1163
Хэрбэеэ үсэгэлдэр бүхы гол хэмжээнүүд Мойһотодо эмхидхэгдээ һаа, мүнөөдэр Түбэй стадион дээрэ үргэлжэлбэ гээд, «Буряад үнэн» сониной сурбалжалагша Сэнгэ Ринчинов Захааминһаа мэдээсэнэ.
Буряад Уласай Толгойлогшын нэгэдэхи орлогшо Иннокентий Егоров түрүүтэй бүхы сайднар, мүн Буряад Уласай Арадай Хуралай Түрүүлэгшэ Цырен-Даша Доржиев бүлэг һунгамалнуудтай хамта, Улаан-Yдэ хотын һунгамалнуудай Соведэй гэшүүд болон Буряадай бүхы аймагуудай засаг дарганар Захаамин аймагые түрэһэн үдэрөөрнь амаршалаад, үнэтэ бэлэгүүдые барюулаа. Гадна зэргэлээд оршодог Монгол ороной Булган аймагһаа айлшад буугаа. Монголой хилэ харагшадшье һайндэртэ хүрэжэ ерээ. Тиихэдэ наһанайнгаа амаралтада гараһан Захааминай багшанар Улаан-Yдэһөө авто-унаагаар жагсаал байгуулаад, өөһэдөө ябуулжа ерэһэн байна.
- Ойн баярай эхиндэ 90 мори унаһан бүхэриг шамбай баатарнууд олоной урда жагсажа, бэрхэеэ харуулаа. Айхабтар һүрөөтэй байгаа, - гээд, Сэнгэ Ринчинов тэмдэглэнэ.
Нээлгын баяр ёһололой удаа Сурхарбаан эхилээ. Тон һонирхолтойнь гэхэдэ, багашуулай дунда һур харбалгаар мүрысөөн үнгэрөө. Урид иимэ хэмжээн хаанашье эрхилэгдэдэггүй байгаа бшуу. Мойһотодо гол түлэб үхибүүдэй дунда мүрысөөнүүд үнгэрөө. Багашуул барилдаад, шангуудые абаа. Харин мүнөөдэр ехэшүүл барилдаанай хибэс дээрэ гараба.
«Буряад үнэн» сониной ээлжээтэ дугаарта Захаамин аймагай ойн баяр тухай бүри дэлгэрэнгыгээр бэшэхэбди.
