Һур харбаан
Марафон (Греци). Залуушуулай дунда Европын Кубогта хүртэхын түлөө мүрысөөнэй түрүүшын шатада Буряадаймнай тамиршад дүрбэн медаль абаба.
Эндэ Эрдэм Цыдыпов (гэрэл зураг дээрэ) хоёр медальда хүртөө. Хубиин тоосоондо тэрэ гурбадахи һуури эзэлээ. Мүн командна тоосоондо баһа хүрэл медальда хүртөө.
Командна тоосоондо Ородой тамиршад хоёр алтан медаль абаһан байна. Тэдээнэй тоодо Түнхэн аймагһаа уг гарбалтай Виктория Харитонова болон Найдан Сушкеев гэгшэд оролсоно.
Футбол
Улаан-Үдэ. Һайн дуратайшуулай командануудай дунда Сибириин Кубогта хүртэхын түлөө мүрысөөнэй эхин шата үнгэргэгдэжэ эхилэнхэй. Тиигэжэ Улаан-Үдэ хотодо гурбан үдэрэй туршада “Г” бүлэгэй нааданууд болобо.
Эрхүү хотын “Зенит-М” командые 5:0, энэл хотын “Байкал-М” гэгшые 3:1, мүн Шэтэ хотын “Чита-М” 2:1 гэһэн тоотойгоор “Бурятия” командынхид гурба дахин шүүжэ, түрүүшын һуури эзэлжэ гараа. Эдэ наадануудта “Бурятия” командын добтологшо Андрей Белобородов таба дахин бүмбэгэ оруулаа. Тиихэдэ Алексей Рябованов гурба дахин гол харуулаа.
Удаадахи дүрбэнэй нэгэдэхи финалай уулзалгануудта манай футболистнууд Красноярск хотын “Енисей-М” командатай наадаха. Эдэ уулзалганууд июниин 10 болон 12-то үнгэргэгдэхөөр хараалагдана.
Барилдаан
Владикавказ. 21 наһа хүрөөдүй залуушуулай дунда Ородой чемпионадта Буряадаймнай тамиршад хоёр медальда хүртэбэ.
СССР-эй мэдээжэ барилдаашан Сослан Андиев эдэ үдэрнүүдтэ 65 наһа гүйсэһэн байна. Тиимэһээ тус мүрысөөн суута тамиршанай нютаг болохо Владикавказ хотодо үнгэргэгдөө.
Хэжэнгэһээ уг гарбалтай Андрей Гатаулин 55 килограмм хүрэтэр шэгнүүртэ хүрэл медальда хүртөө. Чечен Уласай болон Дагестанай хоёр хүбүүдые илажа гараад, хахад финалай уулзалгада хибэсэй эзэн Алик Хадарцевтай ана-мана тэмсэһэн байна. 2:2 гэһэн тоотойгоор дүүрэһэн барилдаанай удаа Владикавказай түлөөлэгшэ шүүгээ гэжэ элирээ. Гурбадахи һууриин түлөө уулзалгада Андрей Тыва Уласай тамиршаниие илажа гараа.
96 килограмм хүрэтэр шэгнүүртэ спортдо дуратайшуул Юрий Власкодо ехэ найдаһан байна. Нэн түрүүн тэрэ Дагестанай болон Хойто Осети- Алани Уласай хоёр барилдаашадые шүүһэн байна. Хахад финалай уулзалгада Ханты-Мансийскын түлөө барилдадаг Батырбек Цакуловта 8:12 гэһэн тоотойгоор булигдаба. Үшөө нэгэ Владикавказай барилдаашаниие шүүгээд, Юрий Власко хүрэл медаль абаба.
Баскетбол
Пермь. “Кэс-баскет” гэһэн бүхэроссиин түсэлэй финалда Улаан- Үдын команда амжалтатайгаар хабаадажа ерэбэ.
Энэ мүрысөөндэ һургуулиин үхибүүд наадана гэжэ хэлэлтэй. Улаан-Үдын 32-дохи һургуулиин шабинар Буряад Уласай болон Сибириин федеральна тойрогой мүрысөөнүүдтэ илажа гараад, һүүлшын наадануудта хабаадаха эрхэдэ хүртөө. Энэ мүрысөөндэ тэдэ зургаан нааданай табыень шүүжэ гараад, гурбадахи һуури эзэлбэ.
Тхэквондо (МФТ)
София (Болгари). Ород гүрэнэй суглуулагдамал командын бүридэлдэ Буряадай хэдэн тамиршад оруулагдажа, Европын чемпионадта хабаадаба.
Түрүүшын үдэр 14-17 наһатай тамиршадай дунда Дмитрий Петухов алтан медальда хүртөө. Антон Шмаров хоёрдохи һуурида гараа.
Мүрысөөнэй хоёрдохи үдэр Екатерина Борошноева болон Елена Харжеева гэгшэд мүнгэн болон хүрэл медальнуудые абаһан байна.
Гурбадахи болон дүрбэдэхи үдэрнүүдтэ Андрей Абарников шалгараа. Тэрэ хубиин тоосоондо хоёрдохи һуури эзэлээ. Мүн командна тоосоондо чемпионой нэрэ зэргэдэ хүртөө.
Дмитрий Петухов һоригшо Владимир Николаевтай