802
Буряад Уласай Толгойлогшын уялга дүүргэгшэ Алексей Цыденов албанай хэрэгээр Тарбагатай аймагаар ябахадаа, “Байкал Старовер” гэһэн аяншалга хүгжөөлгын түсэл хаража, тэрэниие үндэрөөр сэгнэбэ.
“Байкал Старовер” гэһэн түсэл Ородой Холбоото Уласай “Развитие внутреннего и въездного туризма” гэһэн федеральна программада оруулагданхай. Энэ түсэлөөр Тарбагатай, Десятниково, Большой Куналей һууринуудай газар дайдада аяншалгын хангалгын байгууламжа хүгжөөхэ зорилготой юм. Айлшадай, аяншалагшадай хонохо, эдеэ хоол бариха газарнуудые, худалдаа наймаанай түбүүдые, дурасхаалай бэлэгүүдые наймаалха газарнуудые, шүтөөнэй болон музейн комплекснүүдые бариха хэрэгтэй. Тарбагатай аймагта Үбэр Байгалай шэмээшэгүүд олоороо ажаһуудаг. Буряад Уласта шэмээшэгүүдэй ажаһуудаг нютагууд уласаймнай аяншалгын һонирхолтой замуудай нэгэн болонхой.
Үшөө тиихэдэ, Алексей Цыденов залуушуултай болон спортын талаар эдэбхитэдтэй уулзаһан байна. Тэдэнэр һургуулинуудта долоон хоногто 3 дахин бэеын тамирай хэшээлнүүдые үнгэргэхэ тухай дурадхал оруулба. Энэ асуудалаар ажал ябуулха тухайгаа Буярад Уласай Толгойлогшын уялга дүүргэгшэ Алексей Цыденов мэдүүлбэ. Уулзалгын үедэ юугээр һонирходог тухайнь залуушуул асууба.
- Дуу дулаха дуратайб. Буряад Уласта дууша арад ажаһуудаг - гэжэ Алексей Самбуевич хэлэжэ, залуушуултай хамта Буряад Уласай гимн дуулаба.
Анна Огороднигой гэрэл зураг.
