Ородой Холбоото Уласай Юрэнхылэгшэ Владимир Путин Эрхүү хотодо майн 15-да можо нютагуудта тохёолдоһон онсо байдалай асуудалнуудай талаар зүблөө үнгэргэбэ. Уһанһаа болон түймэрнүүдһээ хохидоһон Уралай, Сибириин болон Алас Дурна зүгэй федеральна тойрогуудай түлөөлэгшэд эндэ хабаадаһан байна.
Буряад Уласай Толгойлогшын уялга дүүргэгшэ Алексей Цыденов Байгалай эрье зубшан гарадаг Улаан-Үдэ – Баргажан зүгэй харгы заһабарилха тухай дурадхал оруулба. Владимир Путин Ородой Холбоото Уласай Транспортын яаманда энэ асуудалаар ажал ябуулжа, хоёр долоон хоногой туршада тусхай шиидхэбэринүүдые абаха дансануудые бэлдэхэ тухай даабари үгэбэ.
- Улаан-Үдэ – Баргажан зүгэй харгыда заһабарилагдаагүй хэһэг бии. Энэ харгы заһабарилха арга боломжонуудые хаража үзыт. Һайн шанартай харгытай болобол, хүдөө нютагуудай ажабайдал һайжаруулха талаар олон асуудал шиидхэгдэхэ, - гэжэ Буряад Уласай Толгойлогшын уялга дүүргэгшэ Алексей Цыденов хэлэбэ.
Энэ харгын заһабарилга Байгалай болон Алас Дурна зүгэй хүгжэлтын программада оруулагдаһан байгаа, теэд тэрэ программа мүнөө түгэсэнхэй гэжэ Ородой Холбоото Уласай Транспортын сайд Максим Соколов тэмдэглэбэ. Тиигэбэшье хоёр долоон хоногой туршада энэ асуудалаар ажал ябуулагдажа, шиидхэбэри абтаха гэжэ сайд найдуулба.
Кremlin.ru сайтһаа гэрэл зураг абтаба