1123
Амаралтын үдэрнүүдтэ интернет сүлжээндэ “Британия ищет таланты” («Britain’s got talent») гэһэн хэмжээ ябуулгын ээлжээтэ выпускын видео-буулгабари харуулагдаһан байна. Тэндэ “Изгиб Ангары”- “Angara Contortion” гэһэн нэрэтэй Буряад Уласай уян нугархай басагадай бүлэг бэлиг талаангаа гэршэлбэ.
Басагадай тайзан дээрэ гараахада, хаанаһаа ерээбтэ гэжэ шүүгшэд һонирхобо.
- Бидэ Ород гүрэнэй Буряад Улас түлөөлнэбди. 6 саг соо Москва хүрэтэр, удаань 3-4 сагай турашада Великобритани хүрэтэр самолёдоор ерээбди, - гэжэ англи хэлэн дээрэ басагад харюусаба.
Нэгэ доро 4 басагад хүл гараа, бүхы бэеэ хүгжэм доро хүнүүдэй гайхама, сошордомоор нугалжа, харагшадай болон шүүгшэдэй зүрхэ, сэдьхэл доһолгобо. Басагадай бэлиг талаан, тэдэнэй уян нугархай бэенүүдынь хаража гайхаһан бүхы харагшад һууринуудһаань бодожо, нэрьемэ халуун альга ташалгаар “Angara Contortion” гэһэн бүлэг дэмжэбэ. “Radiotimes” гэһэн радиогой мэдээсэһээр, шүүгшэ Дэвид Уоллиамс басагадай асари ехэ бэлиг талаантай байһандань бахардажа, энэ хэмжээ ябуулгада эгээл гайхалтай юумэ хараһан тухайгаа тэрэ тэмдэглэбэ.
Буряад Уласай уян нугархай басагад Хойто Америкэдэ суута дю Солей циркын бүридэлдэ амжалтатайгаар тоглолтонуудта хабаададаг юм.
“Британия ищет таланты” гэһэн хэмжээ ябуулга 2007 ондо эхилһэн юм. Эндэ наһанай, бэлиг шадабариин талаар ямаршье хизаарлаалтагүйгөөр хүн зон хабаададаг байна.
Буряад Уласай Соёлой яаманай сайтһаа гэрэл зураг абтаба.
