​Сентябриин 10-да һунгалта болохо

Буряад Уласай Арадай Хуралай мүнөөдэр үнгэрһэн ээлжээтэ бэшэ сесси дээрэ һунгамалнууд хэдэн шиидхэбэри абажа, уласай түүхын шэнэ хуудаһан ирагдаба гэхэдэ, алдуу болохогүй. 

Хүсэндөө ороһон тогтоол 

Байгша оной сентябриин арбанда Буряад Уласай Толгойлогшын һунгалта болохо гэжэ хуулиин ёһоор үдэр гаргагдаба. Һунгамалнууд нэгэн дуугаар иимэ шиидхэбэри абаа. Арадай Хуралай тогтоолдо парламентын дарга Цырен-Даша Доржиев үсэгэлдэр гараа табиһан байха юм. Энэ тогтоол “Буряад үнэн” болон “Бурятия” сонинуудай мүнөөдэрэй дугаарнуудта гүрэнэй хоёр хэлэн дээрэ толилогдожо, хуулита ёһоор хүсэндөө оробо. 

Ээлжээтэ бэшэ сесси дээрэ энэ асуудал гаргагдахадаа, хуулита болзорнуудые сахиха ушарһаа уламжалаа юм. Ушарынь гэхэдэ, федеральна хуулинуудайшье дүримөөр, Буряад Уласай Толгойлогшые һунгаха тухай хуулииншье ёһоор, тус һунгалтын үнгэргэгдэхэ болзорһоонь тоолоходо, 100 хоногһоо эртэ бэшэ, 90 хоногһоо хойно бэшэ уласай Толгойлогшын һунгалтын үдэр Арадай Хурал гаргаха ёһотой юм. Тиимэһээ үсэгэлдэр абтаһан шиидхэбэриин, һунгамалнуудаймнай дуугаа үгэжэ баталһан, парламентын даргын гараа табижа батадхаһан тогтоолой ёһоор, Буряад Уласай Толгойлогшын һунгалта 2017 оной сентябриин 10-да үнгэргэгдэхэнь. 

Бусаагдаһан эрхэ 

Федеральна хуулинуудай хубилгагдаһанһаа боложо, һүүлэй арбаад жэлэй туршада иимэ хэмжээнэй һунгалта үнгэргэгдөөгүй гээд һануулая. Нютаг можонуудай толгойлогшонор, амбан захирагшад (губернаторнууд) өөһэдынгөө регионуудай хуули зохёон абадаг засагай дээдын зургаануудай сессинүүд дээрэ арадай һунгамалнуудай дуу үгэлгөөр һунгагдадаг болоод байгаа. Буряад Уласаймнай хоёрдохи Юрэнхылэгшээр, удаань Толгойлогшоор дүн хамта хоёр болзорой, арбан жэл шахуу, хугасаада Вячеслав Наговицын иимэ аргаар һунгагдажа ажаллаа бэлэй. 

Харин мүнөө намартаа һунгагшад – уласай ажаһуугшад, гүрэн түрын эрхэтэд өөһэдөө дуугаа үгэжэ, уласай даргые һунгаха аргатай болобо гээшэ. Дахин хубилгагдаһан федеральна хуули энэ эрхые арад зондо бусаагаа гээд онсолхо хэрэгтэй.