941
Улаан-Үдэдэ үнгэргэгдэһэн Ород, Монгол, Хитад гүрэнүүдэй аяншалгын захиргаануудай түлөөлэгшэдэй хабаадалгатай 2-дохи зүблөөндэ Буряад Уласай Толгойлогшын уялгануудые дүүргэгшэ Алексей Цыденов 2017 оной октябрь һараһаа Бээжэн – Улаан-Баатар – Улаан-Үдэ гэһэн аяншалгын поезд ябуулхаар хараалагдана гэжэ хэлэбэ.
Буряад Уласта аяншалагшадай тоо олошоруулха талаар ажал ябуулагдана гэжэ Алексей Цыденов тэмдэглэбэ.
- Мүнөө “Байкал” аэропортто 2-дохи ниидэлгэ-буулгын зурууд баригдажа байна. Барилгын дүүрэхэдэ, уласхоорондын самолёдууд ябадаг болохо гэжэ хүлеэгдэнэ. Тиихэдэ гурбан гүрэнүүдэй хоорондо аяншалагшадай тоо олошорхо, - гэжэ Буряад Уласай Толгойлогшын уялгануудые дүүргэгшэ Алексей Цыденов хэлэбэ.
Ород, Монгол гүрэнүүдэй хоорондо аяншалагшадай тоо жэлһээ жэлдэ олошорно. 2015-2016 онуудта 2014 онтой жэшэхэдэ, монгол аяншалагшадай тоо 38%-ээр ехэ болоо, Ородой Холбоото Уласһаа Монгол гүрэн руу аяншалһан хүн зоной тоо 25%-ээр ехэ болоо гэжэ Ородой Холбоото Уласай Аяншалгын федеральна агентствын хүтэлбэрилэгшэ Олег Сафонов зүблөөндэ тэмдэглэбэ. Энэ уулзалгын үедэ улас дотор Монгол гүрэнэй аяншалагшадта һайн шанартай хангалгын байгууламжатай, ариг сэбэр оршон тойрондо амарха арга дурадхахаар бэлэнбди гэжэ Буряад Уласай Толгойлогшын уялгануудые дүүргэгшэ Алексей Цыденов хэлэһэн байна. Ородой Холбоото Уластай аяншалгын асуудалнуудаар харилсахаар бэлэн байһанаа Монгол гүрэнэй Оршон тойроной болон аяншалгын яаманай гүрэнэй секретарь Цэгмидийн Цэнгэл мэдүүлбэ.
Ород, Хитад гүрэнүүдэй хоорондо аяншалагшадай тоо баһал олошорһон байна. 2016 ондо хитад аяншалагшадай тоо 15%-ээр ехэ болоо, Ород гүрэнһөө Хитад аяншалһан зоной тоо 31%-ээр ехэ болоо. Ородой Холбоото Улас хитад аяншалагшадай түрүүлэн ябадаг 10 гүрэнүүдэй тоодо ородог. Тиихэдээ тэдэнэр Москва, Санкт-Петербург болон Алас Дурна зүгөөр аяншалдаг байна.
- Аяншалагшадай ябаха газарнуудые олошоруулха шухала, тэдэнэй дунда Буряад Улас дутахагүй. Ород, Хитад гүрэнүүдэй хоорондо хилэ шадарай можо хоорондын аяншалгын зам байгуулха талаар ажалаа үргэлжэлүүлжэ, саашадаа тэрэнээ хоёр гүрэнүүдтэ хүгжөөхэ, - гэжэ Хитад гүрэнэй Хитадай Аяншалгын талаар Гүрэнэй таһагай хүтэлбэрилэгшэ Ли Цзиньцзао хэлэбэ.
