​Арадай Хуралай болон аймагуудай һунгамалнууд Мухар-Шэбэртэ зүблөө үнгэргэбэ

Мүнөөдэр Буряад Уласай Арадай Хуралай үүсхэлээр Мухар-Шэбэр аймагай түб һууринда арадай һунгамалнуудай аймагууд хоорондын тусхай зүблөөн үнгэргэгдэжэ, шиидхэгдээгүй олон асуудалнуудаар зүбшэн хэлсэлгэ болобо. Тэрэниие уласай парламентын түрүүлэгшын орлогшо Владимир Павлов хүтэлөө гэжэ “Буряад Үнэн” мэдээсэлэй албан дамжуулна.

Байгша оной октябрь һарада Буряадтамнай ажаллажа байгаа бүхы хэмжээнэй һунгамалнуудай табадахи хуралдаан үнгэргэдэхөөр хараалагдана. Тэрээндэ бэлэдхэл болгожо, аймагуудай һунгамалнуудтай тусхай уулзалгануудые уласай парламент үнгэргэнэ. Бэе бэетэеэ хүршэ оршодог хэдэн аймагуудай түлөөлэгшэдые нэгэ доро суглуулжа, шиидхэгдээгүй олон асуудалнуудаар ашаг үрэтэй зүбшэн хэлсэлгэ эмхидхээд, намар болохо ехэ хуралдаан дээрэ абтахаар зүйтэй шиидхэбэринүүдэй эшэ үндэһэ зохёохо зорилготойгоор арадай һунгамалнууд иимэ суглаануудые үнгэргэхэ гэжэ бодоһон байха юм.

Түрүүшын зүблөөндэ Мухар-Шэбэр, Бэшүүр, Загарай болон Тарбагатай аймагуудай һунгамалнууд уригдаа. Буряад Уласай Арадай Хуралай хоёр хорооной түрүүлэгшэнэр – эдэй засагай бодолгын талаар - Анатолий Кушнарёв, ниигэмэй бодолгын талаар - Александр Стопичев, мүн тиихэдэ Мухар-Шэбэрһээ һунгагдаһан Александр Варфоломеев, Бэшүүрэй тоһоной үйлэдбэриин захирал, уласай парламентын һунгамал Александр Савельев гэгшэд хабаадаа.

Аймагууднай бэе бэеһээ ондоонуудшье һаа, шиидхэхэ асуудалнуудынь ехэнхидээ адли байдаг. Эгээл шухалануудыень Мухар-Шэбэртэ сугларһан һунгамалнууд зүбшэн хэлсээ.