Буряад Уласта хониной түл абалгын халуун хаһа эхилэнхэй. Хори аймагай “Баянгол” гэжэ хүдөө ажахын үйлэдбэридэ 7 мянга гаран хонидһоо хурьгад абтаха ёһотой.
Тус сомондо совет үедэ ганса адуу мал үсхэбэрилэгдэдэг байгаа. 1993 онһоо хойшо эндэ хонин ажал эрхилэлгэдэ анхарал хандуулагдана. Хори аймагай захиргаанай хүдөө ажахын таһагай хүтэлбэрилэгшэ Виктор Хабитуевай хөөрэһөөр, эндэхи мэргэжэлтэд мэдээжэ эрдэмтэдтэй хамта Хитадай Үбэр Монголһоо 550 хони болон 26 хуса асарһан байна. Тэдэнь буряад үүлтэрэй хонид.
- 2000-аад онуудһаа хойшо үрэжүүлгын ажал эмхидхэгдэжэ эхилээ. Тиигэжэ бүдүүн нооһотой “Бүүбэй” гэһэн буряад үүлтэрэй хонин гаргагдажа, 2008 ондо энээн тухай үнэмшэлгэтэй болообди, - гэжэ Виктор Хабитуев хөөрэнэ.
Энэ ажалай эршэтэйгээр ябуулагдаһанай ашаар 17 гүүртэдэ хонишод хүдэлнэ. Эдэ бүхы Үдэ голой эрьеын тала дайдаар тараагданхай. Һүүлэй мэдээгээр, бүхы дээрээ 9 мянга гаран хонид, тэрэ тоодо 7 мянган “бүүбэй” тоологдоно.
Баянгол һууринһаа холо бэшэ Хүйтэн Булаг гэһэн газарта Зорикто ба Аяна Намдаковтанай гэр бүлэ түбхинэнхэй. Тэндээ гэр баряад, ажабайдалаа таарамжатайгаар зохёонхой. Зайн галда тэдэ һалхинай хүсэ хэрэглэнэ. Мүн наранай элшээр хүдэлдэг батарейнүүд газаань табигданхай. Тиимэһээ тэдэ тиимэ ехээр зайн галай түлөө мүнгэ гаргашалнагүй.
Хонишодой хэлэһээр, үнгэрһэн үбэл саһан багаар орожо, эртэ хабар хайлаа. Мүнөө дээрээ хониной шэмхэлхэ хагда бии. Энэ гүүртэ дээрэ түл абалгын хаһа апрелиин 10-һаа эхилээ. Түрүүшын 2-3 үдэр 50 хонид хурьгалаа. Нэгэ хэды хонид эхирлэһэн байна.
Түсэбэй ёһоор, майн тэнгээр түл абалга түгэсэхэ.