1013
2017 оной июниин15-һаа 18 хүрэтэр Эрхүү можын Ойхон аймагта “Ёрдын наадан” гэһэн Уласхоорондын фестиваль 6-дахияа үнгэргэгдэхэ.
“Евразиин арадуудай олимпиин нааданда” Буряад Уласаа түлөөлхэ тамиршад элирүүлэгдээ. Һур харбалгаар Ородой Холбоото Уласай спортын мастернүүд Мэргэн Ринчинов, Цырен-Доржи Магаков, Ринчин Хандажапов, Белигто Цыремпилов, Доржи Дамдинов гэгшэд мүрысөөндэ хабаадаха. Шулуу шэрэхэ урилдаанда Буряад Уласай мэдээжэ пауэрлифтер Василий Лихачев хаба шадалаа туршаха юм. Тамир Гасанов (60 кг хүрэтэр шэгнүүртэ), Владимир Таранов (70 кг хүрэтэр шэгнүүртэ), Илья Мошкин (80 кг хүрэтэр) мас-реслинг (модо татаха) мүрысөөндэ эдиршүүлэй дунда туршалсаха болобо. Эрэшүүлэй дунда энэ мүрысөөндэ Жаргал Гомбоев (70 кг хүрэтэр шэгнүүртэ), Александр Потёмкин (80 кг хүрэтэр шэгнүүртэ), урда наадануудай илагша Артём Степанов (80 кг дээшэ шэгнүүртэ) хабаадаха юм.
Яхад һүрэлгөөр урда нааданда шанда хүртэһэн Николай Чанцев болон Игорь Соболев гэгшэд урилдаха. Үшөө тиихэдэ, шатар нааданда 2 хүн, бүхэ барилдаагаар 9 хүнһөө бүридэһэн команданууд суглуулагдажа байна.
Буряад Уласай Хүдөө ажахын болон эдеэ хоолой яаман нооһо хайшалгада хабаадаха хүниие бэлдэнэ.
Ёрдын наадан хадаа Евразиин арадуудай Олимпиин наадан болоно гэхэдэ алдуу болохогүй. Мартагдаад байһан хэмжээ ябуулга олониитын оролдолгоор һэргээгдэһэн юм. 2001 ондо Сибириин арадуудай нангин шүтөөн газарта, Байгал далайһаа холо бэшэ, Ойхон аймагта түрүүшын наадан эмхидхэгдэһэн байна. Хоёр жэлэй нэгэ дахин энэ фестиваль үнгэргэхэ тухай шиидхэбэри абтаһан юм. Түүхын хуудаһануудые ирабал, урданай сагта хабарай ажалай түгэсэхэдэ, тус наадан болодог байгаа. Харин үшөө урданай домогоор Алтан Шаргай хаан эндэ ажаһуудаг зониие шүдхэрнүүдһээ абарһан байна. Энэ ушараар 30 үдэр соо наадан үнгэрдэг һэн.
2013 ондо Ёрдын наадан ЮНЕСКО эмхиин хэмжээ ябуулгануудай литэдэ оруулагдаа. 2016 ондо Бүхэроссин һонирхолтой аяншалгын мүрысөөндэ “Арадай ёһо заншал” гэһэн номинацида энэ хэмжээ ябуулга лауреат болоһон байна.
Ёрдын нааданай үедэ 2-дахин эрдэмэй-зохёохы конференци үнгэргэгдэһэн юм. Эндэ Великобритани, Германи, Монгол, Хитад гүрэнүүдэй, Ородой Холбоото Уласай нютаг можонуудай, Буряад, Саха (Яхад) уласуудай Засагай газарнуудай түлөөлэгшэд, эрдэмтэд олоороо хабаадаһан байна.
Үшөө урдандаа Ёрдо хадын хормойдо ёохор наадан дэлгэрдэг һэн. Хадаяа хэдэн дүхэриг болон орёожо,эндэхи зон 6 үдэр хатарагша бэлэй гэжэ түүхэдэ бэшэгдэнхэй.
Ёрдын наадан сайтһаа гэрэл зураг абтаба.
