797
Буряад Уласта тамирай-соёлой “Наадан-Сурхарбаан-2017” гэһэн хэмжээ ябуулга июлиин 1-2-ой үдэрнүүдтэ үнгэргэгдэхэ юм. Буряад Уласай Засагай газарай дэмжэлгээр, “ Буряад Уласта Ород гүрэнэй арадуудай нэгэдэл бэхижүүлгэ болон үндэһэтэнэй соёлой хүгжэлтэ” гэһэн Гүрэнэй программын ёһоор Сурхарбаан эмхидхэгдэнэ.
“Наадан-Сурхарбаан-2017” гурбан шатада эмхидхэгдэхэ. Түрүүшын шатада наадан һомоной нютагуудта, удаань Буряад Уласай аймагуудта болон Улаан-Үдэдэ, гурбадахи шатада уласай хэмжээнэй наадан үнгэргэгдэхэ юм.
Заншалта ёһоороо олон харагшад болон хабаадагшад Сурхарбаанда ерэхээр хараалагдана. Аймаг, нютаг бүхэнһөө эрхим барилдаашад, мэргэн һур харбагшад, хурдан агта хүлэгтэй мори урилдаашад нааданда хабаадаха.
“Наадан-Сурхарбаан -2017” гэһэн хэмжээ ябуулгын нээлгын баяр ёһолол июлиин 1-дэ үглөөнэй 10 сагһаа Ивалгын дасанай иппподром дээрэ үнгэргэгдэхэ юм. Хоёрдохи үдэртэ хэмжээ ябуулганууд Буряад Уласай Түб стадион дээрэ эмхидхэгдэхэ. Эндэ бүхэ барилдаан, һур харбаан, шатар наадан болон гиир үргэлгөөр тамиршад хаба шадалаа туршаха юм.
Эдээнһээ гадуур һээр шаалган, шагай наадан гэһэн үндэһэтэнэй наадануудаар мүрысөөнүүд үнгэргэгдэхэ юм. Эдэ наадануудта тамиршад болон харагшад хабаадаха аргатай байха.
Ёохор нааданай мүрысөөн болон арадай уран һайханай бүлгэмүүдэй тоглолтонууд Улаан-Үдэ хотын ажаһуугшад болон айлшадта харуулагдаха.
Бүхы тамирай болон нааданудай түгэсхэлэй шата 16 сагһаа эхилхэ. “Наадан-Сурхарбаанда” илагшадые амаршалжа, Буряадай оперо болон баледэй театрай болон эстрадын дуушадай тоглолто харуулагдажа, хэмжээ ябуулга түгэсэхэ юм.
