1029
Байгша оной июниин 11-дэ Түнхэн аймагай Толто нютагта дүримгүй наншалдаагаар “Саяанай тулалдаан – домог һэргээлгэ” гэжэ нэрлэгдэһэн Уласхоорондын мүрысөөн үнгэргэгдэхөөр хараалагданхай. Буряад Уластамнай анха түрүүшынхиеэ үнгэргэдэхэеэ байһан һонирхолтой энэ хэмжээ ябуулга эмхидхэхэдэ уласай Толгойлогшын уялга дүүргэгшэ Алексей Цыденов туһалха болоо.
Эмхидхэн зохёодог “Sibforce” (“Сибфорс”) бүлэгтэй хамта тулалдаа үнгэргэхэеэ бэлдэжэ байһан нютаг можын ниитын “Мүнхэ һарьдаг” эмхиин хүтэлбэрилэгшэ Леонид Боргоев энээн тухай мэдээсэһэн байха юм. Тэрэнэй хэлэһээр, Буряад Уласай Толгойлогшын болон Засагай газарай Захиргаан, Спортын болон залуушуулай бодолгын талаар яаман мүнгэн туһаламжа үзүүлхээр уялгалагдаад, тусхай дансануудые баталба.
- Тулалдаанай эрхим наншалдаашада Буряад Уласай Толгойлогшын уялга дүүргэгшын тусхай кубок барюулагдаха. Гэхэтэй хамта, тус мүрысөөе уласай бүхы мүрысөөнүүдэй хойто жэлэй түсэбтэ оруулха зорилготойгоор хэрэгтэй дансануудые бэлдэжэ тушаахыемнай спортын яаман уряалаа. “SibFors” болон «Мүнхэ һарьдаг” эмхинүүдэй зүгһөө уласай Толгойлогшын уялга дүүргэгшэ Алексей Цыденовтэ, спортын болон залуушуулай бодолгын сайдай уялга дүүргэгшэ Баяр Ангуровта ехэ гэгшын баяр хүргэнэбди! – гээд Леонид Боргоев онсо тэмдэглээ.
Автор: Василий ЦЫБИКОВ
