906
Апрелиин 24-һөө майн 1 болотор Англиин Ливерпуль хотодо тхэквандогоор Европын чемпионат үнгэргэгдэһэн байна. Энэ мүрысөөндэ 31 гүрэнүүдэй 820 тамиршад хабаадаба.
Ородой Холбоото Уласай суглуулагдамал командын бүридэлдэ Буряад Уласаа 6 тамиршад түлөөлөө. Спортын габьяата мастер Евгений Оцимик, спортын мастернүүд Александр Бодров, Юлия Цыбикова (Павлова) гэгшэд болон бусад залуу тамиршад мүрысөөндэ хабаадаба. Тэдэнэр 2 алтан, мүнгэн болон хүрэл шангуудта хүртэбэ.18 наһанһаа дээшэ 64 кг хүрэтэр шэгнүүртэ эрэшүүлэй дунда Александр Бодров, 16-17 наһатай, 51 кг болотор шэгнүүртэ Антон Сердюков хоёр алтан медальнуудта хүртэбэд. Евгений Оцимигтэ нэгэ балл дуталдажа, тэрэ мүнгэн шан абаба. Дарья Петрова хүрэл шанда хүртэбэ.
Майн 5-6-най үдэрнүүдтэ Буряад Уласай спортын-тамирай байшанда 13-дахияа үнгэргэгдэхэ тхэквандогоор Уласхоорондын “Байгалай кубок” гэһэн мүрысөөндэ эдэ тамиршад хабаадаха юм.Энэ урилдаанда Хабаровск, Красноярск, Новосибирск, Ачинск хотонуудһаа болон хүршэ Монгол гүрэнһөө тамиршад ерэхэ. Монголой суглуулагдамал командын бүридэлдэ 70-аад хүн оронхой. Тэдэнэй дунда Азиин чемпионууд болон шанда хүртэһэн тамиршад олон.
