​Монголдо шалгараа

«Mongolia Open - 2017» гэһэн уласхоорондын мүрысөөндэ Буряадаймнай барилдаашад амжалтатайгаар хабаадаба. Тэдэ хоёр алтан, хоёр мүнгэн болон гурбан хүрэл медальнуудта хүртэбэ. 

Уласхоорондын барилдаанай эмхиин (UWW) бүридэлдэ оруулагдаһан энэ мүрысөөн олон жэлэй туршада үнгэргэгдэнэ. Монгол ороной нээмэл чемпионадта заншалта ёһоороо арба гаран гүрэнэй барилдаашад хабаададаг юм. Мүн тиихэдэ Монголой түрүү абарганууд бэеэ туршана. Мүрысөө харахаяа арад зон олоороо суглараа. 

Буряадаймнай бүхэшүүл Евгений Жербаев болон Балдан Цыжипов гэгшэд өөр өөрынгөө шэгнүүртэ һайн барилдаа харуулжа, алтан медаль болон мянган доллар шангуудта хүртэбэ. Нина Менкенова болон Алдар Бальжинимаев гэгшэд шангай хоёрдохи һуури эзэлһэн байна. Буряадай үшөө гурбан тамиршан хүрэл медальнуудые абаба. Эдэ хэд бэ гэбэл, Стальвира Оршуш, Ульяна Тукуренова болон Андрей Гатаулин гэгшэд болоно. Буряадай тамиршадай дундаhаа Раджана Васильева, Алёна Сангадиева, Лидия Очирова, Наиля Абзалова, Агван Шадапов, Алексей Боровицкий болон Юрий Власко Улаан-Баатарай хибэс дээрэ табадахи һуури эзэлээ гээд хэлэхэ хэрэгтэй. 

Өөрынгөө талмай дээрэ Монголой эрэшүүл дүрбэн алтан медаль абаа. Үшөө тиихэдэ Красноярск хотын Семён Терешенко болон аяар холо Венесуэлэ гүрэнэй Хосе Диас Роберти гэгшэд түрүүлһэн байна. Тус мүрысөөндэ Монголой зургаан эхэнэрнүүд нэгэдэхи һуури эзэлээ. Ород гүрэнэй Валерия Чепсаракова болон Хитадай Чандаганцагаан гэгшэд баһа түрүү һуурида гараа. “Буянт-Ухаа” гэһэн спортын ордондо болоһон тэмсээндэ 182 барилдаашан хабаадаа.