​Гурбан сая хэмжээнэй гүрэнэй туһаламжа

Залуу малшанда 3 сая түхэриг энэ жэлдэ Буряад Уласай Хүдөө ажахын болон эдеэ хоолой яаманай зүгһөө олгогдохо. Горитой энэ тэдхэмжэдэ хүртэхын тула мал ажахы байгуулһан залуу айлнууд грантнуудай мүрысөөндэ хабаадажа байна. Һүүлэй табан жэлэй туршада таһалгаряагүй бэелүүлэгдэжэ байһан иимэ мүрысөөнэй ашаар ганса Ярууна аймагта бата бэхеэр түбхинэһэн ажахынуудай 12 залуу эзэд ажалдаа хэрэгтэй трактор, тэрээндэ шагтагалагдадаг техникэ худалдажа абаа, үхэр малаа эрид олошоруулаа, һаамхай үнеэ баридаг зониинь һү болбосоруулха шэнэ оньһон хэрэгсэлнүүдээр ажахынуудаа хангаа, таряа таригшад һайн шанартай үрэһэ худалдажа абаа, тэрэнээ хадагалха зохид байдал грантын мүнгөөр түхеэрһэн байха юм.

Мүнөө жэлдэ Вера Симонова грантнуудай мүрысөөндэ хам оролсобо. 2003 ондо хадамда гараһанһаа хойшо хани нүхэртэеэ хамта түрэл тоонто нютаг дээрээ үмсынгөө мал олошоруулха гэжэ залуу айл шиидээ һэн. Тэрэ гэһэнһээ хойшо арба һайса гаран жэлэй туршада эбтэй бүлэ мал ажалда забда забгүй һалирнад. Эсэшэ сусашагүйгөөр хэһэн ажалайнгаа ашаар мүнөө Симоновтэн өөрын мэдэлэй хоёр гүүртэтэй болонхой. Наһан ута, һанаан хэнтэг һэн тула малшад малаа бүри олон болгохо түсэб табинхай.

- Мүнөө сагта малшан гээшэб гээд, һанаа амар ябажа болохогүй. Мүнөөнэй малшан олон шэглэлээр мэргэжэлтэн байха ёһотой. Үхэр малай үбдөө һаань, өөрөө аргалаадхиха байбал эрхим, мяха наймаалха хэрэгэй гараа һаань, наймаашанай эрдэм мэдэжэ ябахада, хэзээшье үлүү байдаггүй. Үглөөдэр эдихэ өөхэн тухайгаа бодохын хажуугаар арбан жэлэй үнгэрхэдэ, ямар ажал хэхэеэ эртээнһээ мэдээд ябаха ёһотой байнабди. Байхын бараасаар лэ малаа олон болгожо болохогүй. Ямар түл хэзээ хэрэг болохоб гэжэ эртээнһээ мэдэжэ ябаха зэргэтэйбди. Үшөө тиихэдэ нютагайнгаа хүн зонтой үгэеэ ойлголсожо ябахамнай эгээл шухала зүйл гэжэ һананаб, - гэжэ Вера Симонова ехэл абааштайгаар дуугарна. 

Симоновтэн залхуурха гэжэ мэдэдэггүйл даа. Эгээл тиимэ хадань тэдэнэй үмсын ажахыда адуун һүрэг, сагаан бүмбэр хонид, үхэр мал жэл ошохо бүри үдэһөөр үдэжэ байнал хаш. Иимэ олон малтай байгаад, Симоновтэн Буряад Уласта харагдаа үзэгдөөгүй гэрэй амитадые тэжээжэ, элдэб шалгалтануудые хэжэ үрдинэд. Ажалша бүхэриг иимэ хүнүүдтээ нютагайнь ажахынууд, Ярууна аймагай захиргаан шадаха зэргээрээ дэмжэдэг, туһалдаг байна. Тиин мал бариха гэжэ зориһон залуушуулда бэлшээри, сабшалан гаргажа үгэнэ. Захиргаанай мэргэжэлтэд залуу фермернүүдтэ грантнуудай мүрысөөндэ ороходонь, мэргэн зүбшэлөөр туһална, саарһа дансануудыень бэлдэлсэнэ.