​Арадай Хуралай һунгамал Владимир Павловай шан

Буряад Уласай Арадай Хуралай һунгамал Владимир Павловай шангуудта хүртэхын түлөө гар бүмбэгөөр (волейболоор) мүрысөөн Бэшүүр аймагта үнгэргэгдэбэ. 

Апрелиин 29-дэ Бэшүүр аймагай түб һуурин Бэшүүр нютагта гар бүмбэгөөр долоодохи мүрысөөн эмхидхэгдэжэ, түүхэдэ оробо. Агуу Илалтын мандаһаар 72 жэлдэ зорюулан, Буряад Уласай Арадай Хуралай Түрүүлэгшын орлогшо Владимир Павлов заншалта ёһоороо гар бүмбэгөөр наадаха дуратай тамиршадые ээлжээтэ удаа урмашуулба гээшэ.

- Мүнөөдэрэй тулалдаанууд ехэ удха шанартай, - гэжэ Владимир Анатольевич сугларагшадта һануулба. - Эсэгэ ороноо хамгаалгын Агууехэ дайнда хабаадаһан, дайнда унажа, гэртээ бусаагүй нютагаархидайнгаа дурасхаалда зорюулжа, спортын энэ һайндэр эб хамта бүтээжэ байна гээшэбди. Нэн түрүүн бидэнэр энэ һайндэрөө залуушуулда зорюулнабди. Таанар, залуушуул, манай үбгэ эсэгэнэр хүндэ хүшэр дайнда ганса зэбсэгэй хүсөөр бэшэ, харин Эхэ орондоо үнэн зүрхэнһөө дуратай байһанайнгаа ашаар илалта туйлаа гэжэ ойлгохо ёһотойт. 

Эсэгэ ороноо хамгаалгын Агууехэ дайнай дүлэтэ жэлнүүдтэ Буряад Уласһаа 120 гаран мянган хүн дайсантай тэмсэхэеэ мордоо. Буряадай 43700 сэрэгшэд баатарай үхэлөөр унаа. Мүнөөдэрэй тоо баримтануудаар, уластамнай дайнда хабаадаһан 557 хүн ажаһууна. Дайнай ара талада хүдэлһэн 10700 хүн мэндэ ябана. Иимэ баримтануудые Владимир Павлов олоной һонорто дуулгаба. 

Спортын һайндэрэй тон хүндэтэй айлшад болоһон зониие дурдалтай. Эдэ хэд бэ гэхэдэ, ара талын ветеранууд Фёдор Ермилович Ефимов, Пётр Сидорович Алексеев, Бэшүүр аймагай Ветерануудай зүблэлэй түрүүлэгшэ Ермолай Трофимович Григорьев гэгшэд болоно. 

Гар бүмбэгөөр Бэшүүртэ түрүүшын мүрысөөн 2010 ондо болоо бэлэй. Тэрэ гэһэнһээ хойшо тус мүрысөөн Буряад Уласай спортын литэдэ бата һуури эзэлнэ. Заншалта ёһоороо Бэшүүртэ олон тамиршад ерэдэг. Нютагай зон эдэбхитэйгээр хабаададаг. Улаан-Үдын команданууд энэ мүрысөөндэ эдэбхитэйгээр хабаададаг байна. Тиимэһээ хүдөөгэй хэмжээндэ эхилһэн мүрысөөн удангүй уласай хэмжээндэ гараа ха юм. Харин энэ жэлдэ Бэшүүр, Хяагта аймагуудай, Улаан-Үдэ хотын эрэшүүлэй 8, эхэнэрнүүдэй 9 баг команданууд халуун тэмсээндэ оробо. 

Эхэнэрнүүдэй командануудай тоосоондо Бэшүүр аймагайхид (олзын хэрэг эрхилэгшэ Будаев) илалта туйлаба. Шэбэртэ нютагай эбтэй команда хоёрдохи һуурида гараба. Гурбадахи һуури Хяагтын команда эзэлбэ. Эрэшүүлэй дунда нютагай хүбүүд (олзын хэрэг эрхилэгшэ Будаев) ялас гэмэ амжалта туйлаба. Шэбэртын эрэшүүл хоёрдохи һуури эзэлээ. Харин хүндэтэй гурбадахи һуурида Улаан-Үдын «Лика» гэжэ баг команда гараа. Үндэр амжалта туйлаһан хүбүүд, басагадые урмашуулха зуураа Владимир Павлов мүнгэн туһаламжа үзүүлһэн зондоо үнэн зүрхэнэй баяр хүргэбэ. Буряад Уласай Арадай Хуралай һунгамал Александр Савельев, Бэшүүр аймагай захиргаанай дарга Олег Фёдоров гэгшэд эндэ хабаадаа.