653
Буряад Уласта Хитад болон Монгол гүрэнүүдэй аяншалгын һалбариин хүтэлбэрилэгшэд мүнөөдэр бууба.
Июниин 21-дэ Ородой Холбоото Уласай, Хитад болон Монгол гүрэнүүдэй Засагай газарай түлөөлэгшэд болон аяншалгын захиргаануудай хүтэлбэрилэгшэдэй хабаадалгатай зүблөөн 2-дохиёо үнгэргэгдэхэ гэжэ Буряад Үнэнэй мэдээсэлэй албан мэдээсэнэ.
Суглаанай үедэ “На Великом чайном пути” ород-монгол-хитад түлөөлэгшэнэрэй залан хүтэлбэрилгын зүблөөн үнгэрхэ. Ородой Холбоото Уласай Аяншалгын федеральна агентствын хүтэлбэрилэгшэ Олег Сафонов, Хитадай Аяншалгын талаар Гүрэнэй таһагай хүтэлбэрилэгшэ Ли Цзиньцзао, Монголой Оршон тойроной болон аяншалгын яаманай гүрэнэй секретарь Цэгмидийн Цэнгэл болон аяншалгын һалбариин түлөөлэгшэд зүблөөндэ хабаадаха.
Ородой Холбоото Уласай Москва, Эрхүү можонуудай, Үбэр Байгалай болон Красноярск хизаарнуудай, Хитадай 10-аад можо нютагуудай аяншалгын һалбариин түлөөлэгшэд Улаан-Үдэдэ үнгэргэгдэхэ суглаанда хабаадалсаха. Зүблөөндэ эдэ гурбан гүрэнүүд аяншалгын асуудалнуудаар суг ажалаа ябуулха тухай хэлсэхэ юм. Хилэ гараха гүрэнүүдэй хоорондын аяншалгын зам, хилэ шадархи хотонуудта болбосон түхэлтэй оршон тойрон байгуулха, хүнүүдэй аяншалхада аюулгүй байдал тогтоохо гэһэн асуудалнуудаар суглаан эмхидхэгдэхэ юм. Уласхоорондын аяншалгын “Великий чайный путь” түсэл олондо мэдүүлхэ, һурталшалха асуудалда онсо анхарал хандуулагдаха.
- Монгол болон Хитад гүрэнүүдэй аяншалагшадай тоо үдэрһөө үдэртэ олон болоно. Байгал далай, уласай түүхын-соёлой газарнууд, байгаалиин хүшөөнүүд хүнүүдын ехэтэ һонирхуулна. Ород, Хитад болон Монгол гүрэнүүдэй түлөөлэгшэдэй 2-дохиёо үнгэргэгдэхэ суглаанда аяншалгын һалбариин хүгжэлтэдэ онсо анхарал хандуулагдаха. Буряад Уласай аяншалгын һалбариин хүгжэлтэдэ энэ суглаан нүлөөлхэ байха, - гэжэ Буряад Уласай Толгойлогшын уялгануудые дүүргэгшэ Алексей Цыденов хэлэбэ.
