939
Үргэлжэ нэмжыһэн үрэжэлтэ таладаа хүсэ шадалаа нэмээн, нютагаархинтаяа золгохоёо, хэмжээ ябуулгануудтань хабаадалсахаяа Мухар-Шэбэрээ эрьежэл байдаг Буряад Уласай Арадай Хуралай һунгамал Зоригто Цыбикмитов үнгэрһэн жэлдэ нютагайнгаа эдиршүүлые дэмжэһэн «Бэлигэй һолонго» гэжэ мүрысөө даажа абаһан юм.
Эндэ аяар 180-яад бэлигтэйшүүл хабаадаһан байгаа. Энэ мүрысөөгөө заншалта болгохо хүсэлтэй байһанаа мүнөө мэдүүлнэ.
- Ганса дуулаха, хатарха бэшэ, харин ондоошье талаар бэлигтэй үхибүүдые хабаадуулха зорилго урдаа баряабди. Тиигэжэ тус урилдаан ехэ һонин болоо. Гайхалтайнь гэхэдэ, бээлэйн шэнээн бэетэй аад, рассказ бэшэжэрхихэ багашуул байгаа һэн, - гэжэ Зоригто Лубсанович хөөрэнэ.
Теэд энэ мүрысөөнһөө гадна дуушадай дунда «Түгнын талын алтан гургалдай» гэжэ урилдаа аяар арбаад жэлэй туршада Зоригто Цыбикмитов харгалзалжа ябана. Энэнь нютагайнгаа абьяас бэлигтэйшүүлые үргэһэн ёһотой һайндэр болодог бшуу.
Зоригто Лубсанович гансал соёлой һалбарида онсо анхаралаа хандуулдаггүй. Буряад Уласай Арадай Хуралай Бюджедэй, налогуудай болон сан жасын талаар хороониие ударидажа ябадаг һэн тула аймаг руу шэглүүлэгдэһэн бүхы мүнгэнэй ябасые мэдэдэг. Мүнөө аймаг дотор хэгдэжэ байгаа бүхы барилгануудта, тэрэ тоодо Мухар-Шэбэр тосхондо соёлой шэнэ байшан бодхоолгодо мүн лэ хабаадаһан.
- Суулга һууринда баригдажа байһан спортын шэнэ байшан һуралсалай жэлэй урда тээ ашаглалгада тушаагдахань. Энэ хэрэгтэ 15 сая түхэриг һомологдонхой. Спортын танхим Суулга һууринда урид байгаагүй юм, - гэжэ Зоригто Цыбикмитов урматайгаар тэмдэглэхэ зуураа, иигэжэ нэмэнэ: - Үшөө 10 сая түхэриг аймагай һургуулинуудай байшан заһабарилгада шэглүүлэгдэнэ.
Нютагайхидтаа мээхэй Зоригто Цыбикмитов аймагай хүгжэлтын түлөө оролдодог, бүхы байдалыень зосоо талаһаань һайн мэдэдэг. Олон жэлдэ аймагай засаг даргын орлогшоор хүдэлһэн З.Л.Цыбикмитов 2007 ондо олоной дуугаар Буряад Уласай Арадай Хуралда һунгагдаһан гээшэ.
«Намда найдажа, дуугаа үгэһэндэнь нютагаархидтаа ходо баяртай ябадагби», - гэжэ Зоригто Лубсанович тэмдэглэнэ.
Автор: Сарюуна ЭРДЫНЕЕВА
