​Одото сагай тохёолгон

Россия-1» каналаар болоһон “Танцуют все!» гэһэн телешоуда илажа, кубогтань хүртэһэн, 1 миллион түхэриг шүүһэн дуу, хатарай “Байгал” ансамбльда манай Захаамин нютагай хүбүүн Түмэн Валерьевич ЦЫБИКОВ хатардаг юм. 

Түмэн Цыбиков

Һараһаа үлүү саг соо “Сэнхир экранай” дэргэдэ гансашье Ород гүрэн соогоо бэшэ, харин бүхы дэлхэй дээрэ буряад-монголшуудай һүр һүлдэ үргэһэн хатаршадайнгаа түлөө амин голоороо гэхээр, сэдьхэлээрээ дэмжэн хараабди. Ород ороной эгээл эрхим хатарай коллектив гэхэдэнь, одото хубяарнь омогорхоогүйдоо яалай! 

Жюриин гэшүүд сооһоо Алла Сигалова эгээл талархалтайгаар манай хатаршадта хандаа, зүүн зүгэй бэлигэй гүн баялигые илангаяа наринаар мэдэрээ ха юм. Иимэ хандаса туйлаһан өөһэдымнай хүбүүд, басагадай габьяал даа. 

Ялас гэмэ илалтада өөрынгөө дуһал-хубита оруулһан Түмэн Цыбиковтэй хөөрэлдэбэбди.

- Ороной эрхим хатаршадтай зэргэсэн мүрысэжэ байхадаа, ямар мэдэрэл түрөө гээшэб? 

- Зохёохы абьяаснай бадаржа байгаа. Бэе бэедээ бүри дүтэ, бүри эбтэй эетэй болоһон шэнги. Ямар хатар найруулнабибди – һайса мүлихэ, “нэгэ амин, нэгэ арһан” болоод байха хэрэгтэй байгаа... 

- Арадайнгаа нэрэ нэн түрүүн һанаа ёһотойт?

- Манай бэрхэ буряад үндэһэтэн хэнһээшье доро бэшэбди, дээгүүр долгин соо “тамарха” аргатайбди гэжэ бодогдоол бэзэ даа. Гэхэ зуура, олон юумэ бодохо сүлөөгүй - репетици, ажал, хатар… Зай захагүй... 

Буряад Уласай арадай артист Түмэн Валерьевич Цыбиков гол ажалһаа гадуур хореограф-багшаар хүдэлдэг юм. «Саран Туяа» гэһэн хүүгэдэй коллективтэ хатарай хэшээлнүүдые заана. Наһанайнь нүхэр Туяна Валерьевна Григорьева “Байгал” ансамбльда ятаг дээрэ наададаг артист. Энэ һайхан бүлэ Эрдэни хүбүүтэй, Дарима басагатай юм. Цыбиковтэнэй угые Түмэн Валерьевичэй хүбүүд Баясхалан Бата хоёр мүн лэ үргэлжэлүүлнэ. 

- “Байгал” ансамбльда хүдэлһэнэй ашаар бүхы дэлхэйе харааб. Мүнөө ансамблиингаа 75 жэлэй ойдо бэлдэнэбди. Директор Дандар Жапович Бадлуев, уран һайханай талаар хүтэлбэрилэгшэ Жаргал Жалсанов – иимэ ухамай бэрхэ бэлигтэнэй хажууда ямаршье хүн тоти болошохо бэшэ гү... Хатарша нүхэдни, хабатай ябаял даа гээд уряалһуу, ансамблиингаа ойн баярай урда, - гэжэ Түмэн Валерьевич түгэсхэлдэнь үреэгээ бэлэй.

Түмэн Цыбиков финалай хатарай үедэ