Монгол сайхан ороной Дорнод аймагай Дашбалбар нютагта түрэһэн хүм. Лэглүүд хүбдүүд омогойб. Дугарсэрэнтэнэй аша гээд наһатай зон намайе мэдэдэг. Батхуягай басаганби, Дашханда эжытэйб. Худанса Шарайдай зээб.
Мүнөө Улаанбаатар хотодо ажаһуунаб. Уянгын долгин сэдьхэлдэм ерээд, яахашье аргагүй бэшэхэ дурам хүрөөд, түрэһэн-гараһан тоонтоёо дурдан, эдэ мүрнүүдые зорюулбаб. Буряад уншагшадта энэ уянгаяа дамжуулха дурам аргагүй хүрөө юм.
“БИ”
Дуулажа үдэһэн хониной бэлшээри,
Дааража шэрхижэһэн сомоной харгы,
Дүүлижэ жүдхэһэн хурдан хүлэг,
Дасажа хайрлаһан сагаан тэмээн,
Замдаа һаатаһан нютагай арад,
Замбаагаа хубааһан хүршымни хүүгэд,
Загаһа жараахайтай Улза, Саяг,
Захижа хэлэһэн хүгшэдэй һургаал,
Эсэгын агнаһан ангай мяха,
Эжын хэһэн амтатай эдеэ,
Эрхэлжэ үдэһэн хүгшэн эжымни,
Эжэлжэ нүхэрлэһэн хайрата абжаамни,
Наадатай энеэдэтэй Наадам, Сагаалган,
Нарьяа шууяатай үеын нүхэд,
Нохойн хушуу, үлир, мойһон,
Намайе гоёоһон буряад хубсаһан,
Уйлуулжа, дуулуулһан хурдан хүлэгүүд,
Уяраажа мэлмэрүүлһэн арадай дуунууд,
Урлагта татаһан сомоной клуб,
Ухааем тэлиһэн һургуулиин багшанар –
Эгээл би таанадаа уйгаргүйгөөр
һанадагби,
Эрьежэ ошоо һаа гэжэ жүдхэдэгби.
Ардаг мориной нюрганда бишыхан
наһам үнгэрөө,
Аба эжы хоёртоо эрхэлжэ,
наадажа үндыгөөб.
Айлай томо хүүгэн хадаа ажалда
яһала дадааб.
Арад олон зондоо туһа хүргэхэ хүсэлтэйб.
Арадай һайхан дуунда зосоогоо
уужаруулжа тэниидэгби,
Аалихан зөөлэхэн зантай
нютагай хүгшэдөө һанадагби...
Лэглүүд Хүбдүүд Батхуягай
НОМИН-ЭРДЭНЭ