлдэ Хори аймагай захиргаан 600 мян­ган түхэриг һомолхонь, бидэ өөһэдөө 300 мян­ган түхэриг конкурсдо шүүгээбди. Энэ ажалаа дүүргэхэ хэрэгтэмнай энэ мүнгэн хүрэхэ гэжэ һанагдана, - гэжэ ТОС-ой хүтэлбэрилэгшэ Светла­на Мархюева хөөрэнэ.

Тохорюугтада

Тохорюугта һууринда 304 хүн ажаһуудаг, гэ­бэшье тэдэ ТОС-то оролсожо, нютагаа сэбэрлэ­нэ. Тэдэ түрэл һургуулиингаа ойн баярта барил­даанай найман ханатай гэр бодхооһон байна. Үнгэрһэн жэлдэ тус нютагай эдэбхитэд аршаан шадар оршодог хүүгэдэй амаралтын лагериин эдеэ хоол шанадаг байшан шэнэлһэн байна.

Дэмжэлгэ үзүүлхэ

Буряад Уласай Толгойлогшын уялга саг зуура дүүргэгшэ Алексей Цыденов хүдөө нютагуудаар ябахадаа, ТОС-уудай ажалтай дүтэ танилсана. Һая Хори аймагаар ябахадаа, энэ ажалда ходо туһа хүргэжэ, дэмжэжэ байхабди гэжэ мэдүүлээ.