783
2017 оной майн17-һоо 19 хүрэтэр Улаан-Үдэдэ “Юрэнхылэгшын тамирай нааданууд” гэһэн Бүхэроссиин тамирай нааданай уласай шата багшанарай колледждо үнгэргэгдэхэ. Энэ хэмжээ ябуулга “Единый день ГТО!” гэһэн уласай акцитай холбоотой юм.
Тамирай наадануудта Буряад Уласай аймагуудай бүхы һургуулинуудай 2004-2005 оной һурагшад хабаадаха болоно. “Юрэнхылэгшын тамирай нааданууд” болон “Юрэнхылэншын тамирай мүрысөөнүүд” гэһэн хэмжээ ябуулганууд дүрбэн шатаһаа бүридэнэ. Һургуулинуудай, аймагуудай, уласай болон бүхэроссиин хэмжээндэ мүрысөөнүүд үнгэргэгдэдэг байна.
Тамаралга, баскетбол (3х3), шэрэйн теннис болон хүнгэн атлетикээр һурагшад “Юрэнхылэгшын тамирай наадануудта” мүрысэхэ юм. Жэл бүри уласай хэмжээнэй урилдаанда 15-16 бүлэгүүд хабаададаг. Мүнөө жэлэй командануудай бүридэлдэ 5- дахи классуудай һурагшад ороно.
“Юрэнхылэгшын тамирай мүрысөөнүүдтэ” теориин, зохёохы конкурснуудай дүнгүүдээр, тамирай нааданууд болон эстафетэ гүйлдэжэ, илагшад элирүүлэгдэхэ юм. Юрэнхылэгшын мүрысөөнүүдтэ һургуулинуудай нэгэ классай һурагшад хабаадаха. 2017 ондо 2002-2004 онуудай һурагшад хаба шадалаа туршалсаха болоно.
Ородой Холбоото Уласай Юрэнхылэгшын 2010 оной июлиин 30-най 948-дахи тогтоолоор “Юрэнхылэгшын тамирай нааданууд” болон “Юрэнхылэгшын мүрысөөнүүд” гэһэн тамирай уласай хэмжээ ябуулгануудые Буряад Уласай Болбосоролой болон эрдэм ухаанай яаман 2011 онһоо хойшо эмхидхэдэг юм. Жэл бүри тамирай наадануудта хабаадаха дуратайшуул олон болоно.
Бүхэроссиин мүрысөөнэй түгэсхэлэй шата “Орлёнок” болон Краснодарска хизаарай “Смена” гэһэн хүүгэдэй түбүүдтэ сентябрь һарада үнгэргэгдэдэг байна. Жэл бүри можо нютагуудай хэмжээндэ илаһан команданууд эндэ сугларжа, хаба шадалаа туршалсадаг.
Буряад Уласай Болбосоролой болон эрдэм ухаанай яаманай сайтһаа гэрэл зураг абтаба.
