893
Буряад Уласта июлиин 3-һаа 6 болотор Х. Намсараевай нэрэмжэтэ Буряад драмын театрай байгуулагдаһаар 85 жэлэй ойн баяр тэмдэглэгдэхэ.
1932 оной июлиин 7-һоо буряад арадай үндэһэтэнэй мэргэжэнги театр ажалаа ябуулжа эхилһэн байна. Олон жэлэй туршада Буряад театрта хүдэлһэн бэлиг талаантай зүжэгшэд болон хүдэлмэрилэгшэдэй нэрэнүүд түүхын хуудаһанда алтан үзэгүүдээр бэшэгдэнхэй.
Ойн баярта зорюулжа, театрай фойедо үнгэрһэн жэлнүүдэй зүжэгшэдэй, тэдэнэй наадаһан рольнуудай гэрэл зурагууд дэлгээгдэнхэй. Буряад театрта баярай хэмжээ ябуулгада бэлэдхэл эхилэнхэй. Ородой Холбоото Уласай можо нютагуудай театр шүүмжэлэгшэд, зүжэгшэд, засаг зургаанай, соёлой һалбаринуудай, олондо мэдээсэл тараадаг хэрэгсэлнүүдэй түлөөлэгшэд баяр ёһололдо уригданхай. Тиихэдэ Саха (Яхад) уласай П. А. Ойунскийн нэрэмжэтэ театрай, Хальмагай Б. Басанговай нэрэмжэтэ Үндэһэтэнэй драмын театрай, Башкирай Мажит Гафуриин нэрэмжэтэ драмын театрай, Тыва уласай Үндэһэтэнэй хүгжэмэй-драмын тетрай, Монголой Д.Нацагдоржын нэрэмжэтэ драмын академическэ театрай зүжэгшэдтэ болон хүжэлмэрилэгшэдтэ урилганууд эльгээдэнхэй.
Пермь хотын театрай шүүмжэлэгшэ, “Алтан баг” фестивалиин мэргэжэлтэ шүүбэришэ Татьяна Тихоновец, Татарстанай Г. Камалай нэрэмжэтэ театрай уран зохёолой-драматургиин таһагай хүтэлбэрилэгшэ, театрай шүүмжэлэгшэ Нияз Игламов гэгшэд Буряад драмын театрай баяр ёһололой үдэшэдэ ерэхэ юм.
Июлиин 3-да “Оройтоһон дуранай охин”, июлиин 4-дэ “Аба эжын ургынууд”, июлиин 5-да “Полёт. Бильчирская история” гэһэн зүжэгүүд баярай хэмжээ ябуулгын үедэ табигдаха. Июлиин 6-да үдэшын 17 сагта ойн баярай үдэшэ үнгэргэгдэхэ юм.
